Lос-Анжелес хотноо өнгөрөгч Ням гаригт 84 дэх удаагийн Оскар-2012 наадам болж өнгөрсөн билээ. Кино наадмын ёслолын ажиллагаа өндөрлөөд хэдэн хоног өнгөрсөн ч жүжигчин Анжелина Жолигийн өмссөн даашинз одоог хүртэл олны анхаарлын төвд байсан хэвээр байна. Гоёмсог атлаа баруун ташаанаасаа доош онгорхой энэ даашинз өмсөхдөө Жоли баруун хөлөө зориуд цухуйлган явсан нь зарим хүмүүст таалагдаагүй бололтой.
36 настай жүжигчин бүсгүйн Оскарын ёслол дээр авахуулсан гэрэл зургууд FOX телевизийн хөтлөгч О’Рейллигийн анхаарлыг ихэд татжээ. Тэрээр Даваа гаригт өөрийн хөтлөн явуулдаг “The O’Reilly Factor” нэвтрүүлгээр Жолигийн талаар их л хачирхалтай дүгнэлтийг хийсэн юм. О’Рейлли түүнийг хэвийн бус, хэтэрхий туранхай байна, бүр ясан хэдрэг болчихож хэмээн уулга алдан шогширсон. Жолигийн ясан бие улс төрийн тоймч О’Рейллиг үнэхээр цочирдуулж чаджээ. Гэвч Жолигийн тухай ийнхүү дуу алдан ярьсан хүн нь ганц О’Рейлли ч биш юм.
Түүнчлэн “Real Housewives of Atlanta”-ийн од Фэдра Паркс, “Брэд Питтийн долоон жилийн турш хайрлаж яваа энэ бүсгүй гоо үзэсгэлэнтэй нь үнэн ч гэлээ түүний энэ хэрзгэр ясанд арай илүү мах хэрэгтэй байна” хэмээн шоолонгуй хэлсэн байна. Түүний хэлсэн үгийг дуучин, ая зохиогч Бонни Макги ч хүлээн зөвшөөрчээ. Тэрээр Жолиг хоол сайн идэх хэрэгтэй хэмээн твиттертээ бичсэн аж. Жолигийн сүйт залуу Брэд Питт ч найз бүсгүйнхээ эрүүл мэнд, туранхай байдалд санаа зовниж байгаа тухайгаа нэгэнтээ ам алдаж байсан билээ.
Жолигийн хэт туранхай биений талаар хүмүүс өөр өөрийнхөө санааг илэрхийлсээр байгаа. Харин зарим хэвлэлийнхэн түүний баруун хөлөө цухуйлган зогссон Оскарын улаан хивсэн дээрх зургуудыг ашиглан янз бүрийн хошин эвлүүлэг хийжээ.
Б.Бурмаа /noyon.mn/
