Амьдрал үргэлж л жингийн тухай дээр тавигдаж, ялимгүйхэн чармайлт гаргавал амжилт гэсэн тал нь дийлж болдог зүйл юм. Амьдралдаа байнга чармайлт гаргаж амжилт гэсэн талыг нь үргэлжийн дийлүүлж байхын тулд хүмүүс бид өөрсдийгөө бэртээх зүйл огт хийж болохгүй. Биднийг бэртээж гэмтээх олон арван хүчин зүйлс байдаг.
Тухайлбал түймэр, үер ажлын байрны осол гэх мэт. Гэхдээ энэ бүгдээс илүүгээр бидэнд хамгийн ихээр ойр байж аюул учруулдаг нь оюун санааг гэмтээж, бэртээдэг залхуурал юм. Арслан олзоо барихдаа өөрийгөө бэртэж гэмтээгээд байвал удаан амьдрах боломжгүй болно. Үүний нэгэн адил бид ажил төрөлдөө залхуу байдалтай хандах юм бол удаан хугацааны турш хүнд хэцүүг туулах болно гэсэн үг юм. Залхуу байдлыг өөрийнхөө амьдралд газар авахуулах нь үл мэдэгдэх бурангуй хүчинд олзлуулсантай адил юм.
Хичнээн сайхан ирээдүй байсан ч түүнийг үл тоон залхуурч суух нь өөрийнхөө хүзүүнээс хүнд төмөр зүүгээд гүн усанд үсэрч байгаагаас өөрцгүй гэлтэй. Тиймээс хэнч залуу хүн болж, залхууралтай нөхөрлөж болохгүй. Харамсалтай нь бид залхууралтай байнга нөхөрлөж явсаар удаан хугацааг туулсаар ирсэн. Цаашид мөн туулах янзтай харагдаж байгаа нь үнэхээрийн түгшүүр төрүүлж байна.
Залхуу хүн олигтой шинийг сэтгэдэггүй, аливааг хойш тавих дуртай, үргэлжид ажлаас зугтааж, бүгдийн ард үлдэхийг бодож, сэтгэл санаа болон бие махбодийн хувьд нунж дорой болчихдог. Аливаа зүйлийг өнгөрсөн хойно нь амаа барьж зогсдог байхгүйн тулд залхуурлын талаар идэвхитэй ярьж, нухацтай авч хэлэлцэх хэрэгтэй. Залхуурлыг бүдүүн тоймоор бодож огт болохооргүй цаг үед бид амьдарч байна. Өнөөдөр бид элдэв төрлийн хэлбэр хөөж явсаар залхуу занг өөрсдийнхөө жинхэнэ моод болгож орхисон. Харамсалтай нь үүнийгээ гадарлах сөхөөгүй яваагийн улмаас ядуу, хоосны ул мөр бидний амьдралд улам тодорсоор байгаа билээ. Хувь хүн амьдралдаа өдөр тутам өөрийгөө ялж байхын тулд залхуу занг зоргоор нь тавьж эрхлүүлж болохгүй.
“Байрандаа бүү зогс” номын зохиогч Б.Мөнх-Эрдэнэ
ЭХ СУРВАЛЖ: HUVGUUD.MN
