УИХ-ын гишүүн З.Баянсэлэнгээс намрын чуулганы завсарлагаар хийж буй азкил, ирэх хаврын чуулганд ямар асуудлууд оруулах талаар цөөн асуултад хариу авлаа.
-Танай намын бүлэг хаврын чуулганаар ямар асуудалд анхаарал хандуулж ажиллах вэ?
-Нийгэмд хүлээлт үүсгээд байгаа хуулийн төслүүдийг хэлэлцүүлж, батлуулахад анхаарч байна. Инфляцийн өсөлт, ам.долларын ханшийн өсөлттэй холбоотойгоор шийдвэртэй алхмууд хийнэ гэсэн байр суурьтай байна. Ер нь энэ хавар ганц би ч биш, манай бүлгийн гишүүд дор бүрдээ нэлээд идэвхтэй ажиллана гэж шийдсэн.
-Ингэхэд эмэгтэй гишүүд амрах завгүй яваа тухай цахим хуудсууд мэдээлсэн байна лээ. Та чуулганы завсарлагаагаар ямар ажил амжуулав?
-Би саяхан Булган, Эрдэнэт болон Хялганат тосгонд ажиллаад ирсэн. Мөн АНУ-ын Вашингтон хотноо болсон дэлхийн цаг уурын өөрчлөлттэй холбоотой хуралд оролцсон. Хурлаас цаг уурын өөрчлөлт, байгалийн гамшиг, түүнээс урьдчилан сэргийлэх, түүнчлэн цэвэр усны нөөц, хангамж болон, цөлжилтийн асуудалд анхаарал хандуулах нь зүйтэй гэсэн байр суурьтай ирлээ.
-МАХН-ын эмэгтэйчүүдийн их хуралдай энэ сарын эхээр болж өнгөрлөө. Шийдвэр гаргах төвшинд хандсан хүсэлт, уриалгаа танд болон Эрүүл мэндийн сайд Н.Удвадд гардуулсан гэсэн. Тэр дагуу ямар байр суурь баримтлан ажиллаж байна вэ?
-Эмэгтэйчүүдийн их хуралдайд 800 төлөөлөгч оролцсон. Нийгэм, эдийн засаг, соёл, хүний эрхтэй холбоотой асуудлуудаар
таван илтгэл тавьж, хэлэлцүүлсэн байгаа. Эмэгтэйчүүдийн эрх, нийгмийн асуудал, улс төрийн оролцоо, эрүүл мэнд, эмэгтэйчүүдийн бизнес эрхлэлтийг дэмжих үүрэг асуудлаар шийдвэр гаргах түвшний хүмүүс, намуудад хандсан зөвлөмж гаргасан. Зөвлөмжийг УИХ-ын төвшинд хэрэгжүүлэх чиглэлд анхаарч ажиллана.
-Хуралдайн үеэр танай намын дэргэдэх Шударга ёс эмэгтэйчүүдийн холбоо болон Ерөнхий нарийн бичгийн дарга Г.Шийлэгдамба эмэгтэйчүүдийн улс төрийн оролцоог нэмэгдүүлэхэд анхаарч байгаагаа онцолсон. Энэ талаарх Сонгуулийн хуулийн шинэчлэлийг та хэрхэн харжбайна?
-Хуулийн төсөл гишүүдийн гар дээр ирээгүй. Ажлын дэд хэсгүүд ажиллаж байгаа. Аль ч намын шийдвэр гаргах тувшин дэх оролцоог нэмэгдүүлэхэд манай эмэгтэй гишүүд түлхүү ажиллаж байна. Квотыг 30 хүртэлх хувиар нэмэгдүулэх, эмэгтэйчүүдийг сонгуульд оролцох боломжоор хангах, санхүүгийн дарамт үзүүлэхгүй байх талаар ярьж байна. Эндээс гарч буй зөвлөмж, намаас баримталж байгаа байр суурийг Сонгуулийн хуульд тусгуулахын төлөө ажиллана гэсэн бодолтой байна.
ч.зотол
