Хайрын цоож гэж та өмнө нь сонсч байсан уу. Энэ нь хосууд өөрсдийн хайр дурлалыг илэрхийлэхийн тулд зүрхэн болон янз бүрийн хэлбэртэй цоожийг гүүр, хашаа гэх мэт олон нийтийн газарт зүүж үлдээдэг нэг төрлийн бэлгэдлийн үйл юм. Ингэснээрээ тэдний хайр дурлал цоожтой мэт мөнхөд бат бэх оршин тогтнохыг бэлгэддэг.
Ихэнх тохиолдолд цоожин дээр хосууд нэр, нэрийн товчлолоо бичиж мөнхийн хайраа шивнэсэн байдаг. 2000 оноос эхлэн энэ үйлдэл нь дэлхийн олон хотод дэлгэрэх болсон бөгөөд өдгөө зарим хотын заавал очих газруудын тоонд ч багтаад байгаа аж. Харин манай оронд энэ нь мөн түгээмэл үзэгдэл болоод байна.
Сүүлийн үед залуучууд энэ аргаар өөрсдийн хайр дурлалыг мөнхжүүлэх сонирхолтой болсон. Тэдний хайрын илэрхийлэл болсон “хайрын цоожнууд” Улаанбаатар хотноо мэр сэр үзэгдэх болжээ. Тодруулбал, Зайсангийн гүүр, Үндэсний соёл амралтын хүрээлэн, Залуучуудын холбооны урд талд хосууд цоожоо өлгөжээ.
Энэ зан үйлийн түүх 100 жилийн өмнөөс эхэлнэ. Дэлхийн нэгдүгээр дайны тухай Сербийн домогт гардгаар Серб улсын Врнячка Баня хотын Нада гэх эмэгтэй багш Реля нэгэн офицерт дурлаж сүй тавьдаг. Төд удалгүй Реля Грек рүү дайнд явж тэндхийн бүсгүйд дурлана. Үүнээс болоод Реля Нада хоёр сүйгээ цуцалснаар Нада сэтгэл санаагаар унаж нас баржээ.
Реляг явсны дараа Нада хайр сэтгэлээ мөнх байг хэмээн залбирч түүнтэйгээ уулздаг байсан газрынхаа төмөр замын хашаанд цоож өлгөж өөрсдийн нэрийг, бичиж өлгөдөг байжээ. Европын орнуудаар уг цоожны зан үйл нь илүү түгээмэл байдаг бөгөөд тэндхийн үзэсгэлэнтэй хотуудын гүүрэн дээрээс та хэдэн мянган хосын хайрын бэлэг тэмдгийг олж харж болох юм.
Жишээлбэл, үзэсгэлэнт “Sydney Harbour Bridge” нь Сидней хотын өнгө төрх болсон архитектурын гайхамшигт жишгийг харуулсан алдартай гүүр бөгөөд энэ гүүрэн дээр шинэхэн хосууд хайр дурлалын бэлгэдлээ үлдээдэг зуршил тогтсон гэхэд хилсдэхгүй. Зарим газрын гүүр нь залуусын хайрын цоожноос болоод нурах дээрээ тулж хотын захиргаанаас уг үйлдлийг зогсоох тушаал ч гаргаад байгаа ажээ.
Б.Номин
Эх сурвалж: