Кино урлагийн ертөнцөд болдог томоохон арга хэмжээнүүдийн нэг яах аргагүй Берлиний олон улсын кино наадам. Тиймээс ч германчуудын нэрлэдгээр Берлинале буюу Берлиний кино наадмыг А ангилалд хамруулдаг. Уламжлал ёсоор ХБНГУ-ын нийслэлд Берлинале 62 дахь удаагаа зохиогдож дүнгээ гаргалаа. Энэ удаагийн кино наадам өнгөрсөн жилийнх шиг улс төрийн өнгө аястай болох уу, үгүй юу гэдэг нь аяндаа харагдана хэмээн сэтгүүлчид ярьж байсан. 62 дахь Берлиний кино наадамд Холливудын төдийгүй Болливудын одод ирж шүтэн бишрэгчдээ баярлуулсан юм. Анжелина Жоли, Брэд Питт, Диане Кругер, Мерил Стрип, Салма Хайек, Изабел Юпер, Нина Хосс, Болливудын од Шах Рухк Кхан нарыг хүлээсэн үзэгчид тэдний тоглосон киноны тасалбарыг худалдан авахаар шөнөжингөө дугаарлан зогсч байв. Албан ёсны нээлтэд ирж амжаагүй алдарт жүжигчид арав хоног үргэлжлэх арга хэмжээний үеэр Берлинд ирэхдээ өөрсдийнхөө шинэ уран бүтээлээ үзэгчдэдээ толилуулсан юм. Киногоор амьсгалсан энэ өдрүүдэд Холливудын од Анжелина Жоли, Брэд Питт нар гол баатар нь байсан гэвэл хэн ч үгүйсгэхгүй байх. Анжелина Жоли гурван хүүхдээ дагуулсаар нээлтийн ажиллагаанаас нэг хоног хоцорч ирсэн юм. Тэрбээр ирсэн даруйдаа хүүхдүүдээ дагуулан “Legoland” тоглоомын дэлгүүрээр орж байгааг нь гэрэл зурагчид аль хэдийнэ хальсандаа буулгаж амжсан байв. Гоо үзэсгэлэнгээрээ гайхагддаг Холливудын од Берлинд ирснийхээ маргааш нь НҮБ-ын элчийн хувьд ХБНГУ-ын Гадаад хэргийн сайд Г.Вестервеллетэй уулзсан юм. Тэд хамт цай уух зуураа дүрвэгсдийн асуудлаар санал бодлоо хуваалцсан аж. Жүжигчнийхээ хувьд дэлхийн хэмжээнд хүлээн зөвшөөрөгдсөн Анжелина Жоли найруулагчаар ажиллаж чадна гэдгээ харуулахаар Берлиний кино наадамд өөрийн найруулсан бүтээлээ сойсон юм. Тэрбээр хуучин Югославт болсон дайны үеэр серб залуу, хорват бүсгүй хоёрын хайр сэтгэлийн тухай өгүүлсэн “In the Land of Blood and Honey” бүтээлээ үзэгчдийн хүртээл болгов.
Холливудын одын ярьснаар энэ кино нь дүрвэгсдийн асуудалд онцгой анхааран ажилладаг НҮБ-ын элчийн үйл ажиллагаатай холбоотой бүтээл аж. Тиймээс ч Анжелина Жоли өөрийнхөө найруулсан анхны бүтээлээрээ “Cinema for Peace” шагналын эзэн болохдоо өөрийн эрхгүй нулимс унагасан юм. Үүнийг Берлинале наадмын хамгийн их сэтгэл догдлуулсан мөч хэмээн сэтгүүлчид онцолж байлаа.
Энэ өдрүүдэд Холливудын бас нэгэн од Мерил Стрип өөрийн тоглосон “The Iron Lady” (Төмөр хатагтай) бүтээлээ Германы үзэгчдэд толилуулсан. Өдгөө 62 настай тэрбээр Их Британийн Ерөнхий сайд асан Маргарет Тэтчерийн дүрийг бүтээж ямаршуу зиндааны жүжигчин болохоо дахин харуулсан юм.
Энэ жилийн Берлиний олон улсын кино наадамд 137 орноос 4400 кино ирүүлснээс шүүгчид 350 бүтээлд тэргүүн байрын төлөө өрсөлдөх эрх олгосон аж. Берлиний кино наадам эхэлснээс хойших зургаан хоногт 250 мянган киноны тасалбар зарагдсан байлаа. Ирэх бямба гаригт 2012 оны Берлиний олон улсын кино наадмын тэргүүн шагнал болох “Алтан баавгай”-н эзэн тодрох бөгөөд энэ нь уран бүтээлчдийн хувьд хамгийн их сэтгэл догдлуулсан мөч юм.
Берлин дэх манай сурвалжлагч Ю.ДЭЛГЭРМАА /medee.mn/