Үргэлж шинийг эрэлхийлж, хачин сонин сюрпризээр дүүрэн явдаг урлагийн залуус Олон улсын эмэгтэйчүүдийн эрхийг хамгаалах өдрөөр эхнэрээ хэрхэн баярлуулдаг тухай сонирхлоо.
Жүжигчин Б.Бат-Өлзий:
-Яг тодорхой төлөвлөсөн зүйл байхгүй. Гэхдээ жил бүрийн энэ баярыг гэр бүлийнхээ хүрээнд тэмдэглэдэг. Эхнэртээ цэцэг өгч, дуртай хоолыг нь хийж, ширээ засч баярлуулдаг л даа.
Дуучин Л.Тайванбат:
-Дуртай бэлгийг нь өгөхийг хичээдэг. Ханьтайгаа хамт 20-иод жил амьдарч байна. Энэ хугацаанд нэг л янзаар баярлуулж ирсэн. Тэр нь юу вэ гэвэл, сарнай цэцгийн чимэглэлтэй гурван давхар баярын бялуу. Жил бүр эхнэртээ зориулж захиалгаар хийлгэдэг юм. Тийм болохоор өөрт нь барих хамгийн том бэлгийг одоо бүр мэддэг болчихсон.
Хөгжмийн зохиолч Л.Балхжав:
-Хүссэн бүхнийг нь хийхийг зорьдог. Бас өөрийнхөө хэмжээнд түүндээ бэлэг сонгоно л доо. Бид хоёрын хувьд, эмэгтэйчүүдийн баярыг гэр бүлийн баяр болгохыг хүсч тэмдэглэдэг. Хоёр хүүтэйгээ хамт баярын ширээ засаад энэ гэрт байгаа ганц эмэгтэйгээ баярлуулах гэж хэрэндээ л төлөвлөгөө боловсруулна даа. Гэхдээ бид гурав хийж байгаа ажлаа дор бүрнээ амжилттай явуулж чадаж байвал эхнэр маань үргэлж баяртай байдаг юм.
Жүжигчин Д.Бямбацогт:
-Сюрприз болгож дуртай бэлгийг нь авч өгдөг. Хол байвал нандин сэтгэлийн нууцаа дэлгэсэн гоё үгтэй шүлэг бичиж, мессеж явуулна аа. Бэлэг сонгох тал дээр өөрийнх нь хэрэгцээг судалж үзнэ шүү. Би урьд нь эхнэртээ гоо сайхны бүтээгдэхүүн, бэлэг сэлт гээд олон зүйл сонгож байсан юм.
Дуучин Б.Дашдондог:
-Мэдээж, эхнэртээ маш сайхан бэлэг авч өгнө. Бас найз нөхөдтэйгөө хамт сууж, бүсгүйчүүдээ баярлуулна даа. Эхнэртээ бэлэглэх сюрприз гэвэл зөндөө л байна. Баярын бялуу, баглаа цэцэг, үнэртэй ус, гоо сайхны хэрэглэл гээд л…
Жүжигчин П.Эрдэнэзаан:
-Одоохондоо бодсон юм байхгүй л дээ. Гэхдээ ер нь, энэ баяраар зав гарвал эхнэртэйгээ хамт ресторанд тухалдаг юм. Хоол хийх бол миний хобби гэж болно шүү. Тийм болохоор эхнэртээ гарынхаа хоолоор бэлэг барих дуртай. Тэгэхдээ бүр тусгай жор, шинэ хэлбэр загвар бүхий их сайхан өнгө үзэмжтэй амтлаг хоолоор дайлдаг. Эхнэр маань ч миний өгөх бэлгийг андахгүй мэддэг болчихсон л доо.
Найруулагч Ц.Хүсэлбаатар:
-Эмэгтэйчүүдийн баярыг янз янзаар л тэмдэглэдэг дээ. Гэхдээ хоёулаа завгүй, их ажилтай байдаг учраас түүнийгээ тухтайхан баярлуулчих чөлөө олддоггүй юм. Ямар ч байсан, эхнэр маань цуглуулгадаа нэмэрлэчих зүйл авах дуртайг нь мэднэ. Тиймээс эхнэрийнхээ зааны цуглуулгыг чимэглэх дажгүй баримал хайх хэрэг гарах нь дээ.
“Донж” төвийн тэргүүн Б.Төгөлдөр:
-Эхнэрээ сайхан баярлуулахыг хүсдэггүй эр хүн гэж хаа байхав. Сэтгэлд нь хүртэл баярлуулж, нэг өдрийг дурсгалтай сайхан өнгөрөөвөл болох нь тэр. Тийм болохоор өөрийнхөө санаанд нийцсэн бэлгийг донж, төрхийг нь тааруулаад цуглуулна даа. Мэдээж тансаг ширээ, баярын мэндчилгээ дэвшүүлсэн үгтэй амтат бялуу, гоёмсог цэцэг байх нь ойлгомжтой хэрэг.
Р.ЕСҮЙ