Та дутадалтай зүйл юу? Бурхан биш учраас би л лав зөндөө дутагдалтай. Заримтай нь насаараа тэмцээд ч дийлэхгүй, заримыг нь жаахан ч гэсэн зүгшрүүлэх гэсээр явтал хүн амьдралыг туулж гүйцээд, нэг л өдөр хувцсаа тайлаад одох шиг энэ биеэ жаргал зовлон ээлжилсэн алаг эрээн дурсамжтайгаа хамт энэ хорвоод орхиод буцдаг. Бид бүгд л энэ үлэмжийн сайхан орчлонд үдлээд буцах гэж ирсэн зочид. Хүн бүхэн дутагдалтай атлаа бусдын мууг болохоор хүлээн авч чаддагүй, чухам тэр хүн нь сайн сайхан яваа бол бүр өөчлөн анаж отож байгаад туулайн чинээ бяцхаан дутагдал гараад ирвэл уулын чинээ болгон чичлэх дуртай байдгийг гайхах юм. Ануд тоглосон дуучин бүсгүйг 50 саяын уналтанд орохыг үзээд хүндлэхээ болилоо л гэнэ. Амнаас ганц үг унагамагц “Өө ингэж хэлэхээр нь хүндлэхээ больчихлоо л гэнэ”. Ер нь аль нэг хүн дээшээ ялимгүй өндийгөөд ирмэгц өнгөрснийг нь ухаж төнхөж, чаддагаараа муу муухайг нь дуудаж, алтан цагаа үрэн коммент бичиж байж санаа сая нь амарна. Хүн бүхэн үнэндээ өөрийнхөө муу муухайг хаашаа ч шахан зайлуулж чадалгүй биедээ агуулж явсаар энэ амьдралаа бардаг атал юунд бусдын бяцхан алдаа, сөрөг муу талыг өөлж муулж явдаг юм бол? Бусдыг байгаагаар нь хүлээн авч, сайн сайхныг нь түрүүлж харж, тэр гэрэл гэгээнээс нь өөртөө бас оч гялбаа олж авч байвал хатуу хэцүү энэ хорвоо өнгө гэрэлтэй байх биш үү? Ганц ч өөгүй, өв тэгш, өндөг шиг ХҮН байдаг юм уу?Та өөрөө огт өөгүй хүн үү?Бусдыг байгаагаар нь хүлээн авч, сайн сайхныг нь харж сурах нь агуу их хүмүүнлэг чанар, бурханлаг сэтгэл юм шүү.
Зохиолч: Б.Шүүдэрцэцэг
