Морин хуурын чуулгын гоцлол хөгжитчин, морин хуурч Н.Жигжиддоржийн уран бүтээлийн бие даасан тоглолтыг ивээн тэтгэж гардан байгуулсан соёл урлагийг дэмжигч “Төгөлдөр” сангийн тэргүүн Х.Отгонтуяатай товч ярилцсан юм.
-Таны зохион байгуулсан тоглолт амжилттай болсон, баяр хүргэе
-Баярлалаа
-Та яагаад морин хуурч залуугийн тоглолтыг ивээн тэтгэв. Санаачилга таных байсан уу, эсвэл Жийгээ өөрөө хүсэлт гаргаа юу?
-Өөрөө эхэлж тоглолтоо хийх бодолтой байгаагаа хэлсэн. Тэгэхээр нь дэмжье гэсэн юм. Нэг удаа Морин хуурын чуулгын тоглолт үзэж байхдаа энэ залуу хуурч сайн тоглодог юм байна гэж онцолж харснаас хойш гурван ч арга хэмжээнд урьж тоглуулсан болохоор түүнийг илүү мэддэг болсон. Энэ жил сонгодог хөгжмийн гоё үдэшлэг зохион байгуулна гэж төлөвлөж байсан л даа. Тэгтэл хоёр талаас сонирхол нийлсэн болохоор монгол сонгодог чиглэлд хамтраад сайхан тоглолт үзэгчдэд хүргэж чадлаа гэж бодож байна.
-Мэргэжлийн хөгжмийн уран бүтээлчдэд ивээн тэтгэгч төдийлөн олддоггүй. Тэгэхэд сургуулиа төгсөөд удаагүй залуу хуурч том том тоглолт, жүжиг ивээн тэтгэдэг “Төгөлдөр” сангийн ивээлд багтана гэдэг аз шүү. Та санал нэг байна уу?
-Ивээлд багтах гэж хэлж болох уу, үгүй юу. Ямар ч байсан зорьсноороо энэ удаагийн тоглолтыг нь сайхан зохион байгуулж өгье, тэгээд орхичихгүй тоглолтын дараа телевизийн нэвтрүүлэг ч хийлгэх нь зүйтэй гэж үзсэн. Хөгжмийн зохиолчид байна, бүтээлүүдийг нь тоглох хөгжимчид байна. Гагцхүү санхүүгийн асуудлаас нь шийдэлцээд тэр сайхан хөгжмийн зохиолуудыг
хүмүүсийн хүртээл болгох нь их чухал. Уран бүтээлчид бол өмнөхөө хийчихнэ, тэгээд цаашаа явдаггүй юм байна.
-Тоглолтын дараа тайзан дээр Н.Жанцанноров гуай “Шарав бид мэтийн нөхдүүд иймэрхүү бүтээлүүд бичээд орхичихдог. Аль 1980-аад онд зохиосон гурвалууд шүү дээ, саяын тоглодог чинь. Энэ мэтчилэн хэн, хэзээ тоглох юм бүү мэд, ер нь тоглох ч байсан биччихсэн зохиолууд олон. Гэтэл өнөөдөр тоглох хөгжимчид байгаа юм байна, тоглолтыг үзэгчдэд хүргэх ивээн тэтгэгч, дэмжигчид ч байгаа юм байна. Итгэл төрж байна. Бас энэ хөгжимчин залуус гарамгай юм бол гарамгай гэдгийг нь шууд хэлчих хэрэгтэй байна. Их сайхан байна” гэж байсан…
-Тийм ээ. Бас тоглолт болохоос өмнө Шарав гуай утсаар ярьж хөгжимчдийн өмнөөс баярлаж байгаагаа хэлж байна билээ.
-Тоглолтын эзэн залуу морин хуурч Н.Жигжиддорж маань баярласнаа яаж илэрхийлж байх юм?
-Манай хүн мэдээж баярласан. Би мэдрээд байгаа. Гэхдээ Жийгээ их дуугүй хүүхэд юм. Би ч зарим үед өөрийнхөө хүүтэй ярьж байгаа юм шиг л болж байгааг нь ч, болохгүй байгааг нь ч шууд л хэлээд байсан. Хөгжимчид ер нь жаахан дуугүй, дотогшоо, өөртэйгөө, хөгжимтэйгөө ярьдаг хүмүүс байдаг байх. Би анх удаа хөгжмийн тоглолт дэмжиж хамтарч ажиллалаа. Мэдээлж, сурталчлахад бас эвгүй юм байна. Хөгжмийг, хөгжмийн бүтээлийг юу гэж ярьж тайлбарлах вэ гэдэг дээр тархиа нэлээд ажиллууллаа.
