Зарим бүсгүйчүүд маань хадам ээжээсээ болоод багагүй стресст орж, үл ойлголцох асуудлууд гарч ирдэг. Хэдий нөхрийн чинь ээж байлаа ч гэсэн үнэхээр тэсэхүйеэ бэрх ааш зан гаргаж, таны өдөр тутмын амьдралд оролцож, хэрүүл тэмцэл гаргадаг бол зүгээр хараад хүлцэнгүй суух хэрэггүй. Ингээд танд тустай зөвлөгөөг хүргэе.
– Энэ тохиолдолд хэлэлцэн тохиролцож буулт хийж өгөх гэсний хэрэггүй. Учир нь та өөрийнхөө амьдралын төлөө тэмцэж байгаа өрсөлдөгч юм.
– Хуримаа хийсний дараагаар хадмындаа амьдрахаар боллоо. Гэтэл хадам эх чинь таны ажилгүйг далимдуулж гэр орон цэвэрлэх, хоол унд хийхээс эхлээд гэрийн бүхий л ажилд таныг зарах гэж оролддог бол өөрийн зүгээс шалтгаалах, хийх ёстой ажлаа хийчхээд өрөөндөө ороод суух ч юм уу аль эсвэл гадуур жаахан салхилж явах, найз нөхөдтэйгөө уулзах, дэлгүүр хэсэх, хувийн ажлаа хөөцөлдөж явах хэрэгтэй. Түүнчлэн гэрийн зарц, үйлчлэгч биш гэдгээ мэдрүүл.
– Өөрийн хийх гэж байгаа төлөвлөсөн ажлынхаа талаар илэн далангүй ярих гэсний хэрэггүй. Хэзээ нэг өдөр дургүйцлээ илэрхийлж болно.
– Ямар ч үед хүүгээ өмөөрч таныг буруутгадаг бол “Хүүд тань над шиг хүн олдсонд баярлаж явах хэрэгтэй. Хүүгээ буруу хүмүүжүүлж өсгөсөндөө өөртөө дүгнэлт хийх хэрэгтэй байх” хэмээн хатуухан шүүмжлэлийг өгөхөд буруутах зүйлгүй юм.
– Хийсэн зүйл, ярьж буй яриа хадам ээжид чинь таалагддаггүй, үргэлж шүүмжлүүлж байдаг бол “Яагаад надад ингэж ханддаг юм бэ? би танд таалагдахгүй байсан ч гэсэн хүүгийн тань эхнэр шүү дээ” гэх мэтээр асуух зүйлээ асууж, хэлэх үгээ хэлж, асуултынхаа хариуг нь заавал аваарай.