Нас ахих нь хэнд ч таатай санагддаггүй. Гэвч цаг хугацааг зогсоох, хөгшрөлтөөс нуугдах аргыг олсон хүн үгүй л байна. Нөгөө талаар, цаг хугацаа улирахын хэрээр бүсгүй та улам ухаан сууж, сэтгэл татам хатагтай болсоор байдаг. “Дунд насны хямрал” хэнийг ч ялгадаггүй учраас үүнтэй эвлэрэхийг хүсээгүй зарим нь 19 настангуудтай “барьцаж”, хэт задгай хувцаслах, зохимжгүй будалт хийлгэх нь ч бий. Америкийн эмэгтэйчүүдийн шилдэг сэтгүүл “Health” эрхэмсэг хатагтайн санамсаргүй алдаануудыг нэрлэжээ. Эдгээрийн нэг нь таны зуршил юм биш биз?
Өөрчлөлт хийхгүй байх
Та арван жилийн өмнөх нүүр будалт, үс засалтдаа одоо ч үнэнч байдаг уу? Эсвэл арьс арчилгааны нэг л төрлийн бүтээгдэхүүн хэрэглэсээр байна уу? Тэгвэл яг одоо өөрчлөх цаг. Дунд насны эмэгтэйчүүдийн арьс аажмаар суларч эхэлдэг учраас эд эсийг төлжүүлж, сулралтыг удаашруулж, арьс чангаруулах бүтээгдэхүүнүүд тогтмол хэрэглэх зайлшгүй шаардлагатай. Тиймээс гоо сайханч, эмчид хандан ямар бүтээгдэхүүн тохирохыг асуугаарай.
Хувцаслалтдаа хөрөнгө оруул
Залуу охидоос илүүтэй хатагтай нар л хувцас загварыг илүүтэй сонирхох нь зөв. Учир нь 20 настай байхад хамгийн хямд хувцас өмссөн ч сайхан хэвээр харагдах бол 50 дөхөж буй эмэгтэй чанартай, загварлаг, өөрт нь төгс зохицсон хувцаслах нь чухал болохыг онцолж байна.
Залуу байсан үетэйгээ харьцуулах
Та байнга “Би залуу байхдаа… Тэр цаг сайхан байж” гэх мэт уйтгартай зүйлсийг ярьдаг уу? Тийм бол эдгээрийг үгийн сангаасаа хасах цаг болжээ. Үрчлээ тань ч амьдралын мөр, дурсамж, туршлага, мэдлэгийг илтгэдэг. Хамгийн гол нь арван жилийн өмнөх өөрийгөө буцаан авчрах биш, одоогийн нас, ухаандаа таарахуйц эрүүл бие бялдартай байх нь чухал.
Дасгалуудыг алгасах
Хүн нас ахиж, хөгшрөхийн хэрээр зүрх судасны өвчин, таргалалт, нуруу, үе мөчний өвчнөөр шаналах магадлал ихэсдэг. Гэхдээ үүнээс урьдчилан сэргийлэх боломж танд бий. Энэ бол хөдөлгөөн. Хэрвээ та фитнест явах, гүйх дургүй бол усанд сэлэх, иога, түргэн алхалтаар хичээллэвэл цаашид үүсэх эрсдэлүүдээс өөрийгөө хамгаалж буй хэрэг болно.
Амны хөндийн эрүүл мэндийг умартах
Аажмаар унаж буй үс, өглөө сэрэхэд тодрох бяцхан үрчлээнд хэт анхаарал хандуулж, амны хөндий, шүдний эрүүл мэндээ умартдаг нь хамгийн түгээмэл алдааны нэг. Хиймэл эсвэл өнгөө алдсан шүд саарал үснээс ч илүү хөгшин харагдуулдаг. Тиймээс сар бүр шүдний эмчид очиж, зөвлөгөө аваарай.
