1997 онд Азийн топ модель хэмээх эрхэм хүндтэй шагналын эзэн болсон топ модель Д.Болормаа сүүлийн үед нам жим байх болсон. “Монгол модель” агентлагийнхаа үйл ажиллагаанд бүхий л анхаарлаа хандуулж, шавь нараа дэлхийн тавцанд гаргах эрхэм хүсэлдээ хөтлөгдөн ажиллаж байгаа тэрээр сүүлийн үед загварын шоу тоглолтонд төдийлөн орохоо больсон. Энд тэнд болж буй арга хэмжээ, шоу тоглолтонд шавь нараа түлхүү оруулж, тэднээсээ өөрийнхөө залуу насыг харж кайф авдаг бөгөөд өтөлсөн ч багшлах ажлаа хийсээр байх гэнэ. Олон жил загварын шинэ үеийг бэлдсэн түүнд хүүхдүүдээс нь илүү аз жаргал бэлэглэдэг зүйл үгүй болсон аж. Мөн тэрээр өөрт нь ирдэг кино, рекламны саналыг шавь нартаа шилжүүлдэг бөгөөд өөрт таалагдсан чанартай ганц нэг рекламны саналыг л хүлээж авдаг гэнэ лээ. Тэрээр энэ талаараа “Би хүүхдүүдээ аль болох хүмүүст таниулж энэ ажлаасаа урам зориг авдаг байгаасай гэж хүсдэг. Тэгээд ч надад реклам кинонд тоглоод яваад байх хүсэл тийм ч их биш. Харин гарцаагүй өөрт таалагдсан зүйлдээ өөрөө оролцдог. Үнэнийг хэлэхэд загварынханаас Э.Одгэрэл бид хоёрын ханш их өндөр. Тийм болохоор жижиг сажиг зүйлд тийм ч их оролцоод байдаггүй” хэмээн тайлбарлажээ.
Н.Хувьзаяа www.secret.mn
