“Хобби” булангийн энэ удаагийн зочноор “Эмоци” продакшны жүжигчин Г.Нарансолонгыг урилаа.
–Таныг хүүхэлдэй цуглуулдаг гэж сонссон. Хэр арвин цуглуулгатай вэ?
-Тоолж үзээгүй юм байна. Гэхдээ нэлээд бий. Охин бүр багадаа хүүхэлдэйгээр тоглодог шүү дээ. Миний хувьд ч ялгаагүй үеийнхээ найзуудтай хүүхэлдэйгээр тоглож, үсийг нь самнаж, хувцас оёж өгдөг байсан. Харин томрох тусам сонирхол маань арай өөрчлөгдөж, хобби, урлаг тал руугаа болсон гэхүү дээ.
–Ямар хүүхэлдэй цуглуулдаг вэ?
-Модон хүүхэлдэй цуглуулах дуртай. Ялангуяа монгол хийцтэй, үндэсний хувцастай, хос хүүхэлдэй олон бий. Би хааяа бэлэг дурсгалын дэлгүүр орохдоо хүүхэлдэй сонирхоод зогсчихдог юм.
–Яагаад заавал хос хүүхэлдэй авдаг юм бэ?
-Хос хүүхэлдэйг аз жаргал, элэг бүтэн амьдралыг бэлгэдэж авдаг юм. Хүн бүхэн энэ амьдралыг хосоороо туулдаг шүү дээ. Тэр утгаараа хөөрхөн, хос хүүхэлдэй гэрт байхад ивээлтэй юм болов уу гэж боддог юм.
–Тэмка танд хүүхэлдэй авч өгдөг үү?
-Ханийн маань авч өгсөн хүүхэлдэй бий. Миний сонирхлыг мэддэг учраас тэмдэглэлт өдрүүдээр бэлэглэнэ. Зөвхөн нөхөр ч гэлтгүй найз нөхөд, хайртай дотны хүмүүс маань мэддэг. Тиймээс тэд цуглуулгыг минь арвижуулах нь элбэг шүү.
–Гадаадаас авсан хүүхэлдэй бий юу?
-Тоглолтоор явахдаа авсан хүүхэлдэйнүүд бий. Гэхдээ манайхан өөрсдөө хүүхэлдэйг сайн хийдэг юм билээ. Би хаана ч давтагдахааргүй хийцтэй, ялангуяа монгол шинжийг агуулсан хүүхэлдэйнд дуртай. Манай бүх бэлэг дурсгалын дэлгүүрт тийм хүүхэлдэй байгаа шүү дээ.
–Хамгийн үнэтэй авсан хүүхэлдэйгээ сонирхуулаач?
-Би өөрийнхөө сонирхлыг хамгийн авсаархан, хямдхан гэж боддог шүү. Их мөнгө шаарддаггүй юм. Хүүхэлдэй бүхэн харилцан адилгүй үнэтэй ч тэнгэрт хадсан үнээр хүүхэлдэй авч байснаа санахгүй байна.
Ч.ГАНТУЛГА
