Хөгшрөлтийн шинж тэмдгүүд хүмүүст өөр өөр янзаар илэрдэг.
Хорь гаран настайд хүний арьс хамгийн сайхнаараа байдаг ч үрчлээ үүсэх эхний шинж тэмдгүүд илэрнэ. Гэхдээ хүний амьдралын хэв маягаас шалтгаалан хөгшрөлтийн шинж тэмдгүүд арьс хуурайшиж, ширүүн болох, харлах, өнгөө алдах зэргээр илэрдэг.
Хорь, гуч гаран настайд арьсны хөгшрөлт эхэлж, арьс суларч, нүхжин, зураасууд бий болно.
Харин дөчин нас хүрэхэд арьсан дээрх зураасууд гүн болж, дух, хүзүүгээр гүн үрчлээ сууж эхэлнэ. Энэ үеэс арьс уян хатан чанараа алдаж, суларсан байдаг.
Тавь, жаран нас хүрэхэд гүн үрчлээ илт мэдэгдэхүйц болно. Энэ үеэс арьс улам хуурай, ширүүн болдог. Түүнчлэн арьсан дээр хөгшрөлтийн шинж болох нөсөө, толбо үүсч эхэлнэ.
Хөгшрөлтийн шалтгаан юу вэ?
Арьс хөгшрөлтийн 90 хувь нарны хортой нөлөөнөөс, 10 хувь нь генийн хүчин зүйлээс шалтгаалдаг.
Биологийн буюу дотоод хөгшрөлт нь генийн хүчин зүйл юм. Дотоод хүчин зүйл нь арьсыг аажмаар сүйтгэж, коллаген болон себумын хэмжээг бууруулдаг байна.
Гадаад хүчин зүйл буюу илт хөгшрөлтөд нарны хортой туяа гол үүрэг гүйцэтгэдэг учраас нарны гэрлийн шууд тусгалаас арьсаа хамгаалах нь хамгийн чухал. Нарны гэрэл арьсанд хортой нөлөө үзүүлж байгаа нь илт анзаарагдахгүй ч аажимдаа арьс хуурайшиж, өнгөө алдан, харлаж, сэвхтэх шалтгаан болдог.
