Тамхины хайрцган дээрх муудаж шарласан шүд, өвчилсөн уушги болон бусад сануулах бичээс бүхий зургийг тамхичид тоохоо болиод удаж байна. Тэгвэл АНУ-ын хууль тогтоогчид тамхины аюулыг донтогчдод бүрэн ойлгуулахын тулд шинэ зураг, санамжтайгаар тамхиа үйлдвэрлэхийг ийм үйл ажиллагаа явуулдаг компанийн эздэд үүрэг болгохоор хэлэлцэж эхэлсэн гэнэ. Тамхинд хүнд хортой маш олон төрлийн химийн нэгдэл байдаг. Тэдгээр хор хүний бие эрхтэнд орж олон төрлийн өвчний эх үүсвэр болдог. Харин тамхины хайрцган дээрх “Тамхи эрүүл мэндэд хортой”, “Тамхи байгаль орчныг бохируулна” зэрэг санамж бичиг болон зураг тамхийг хүнд хэр их хортойг мэдүүлэхэд нэлээд учир дутагдалтай байдгийг хүмүүс хэлжээ. Үүний дагуу сэтгэл сэрдхийлгэм ч гэсэн тамхины бодит аюулыг тамхичдад илүү ойлгуулах үүднээс зураг, санамж бичгийг нь “Тамхи татах нь хараа муудаж, сохрох шалтгаан болдог” гэж өөрчилжээ. Дашрамд дурдахад тамхи татсанаар Та никотиноос гадна устөрөгчийн цианид, хүнцэл, жоомны хор, шавьжны хор, цагаан шоргоолжны хор, цагаан эрвээхэйн өндөг устгагч, машины утаа, цэнэг хураагуур, шал цэвэрлэгч, будаг арилгагч (ацетон), асаагуурын шингэн зэрэг 4000 орчим төрлийн химийн хорт нэгдлээр амьсгалдаг байна.
www.UNEN.mn