НЬЮ-ЙОРК. /Epoch Times/. Морь жилд төрсөн олон алдартан байдаг. Тухайлбал, Монголын эзэнт гүрний хаан Чингис, АНУ-ын Ерөнхийлөгч Теодор Рузвельт, Оросын Ерөнхийлөгч Борис Ельцин, жүжигчин Жэймс Дин, Клинт Иствуд, Харрисон Форд, дуучин Элла Фицгеральд, Арета Франклин, Жанет Жексон нарыг нэрлэж болох юм.
Чингис хаан /1162-1227/ бол Монголын эзэнт гүрнийг үүсгэн байгуулагч, эзэн хаан. Монголын тал нутагт төрсөн тэрбээр байгалийн сорилтуудыг даван туулах онцгой чадварыг хөгжүүлсэн хүн. Энэ чадвараа улс төрийн болон цэргийн нарийн ухаантайгаа хослуулан тэрбээр хөрш зэргэлдээ овог аймгуудаа нэгтгэн, нэгэн цагт нүүдэлчин байсан нийгмийг хүчирхэг эзэнт улс болгон өөрчилсөн билээ. Түүний эзэнт гүрэн Европ, Азийг хамарсан өргөн уудам нутагт оршин тогтнож байлаа. Энэ үеэс Дорно болон Өрнөдийн тээвэр, худалдаа илүү хялбаршиж, соёлын солилцооны давтамж нэмэгдсэн юм.
Чингис хааныг тайван, бодлоготой хүн байсан гэж Хятадын түүхэнд тэмдэглэлд бичсэн байдаг. Тэр хүүхэд байхаасаа л Монгол туургатнуудыг нэгтгэн, дэлхийг ноёрхохоор шийдсэн гэдэг. Түүнд чадвараа ашиглах авьяас заяаснаас гадна болгоомжтой, шүүн шийдвэрлэх нарийн мэдрэмжтэй хүн байсан гэж үздэг.
Рембрандт Харменс Ван Риныг /1606-1669/ бүх үеийн хамгийн шилдэг уран бүтээлчдийн нэг, “Зураачдын хаан” гэж нэрлэдэг. Уран зохиолд Шекспир байдаг шиг уран зурагт Рембрандт бий.
Луи Пастер /1822-1895/ 19 дүгээр зууны эрдэмтэн, халдварт өвчний вакцины судалгаанд бүх амьдралаа зориулсан хүн. Нян судлалын ухааныг үүсгэн байгуулагчдын нэг, “микробиологийн эцэг” гэж нэрлэгддэг. Нэгэн цагт эдгэршгүй өвчний тоонд багтаж байсан халдварт өвчнөөс олон хүний амийг аварч, түүний боловсруулсан вакциныг өнөө хэр нь ашиглаж буй.
Франклин Д.Рузвельт /1882-1945/ АНУ-ын 32 дахь Ерөнхийлөгч, дэлхийн энх тайвны төлөө ажил амьдралаа зориулсан, орчин цагийн амжилт гаргасан улс төрчдийн нэг юм. Тэрбээр халдварт саа өвчинтөй тэмцэхийн хажуугаар Америкийн ард түмнийг Их хямралаас гаргахын төлөө зүтгэжээ.
1918 онд Европын дайны талбаруудаар явж, дайн байлдааныг өөрийн нүдээр үзсэн тэрбээр энх тайвны төлөө тууштай тэмцэх болсон билээ. Дэлхийд энх тайван тогтооход харилцан ойлголцол хэрэгтэйгээс гадна улс бүр өөрийн гэсэн орон зайтай байх ёстой гэж тэр үзсэн байна.
39 насандаа халдварт саа туссан Д.Рузвельт оюун санааны болон бие махбодын саажилттай тэмцэн, уг өвчнийг даван гарч чаджээ. Тэрбээр халдварт саа өвчнөөс урьдчилан сэргийлэх, эмчилгээ судалгааны үндэсний санг бий болгосон юм.
Л.Урангуа montsame
