Бямба гаригт попын хатан хаан Уитни Хьюстон Лос-Анжелест зочид буудлынхаа өрөөнд олдохдоо ваннтай усанд хэвтсэн байдалтай олдсон гэж Цагдаагийн газраас мэдэгдлээ. 48 настай дуучин бүсгүйг юу үхэлд хүргэсэн болохыг одоогоор мэдэх боломжгүй байгаа бөгөөд дор хаяж найман долоо хоногийн дараа гарах шинжилгээний хариуг албаны ажилчид хүлээж байгаа ажээ. Тэдний мэдэгдэж буйгаар дуучны байгаа газар ямар нэгэн гэмт хэргийн шинжтэй ул мөр байхгүй байсан гэнэ. Харин түүний өрөөнд хар тамхи байсныг олсон байна. Даваа гаригт түүний шарилыг Лос-Анжелес хотоос авчирсан бөгөөд энэ долоо хоногийн сүүлчээр Нью-Жерси хотноо түүнд хүндэтгэл үзүүлэн салах ёс хийх ёслол болох юм.
Даваа гаригт хийсэн хэвлэлийн бага хурлын үеэр Беверли Хиллсийн Цагдаагийн газрын төлөөлөгчийн мэдэгдсэнээр Уитни Хьюстон Бямба гаригийн өглөө ухаангүй олдсон ажээ. Анх түүнийг өрөөнөөс нь олсон ажилчдынх нь нэг буудлын хамгаалалтын ажилчдыг дуудан хэлсэн байна. Хьюстонд анхны тусламж үзүүлсэн боловч сэхээ орохгүй байсаар орон нутгийн цагаар 15:55 минутанд амьсгал хураасан байна. Эх сурвалжуудын мэдэгдэж буйгаар дуучны үхэлд хар тамхи холбоотой байж болзошгүй гэнэ. Түүнчлэн өрөөнд нь хоёр шил бүхий эм байсан аж.
Ньюарк хотноо мэндэлсэн Уитни Хьюстон хотынхоо Шинэ Итгэл Найдвар хэмээх Баптист сүмд байхаасаа дуулж эхэлсэн билээ. Даваа гаригт түүний шарилыг сүмд байрлуулах үед шүтэн бишрэгчид болоод ойр дотных нь хүмүүс хүндэтгэл үзүүлэн цэцэг, бөмбөлөг тавьж, лаа асаасан байлаа.
1980-аад оны дунд үеэс Хьюстон дэлхийн хамийн өндөр борлуулалттай дуучдын тоонд орж, ерээд оны сүүлчээр дэлхий даяар нийт 170 гаруй сая цомог борлуулсан байжээ. Гэвч дуучин Бобби Браунтай гэрлэн, хар тамхинд орсноор алдарт дуучин бүсгүй амжилтын оргилоос уруудаж эхэлжээ. Тэрээр “Grammy Awards-2012” наадам эхлэхээс хэдхэн цагийн өмнө зочид буудлынхаа өрөөнд ийнхүү ухаангүй хэвтэж байхдаа олдсон юм.
Түүнийг таалал төгссөний маргааш, Ням гаригт болсон Грэммийн шагнал гардуулах ёслол дээр Уитни Хьюстонд хүндэтгэл үзүүлэн хөгжмийн ертөнц эмгэнэн гашууджээ. Хөтлөгч Л.Л Күл Жэй ажиллагааг нээж, Грэммийн зургаан удаагийн шагналт дуучин Хьюстонд зориулж үг хэлсэн байна. Дараа нь түүний хамгийн алдартай дуунуудын нэг “I Will Always Love You” дууны клипийг гаргасан юм. Харин хар даашинз өмссөн дуучин Женнифер Хадсон төгөлдөр хуурын аян дээр дууны төгсгөлийг өөрчилж, “Whitney, we will always love you” хэмээн дуулсан юм.
Б.Бурмаа
