Хуримынхаа өмнөхөн нас барсан залуу бүсгүйг мөн хорвоог орхисон залуухан хар хүүтэй “гэрлүүлж”, хамтад нь оршуулсан явдал Хятадад болжээ. Хятадууд хойд нас байдаг гэдэгт итгэдэг бөгөөд энэ мэт эмгэнэлт тохиолдолд нас барагсдыг гэрлүүлэх явдал гардаг гэнэ. Үүнийг сүнснүүдийн хурим хэмээдэг байна.
Өнгөрсөн сард нас барсан бүсгүйн эцэг эх нь охиноо хойд насандаа сайхан амьдраасай гэсэндээ ийм шийдвэр гаргасан тухайгаа ярьжээ. “Охин маань хуримлаж байгаа хүнээ танихгүй ч тэд нөгөө ертөнцөд сайхан амьдрах байх аа. Тэгээд хойд насандаа ч хамтдаа төрж, хүний ёсоор хуримлана гэж итгэж байна” хэмээсэн тэд “сүйт бүсгүйн” инжинд 35000 юань авсан юм байна. Сонирхуулахад, нас барагсдыг гэрлүүлдэг ийм уламжлалыг хориглож Мао Зэдун 1949 онд тушаал гаргаж байжээ. Гэвч тэрхүү тушаал олигтой үр дүнд хүрч чадаагүй бөгөөд өдгөө ч хар захад “сүйт бүсгүйн” цогцсыг өндөр үнээр авдаг далд наймаа байсаар байгаа гэнэ.
Ж.ЦЭЦЭГ /mongolnews.mn/