Урлаг хүнд гоо сайхны таашаал олгож, сэтгэл оюуныг сэргээж, үгээр өгүүлшгүй утга санааг ой тойнд шингээж чаддагаараа гайхамшигтай. Та урлагийн хүн болоогүй ч гэсэн урлагийг харах, сонсох, сэтгэлээрээ мэдрэн таашаах, сонирхон тэмүүлэх мэдрэмжтэй төрсөн гэдэгтээ итгээрэй.Таныг тавгүй байхад хажууд тань гэнэт тааламжтай уян зөөлөн ая эгшиглэж, уран оновчтой үгс нь, уянгалаг сайхан аяз нь сэтгэлийг тань тайвшруулж, бүр шимтэн сонсмоор, биширмээр мэдрэмж төрж байсныг санаж байна уу. Заримдаа ядраад хөдлөх ч тэнхэлгүй мэт болсон, унтмаар, юу ч хиймээргүй зүгээр л суумаар санагдах тэр л үедээ цоглог хөнгөн хөгжмийн аянд сэтгэл сэргэн, бие хөнгөрч, эрч хүч сэргэж ирэх тэр үед та юуг ч хийж бүтээж болмоор бодогддог уу.
Нүд салгамааргүй сайхан уран зураг харан биширч, цоглог хөгжмийн хөнгөн аянд сэвэлзтэл бүжиглэх хосуудыг хараад сэтгэл хөдөлдөггүй хүн байдаг болов уу. Хүүхдүүдийн цангинатал дуулан бүжиж, өхөөрдөм хөөрхнөөр жүжиглэн наадахыг хараад уярдаггүй хүн лав байхгүй бизээ. Үндэсний урлагийн уран яруу, гоо сайхныг биширдэггүй, бахархдаггүй хүнийг олоход бас л амаргүй байх.