-Та юу гэж тайлбарлаж байв?
-Морин хуурын чуулгын морин хуурч Жигжиддорж гэдэг сайн хөгжимчний бие даасан тоглолт болох юм. Хөгжимчин тоглолтын эхний хэсэгт төгөлдөр хуурч, морин хийлч хоёртой хамтарч Н.Жанцанноров, Б.Шарав, Х.Билэгжаргал нарын трио буюу гурвал зохиол тоглох юм. Морин хийлч Д.Амармэндийг зөвхөн энэ тоглолтод оролцуулахаар Италиас урьж авчирч байгаа юм (Онгоцны ирж, очих тийзийг нь тус сангаас өгч явуулж авчирсан. Хөгжим нь бас нэг суудалд “суудаг”). Одоо хамтраад бэлтгэлээ хийж байна. Төгөлдөр хуурч Ц.Шаравцэрэн бол ХБК-ийн сайн багш нарын нэг, гадаадын олон газар сурч боловсорсон сайхан уран бүтээлч. Тоглолтын хоёр дахь хэсэгт Жийгээ ганцхан зохиол тоглоно. Тэр нь хөгжмийн зохиолч Ш.Өлзийбаярын морин хуур, симфони найралхөгжимд зориулсан концерт, Дан хөгжмийн зохиолд гаршиж яваа шилдэг хөгжмийн зохиолчийн шинэ бүтээлийн анхны тоглолт болох гэж байна. Ардын жүжигчин Ц.Батчулуун багш симфони найрал хөгжим удирдана, урлагийн гавьяат зүтгэлтэн Чулууны Чинбат зөвлөхөөр ажиллаж байна гэж сурталчилсан. Чулууны гэж тодотгож хэлэхгүй бол хүмүүс нөгөө Чинбаттай андуураад байсан.
-Сайн мэдээлэл, сайн сурталчилгаа байна шүү дээ…
-Тэгсэн нэг хүн “Би яагаад Жигжиддорж гэж тэр залуу хүүгийн тоглолтыг 50 мянгаар үзэх ёстой вэ. Юугаар гайхамшигтай вэ” гэж асуулаа. Тэр бизнесмэн хүн л дээ. Тэгэхэд нь та нар шиг бизнесийн шинэ санааны эрэл хайгуул хийж байдаг хүмүүст өдөр тутам сууж байдаг ширээний чинь араас юу ч төрөхгүй, сайхан хөгжимчдийн сайн тоглолт үзэж, хөгжим сонсч төвлөрч суухад чинь харин ямар ч мэргэн санаа орж ирж болно гэж хэлсэн чинь инээгээд за за, үзье гэсэн.
-Та итгүүлэн үнэмшүүлэх талд сайн юм байна…
-“Хас”-ын Ганхуяг нэлээд хэдэн тасалбар авсан юм. Дараахан нь дахиад нэмж авъя гэж залгахад нь дууссан гэлээ. Тэгтэл мань хүн “Хөөх, та Дуурийн театрыг дүүргэчихэж байгаа юм уу. Хөрөнгийн биржид хувьцаа зарвал гүйцэгдэхгүй хүн юм биш үү” гэж хэлсэн. Залуусын, симфони найрал хөгжмийг гялалзтал тоглож байгааг харах тусам бүх тасалбарыг борлуулах хэрэгтэй, ийм гоё тоглолтыг аль болох олон хүнд үзүүлэх хэрэгтэй гэж бодогдоод шаргуу ажилласан. Болдог л юм байна. Бас мэдээлэл түгээж явахад манай сангийн талаар хүмүүс ам сайтай байдгийг сонсоод баярлаж байлаа. Намайг “Инээмсэглэл” хамтлагийн хүн гэж боддог нь ч байх юм. Тоглолтыг нь зохион байгуулсантай холбоотой ийм ойлголт мэр сэр байдаг бололтой. Бас хөгжимчдийн хэн нь хэн бэ гэдгийг мэдэхгүй ч “Өө, “Төгөлдөр” сан гоё тоглолт хийдэг гээд үзье үзье гэж ч байсан. Гэх мэтчилэн адал явдал сонин сайхан ихтэйгээр морин хуурч Н.Жигжиддоржийнхоо тоглолтыг зохион байгуулж өглөө.
-Таны дараагийн гоё арга хэмжээ юу байх бол?
-Бодож байгаа зүйл бий
-Тэр төсөлд тань амжилт хүсье.
Баярлалаа.
Р.ОЮУНЖАРГАЛ
