“Хобби” буланд гавьяат жүжигчин, дуучин С.Батсүхийг урилаа. Тэрээр хөөрөг болон бугуйн цаг, бугуйвч цуглуулдаг юм байна.
–Таныг хөөрөг болон бугуйн цагны цуглуулгатай гэж сонссон. Хэзээнээс цуглуулж эхэлсэн бэ?
-Эр хүн бүхэн сайхан хөөргөөр гангарахыг хүсдэг. Би багаасаа хөөрөг сонирхдог, барьдаг байлаа. Монгол эрчүүд зан заншлаа дээдэлдэг уламжлалтай. Тиймээс бүгд хөөргөндөө анхаардаг байх. Надад чамин хийцтэй 10 гаруй хөөрөг, 20 гаруй бугуйвч, бий.
–Хамгийн сүүлд ямар хөөрөг авсан бэ?
-Нил ягаан болор хөөрөг авсан. Барихад их эвтэйхэн юм билээ. Би хөөрөг том, жижигтээ биш чамин хийц, загвартай байвал боллоо гэж үздэг. Зарим хүн том, данхгар хөөргөөр зиндаархдаг. Миний хувьд харин ч эсрэгээрээ.
–Хөөрөг гэхээр их үнэтэй сонсогдож байна. Ер нь цуглуулгадаа хичнээн төгрөг зарцуулсан бол?
-Миний хөөрөгнүүд харьцангуй бага үнэтэй. Тэнгэр хадсан үнээр хөөрөг авсанаа санахгүй байна. Би хийц, загварыг нь харж байгаад боломжийн үнэтэйг нь сонгодог.
–Хөөргийг олон жил хадгалахаар өнгөний хувьд ч юм уу ямар нэгэн өөрчлөлт ордог уу?
-Зарим өнгө нь хувирдаг хөөрөгнүүд өөрчлөгддөг л юм билээ. Гэхдээ онцын ялгаа гардаггүй. Байнга шүүгээнд хадгалвал өнгөний хувьд өөр болж магадгүй. Зарим хөөрөг агаартай газар тавихад гялалзаад байх тохиолдол бий. Тэр бүхэн хадгалалтаас л шалтгаална.
–Та хөөрөгнөөс гадна бугуйвчаар гангардаг. Одоо ямар бугуйвч зүүж байгаа вэ?
-Би залуугаасаа бугуйвч, бөгж зүүдэг байсан. Урлагийн хүн учраас гадаад үзэмжиндээ анхаарах хэрэгтэй. Одоо бол цэвэр алтан бугуйвч зүүдэг.
Ч.ГАНТУЛГА
