Цагдаагийн ерөнхий газрын Мэдээлэл, шуурхай удирдлагын төв өчигдөр сэтгүүлчдэд мэдээлэл хийсэн бөгөөд 101, 102, 103, 105 тусгай дугааруудыг хариуцсан хэлтсийн дарга нар оролцжээ.
Тусгай дугааруудад өдөрт дунджаар гурван мянга орчим дуудлага ирдэг бөгөөд 30 орчим хувь нь хуурамч дуудлага байдаг аж. Түүнчлэн сар шиний өдрүүдэд 61079 дуудлага ирсэн бөгөөд 68 хувь нь хуурамч байжээ.
Хуурамч дуудлага албан хаагчдын ажилд саад учруулдаг учраас үүний таслан зогсоохын тулд дунд сургуулийн хичээлийн хөтөлбөрт оруулж, хүүхдүүдийг ухамсарлуулах ажлыг хийхээр төлөвлөж байгаа аж.
Үүрэн телефоны компаниудтай хамтран олон дахин хуурамч дуудлага ирүүлсэн утасны дугаарыг хаалгах арга хэмжээ авахаар Харилцаа холбооны зохицуулах газартай ярилцаж байгаа гэнэ. Мөн олон дахин дуудлага ирүүлсэн дугааруудыг бүртгэж автомат хариулагчтай холбох арга хэмжээ авахаар төлөвлөжээ.
Тусгай дугааруудад дуудлага өгч байгаа хүмүүсийн яриа цаг минуттайгаа бичигдэж үлддэг байна.
