“Дэлхийн Энхтайваны Залуучуудын Корпус” ТББ-аас тогтмол зохион байгуулдаг “Залуу гэр бүл” сургалтанд оролцсон Б.Ган-Өсөхийн гэргий Нарангэрэлтэй ярилцлаа.
Гэр бүл салалт ихсэж, чанаргүй, тогтвор суурьшилгүй гэр бүлүүд ихээр бий болж, үүнээсээ үүдэн хүүхдийн эрх зөрчигдөж байгаа энэ үед уг ТББ нь залуучуудыг бат бөх гэр бүл болоход чиглэсэн сургалт, семинарыг зохион байгуулдаг байна.
“Дэлхийн Энхтайвны Залуучуудын Корпус” ТББ-аас зохион байгуулж байгаа “Залуу гэр бүл” сургалтанд хэд дэх удаагаа сууж байна вэ? Яагаад заавал энэ сургалтыг сонгох болов?
Энэ сургалтанд дөрөв дэх удаагаа сууж байна. Дүүгээсээ анх “Залуу гэр бүл” байдгийг сонсоод, сургалтанд хамрагдаж эхэлсэн.Сургалтын зорилго,агуулга, хөтөлбөр нь их таалагдсан л даа. Залуу гэр бүл ямар түвшинд явж байна, эхнэр нөхрийн харилцаа ямар байх ёстой, хань бид хоёрын хоорондын харилцаа зөв явж байгаа эсэх талаар мэдэхийг хүсээд энэ сургалтанд сууж эхэлсэн.
Гэр бүлийн чиглэлийн олон сургалт семинар явуулдаг газрууд байдаг байх. Энэ сургалтын бусдаас ялгарах давуу тал нь юу байсан бэ?
Гэр бүлийн зөвлөгөө өгдөг газрууд байдаг гэж сонсч байсан ч яг залуу гэр бүлийн асуудлыг шийдвэрлэх зорилготой сургалт, семинарын талаар өмнө нь сонсч байгаагүй. Тэр ч утгаараа залуу гэр бүлийн асуудлыг шийдэх зорилго нь сургалтын давуу тал гэж бодож байна.
Өмнө нь шийдвэрлэж чадахгүй олон асуудал байсан байж болох юм. Энэ сургалтанд сууснаараа танай гэр бүлд яг ямар өөрчлөлт гарсан бэ?
Өө нэлээн их өөрчлөлт гарсан. Өмнө нь гэр бүлийг эр хүн удирдаж, эмэгтэй хүн зөвлөх байдлаар хамтын амьдралаа авч явдаг талаар огт мэддэг байсангүй. Энэ талаар хэлж зөвлөж байсан хүн байгаагүй. Тэр ч утгаараа эр нөхрөө гэр бүлийн удирдагч, өөрөө гэр бүлийн зөвлөх гэдгээ олж харсан маань амьдралд маань цаашдаа нөлөөлнө гэдэгт итгэж байна. Бид хоёр ч гэсэн сонссон, мэдсэн, ойлгосноо хэрэгжүүлэх гэж хамтдаа хичээж байгаа.
Өнөөгийн нийгэм, залуус гэр бүл гэдэг ойлголтыг их хөнгөнөөр хүлээж аваад байх шиг байна л даа. Та бүхний хувьд үүнтэй санал нийлэх үү?
Санал нийлж байна. Бидний хувьд ч гэсэн гэр бүл төлөвлөлтийн талаар мэдлэг дутмаг байсан. Энэ талаа ч бас анзаарч мэддэггүй байсан. Үүнтэй адил залуучуудад ч гэсэн энэ талын мэдлэг хэрэгтэй байх. Яагаад гэвэл бидний үеийн залуучуудын эцэг эх гэр бүл төлөвлөлтийн тал дээр нээлттэй яриа өрнүүлж, зөвлөгөө өгөх нь ховор байсан. Энэ дутагдалтай талыг нөхсөн тус сургалт цаашдаа үргэлжилж олон олон залуу, залуу гэр бүлд хүрээсэй гэж хүсч байна.
Залуу гэр бүлүүд юун дээрээ хамгийн их алдаад байгаа юм шиг санагддаг вэ? Сургалтанд суусан, олон зүйл ойлгож мэдсэн гэр бүлийн хувьд бусад залуу гэр бүлүүддээ туршлагаасаа хуваалцаач?
Харилцаан дээр л алдаад байх шиг санагддаг. Бас гэр бүл төлөвлөлт их чухал санагддаг шүү. Хүүхдүүдтэйгээ харилцах харилцаа, тэдний цаашдын боловсрол гээд л гэр бүл төлөвлөлтөн дээр алддаг гэж бодож байна. Гэр бүлийн хоорондын харилцаа их чухал болохыг ойлгосон. Тэр дундаа нөхөр, эхнэрийн хариуцлага чухал. Гэхдээ сонссон зүйлээ тэр доор нь хэрэгжүүлнэ гэдэг амар биш л дээ. Тийм ч учраас бид ч гэсэн хичээж байна. Залуу хүмүүс учраас сурах зүйл ч их байна.
Хүн бүр сайхан амьдрахыг хүсдэг. Гэр бүлийн харилцаа аз жаргалын үндэс болохоор үр хүүхэд маань ч гэсэн хараад үлгэр загвар авах сайхан гэр бүлийг бүтээх болно. Энэ сайхан амьдралыг бүтээхэд тус болж байгаа “Дэлхийн Энхтайвны Залуучуудын Корпус” ТББ-аас зохион байгуулж байгаа “Залуу гэр бүл” семинарыг зохион байгуулдаг хамт олонд талархаж байна.
