Хүүхэд олдсон цагаас л эхлэн та зөв хооллож сурах хэрэгтэй. Зөв хооллох гэдэг таныг тусгай хоол хэрэглэ гэж байгаа хэрэг биш. Харин зөв хүнс худалдан авч, боловсруулж, эрүүл хоол бэлтгэнэ гэсэн үг юм. Зөв хоол нь олон төрлийн амин дэм агуулсан тэжээллэг байх ёстой.
Таны хооллолтын байдлаас хүүхдийн өсөлт хөгжил шууд хамаарна. Хэвлий дэх хүүхэд томрохын хэрээр эхийн бие махбод адилхан жин нэмдэг. Жирэмсэн үед дунджаар 10-12 кг нэмнэ. 24-32 долоо хоногтойд хамгийн эрчимтэй нэмэгддэг. Залуу эхчүүд таргалж байна гээд хоолоо сойх нь хялбар байж болох ч танаас шим тэжээл авч томорч байгаа хүүхдэд тань маш муугаар нөлөөлдөг.
Таны таргалж байгаа шалтгаан нь хооллосноос огт биш харин томорсон умай, өдөр хоногоор өсөж байгаа хүүхэд, ураг орчмын шингэн эзэлдэг. Мөн цусны эс үйлдвэрлэлт, хэмжээ ихсэнэ. Хөхний сүүг боловсруулахын тулд өөх тосны хуримтлал төрсний дараа хөхний сүү ялгарахад зарцуулагдаж аажмаар багасна. Хэт их жин нэмэлт нь төрөх явцыг хүндрүүлдэг.
Иймээс хүндрэлгүй мөн эрүүл хүүхэд төрүүлэхийн тулд зайлшгүй зөв баланстай төрөл бүрийн хоол хэрэгтэй. Хоол тэжээлийн дутагдалтай байдал нь хүүхдийн тархины хөгжилд муу нөлөөтэй. Дутуу дулимаг хооллосноос хүүхдийн оюун ухааны хөгжил саатах, улмаар хомсдолтой ч төрж болзошгүй. Мөн хүүхэд жин дутуу төрөх, зулбах, амьдрах чадваргүй, бие махбодын болоод сэтгэцийн эмгэг гаж хөгжилтэй төрөх тохиолдол гардаг байна. Энэ нь тураалтай, жин багатай эхчүүдэд тохиолддог.
Жирэмсэн үед зайлсхийх хүнс
– Удаан хадгалсан хүнс
– Зуны цагт өөх тос ихтэй зүйлс
– Хэт бодовсруулалт хийсэн хүнс / цагаан гурилын бүтээгдэхүүн/
– Өнгө оруулсан хүнс
– Чихэрлэг ихтэй хүнс
-Хийжүүлсэн чихэрлэг ундаа
– Өтгөн кофе, амт ихтэй цай
– Түүхий сүү, ариутгаагүй өндөг, цөцгий
– Шүүрхий мах
– Жимс, жимсгэний угаахгүй болон дутуу угааж хэрэглэхээс зайлсхийх хэрэгтэй аж.
