УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга Д.Батцогт, болон Д.Сарангэрэл, Л.Эрдэнэчимэг нарын гишүүд Сонгинохайрхан дүүргийн X хорооны нутаг дэвсгэрт байрлах “Хүүхэд харах үйлчилгээний загвар төв”-тэй танилцлаа.
Энэхүү төв нь өнгөрсөн гуравдугаар сарын 20-нд нээгдсэн аж.
Одоогоор ахлах болон туслах багш, мэргэжлийн тогоочтой 15 хүүхэд хүлээн авдаг байна. Хүүхдүүд өдөрт дөрвөөс таван удаа хооллодог. Хүнсний эрүүл, аюулгүй байдалд анхаарч эцэг эхчүүдийн төлөөлөл багшийн хамт хүнсний бүтээгдэхүүн худалдан авах ажилд долоо хоног бүр оролццог тухай “Хүүхэд харах үйлчилгээний загвар төв”-ийн эрхлэгч, багш Д.Өлзийтэгш тус байнгын хорооны гишүүдэд танилцуулжээ.
Байнгын хороон дарга Д.Батцогт Сургуулийн өмнөх боловсролын тухай хуульд нэмэлт өөрчлөлт оруулах тухай хуулийг хурдавчилж цэцэрлэгт хамрагдаж чадалгүй цоожтой хаалганы цаана өнжиж байгаа хүүхдүүдийг ийм загвар төвд хүмүүжих бололцоог хангах хэрэгтэйг энэ үеэр хэлж байв.
Б.СЭЛЭНГЭ /ӨДРИЙН ШУУДАН/
