15хан настай М.Одгэрэл гэх охин спорт сонирхогчдын анхаарлыг татаж багагүй дуулиан тарилаа. Зарим хэвлэл мэдээллүүд түүнийг долоо хоногийн дуулианы эзнээр хүртэл нэрлээд амжсан байна.
Учир нь тэрбээр дэлхийн 12 удаагийн аварга, даамны дархлагдсан аварга болсон Латвийн тамирчин Зоя Голубеваг хожиж даамны спорт сонирхогчдын нүдийг бүлтийлгэж, чихийг дэлдийлгэсэн үйл явдал болсон билээ. Нэг хэвийн үргэлжилж байсан дэлхийн аваргын тэмцээнийг сонирхолтой болгож, унтаа байсан улсуудыг сэрээсэн гэх. М.Одгэрэл охинд хожигдсон мастер ч гүн шоконд орж хэрхэн яаж хожигдсоноо гайхаад барахгүй байгаа аж.
“Босоо” аваргыг ганхуулсан охины тухай даамны спортын оргил болсон улс, гүрнүүдийн хэвлэл мэдээллээр цацагдаж манай 15хан настай спортын дэд мастер охин дэлхийн “од” болсон гэнэ. Тэрээр “Шавь” цогцолбор сургуульд суралцдаг бөгөөд даамны спортоор арван настайгаасаа л хичээллэж эхэлсэн аж. Өсвөр үеийнхний Азийн аварга болж байсан тэрээр ийнхүү дэлхийн аваргыг хожсоноороо ирээдүйн аварга гэх үнэлгээг олон олон үзэгчдээс аваад байгаа билээ.
