Вашингтоны их сургууль болон Токиогийн их сургуулийн эрдэмтэд хамтран дэлхийн жингийн илүүдэлтэй буюу таргалалттай хүн амын судалгаа хийж, дэлхийн таргалалттай хүн амын тоо сүүлийн 30 жилд 30% нэмэгдэж, 2 тэмбум 100 саяд хүрсэн тухай мэдээллээ. Тэд судалгааны үр дүнгийн тайлангаа 5 сарын 29-нд Английн “Ланцет” анагаах ухааны сэтгүүлд нийтэлжээ.
Олон улсын судалгааны баг хүн амын эрүүл мэндийн 1800 статистик баримт болон түгээмэл тархацтай өвчний судалгаа зэргийг үндэслэж, дэлхийн 180 орны хүн амын 2013 оны эрүүл мэндийн байдалд дүн шинжилгээ хийжээ. Хүний биеийн жингийн индекс (BMI) 25-аас хэтэрвэл жингийн илүүдэлтэй буюу “таргалалттай” гэж үздэг.
Судалгаагаар дэлхийн насанд хүрсэн нийт эрэгтэйчүүдийн 37%, нийт эмэгтэйчүүдийн 38% нь “таргалалттай” байгааг илрүүлжээ. 1980 онтой харьцуулбал, дэлхийн жингийн илүүдэлтэй насанд хүрэгчдийн тоо 28%, насанд хүрээгүй хүүхдүүдийн тоо 47%-аар тус тус нэмэгджээ.
Дэлхийн хөгжиж буй улс оронд таргалалттай хүн амын тоо нэмэгдэх хандлагатай байгааг мөн судалгаа харуулсан байна. Хүний биеийн жингийн индекс (BMI) 30-аас хэтэрвэл “таргалалтын өвчин”-д нэрвэгдсэн гэж үздэг. Тэгвэл Америк, Хятад, Энэтхэг, Орос, Бразил зэрэг 10 улс орны “таргалалт өвчин”-тэй хүн амын тоо дэлхийн нийт хэмжээний талаас илүү хувийг эзэлж байна.
“Одоогоор дэлхийн нэг ч улс таргалалтын өвчлөлтийг бууруулах талаар амжилтад хүрээгүй байна. Дэлхийн бүх улс орны засгийн газар энэ өвчнийг анхааралдаа авч, үр дүнтэй тэмцэх хэрэгтэй” гэж Английн Оксфорд их сургуулийн профессор Макферсон уриалж байна.
/Орчуулсан: Э.Эрдэнэсувд/