Малайзад амь үрэгдсэн Монголын иргэнтэй холбогдох асуудлыг шалгана

Өнгөрсөн сард Малайзд Монгол улсын иргэн Э гэгч бүсгүй амь насаа алдсан талаарх мэдээлэл гарч эхэлсэн. Энэхүү хэргийн талаар албаны хүмүүсээс тодрууллаа.

Гадаад харилцааны яамны Консулын газрын дарга Ш.Сүхбаатар “Энэ талаар мэдээлэл манайд ирээгүй байсан, эртнээс мэдээлсэн бол бид бололцоотой арга хэмжээг авах байлаа. Одоогоор талийгаачийг бусдын гарт амиа алдсан уу, амиа хорлосон уу гэдгийг тодруулахаар холбогдох албанд хандаад байна. Тайландад суугаа Монголын Элчин сайдын яам Малайзын асуудлыг хавсран эрхэлдэг.

Тиймээс Тайланд дахь Элчин сайдын яаманд чиглэл өгсөн. Мөн Хууль зүйн яам болон холбогдох газарт албан бичиг хүргүүлсэн. Шаардлагатай бол Гадаад харилцааны яам, Хууль зүйн яам хамтран ажлын хэсэг гарган хэргийг тодруулах болно.

Малайзын Элчин сайдын яамнаас Бээжин дэх Монгол Улсын Элчин сайдын яамд 11 дүгээр сарын 23-ны өдөр иргэн Э-г нас барсан талаарх анхны мэдээллийг албан ёсоор өгсөн. Уг мэдээлэлд, талийгаач Э нь өөрийгөө боомилж нас барсан гэж дурьдсан байсан.

Мэдээллийн дагуу бид ар гэрийнхэнтэй нь холбогдон харамсалтай хэрэг болсныг дуулгахад тэд хэргийн талаарх илүү дэлгэрэнгүй мэдээллийг бидэнд өгсөн. Ар гэрийнхэн нь талийгаачийг бусдын гарт үрэгдсэн байж болзошгүй талаар цагдаагийн байгууллагад эртнээс мэдэгдсэн юм билээ.

Түүнээс Гадаад харилцааны яам болон Консулын газарт огт хандаагүй” гэв. Талийгаачийн ар гэрийхэн ХЭҮК-т хандаад байгаа ба энэ талаар, Хүний эрхийн үндэсний комисийн гишүүн Л.Оюунчимэг “Малайзд нас барсан Э-гийн ар гэрийнхэн манайд 7 хоногийн өмнө хандсан. Цогцсыг авч ирэхэд замын зардал болгон ГХЯ-наас зургаан сая төгрөгийг шийдэж өгсөн боловч хохирогчийн ар гэрийнхэнд хэлний бэрхшээл тулгарч байгаа тул, ХЭҮК-оос Малайзын хүний эрхийн комисст, талийгаачийн ар гэрийхэний аюулгүй байдал болон зарим асуудалд анхаарал хандуулж ажиллах хүсэлт тавиад байна.

Одоогоор энэ хүсэлтэд хариу өгөөгүй байна. Өнөөдөр бид 14 цагаас талийгаачийн ар гэрийнхнийг байлцуулж Малайзын Хүний эрхийн комисстой холбоо барихаар төлөвлөж байна” гэв.