Харах нүдний баясгалан болдог үзэсгэлэнт цээнэ буюу “peony”-г “цэцэгсийн хаан”-аар өргөмжилдөг. Эмэгтэй хүнд, ялангуяа түүний хайр сэтгэлд онцгой ээлтэй хэмээгддэг энэ цэцгийг өөрийн гараар тарих юм уу, цээнэ цэцгийг дүрсэлсэн зураг бэлэг дурсгалын зүйлийг өрөөндөө тавьбал ханийн сайнтай учирна гэж билэгшээдэг юм.
Харин аль хэдийн гэрлэсэн хосын хувьд унтлагын өрөөндөө “peony”-г авчрах нь, унтраад байсан хайр сэтгэлийг дүрэлзүүлдэг шидтэй гэдэг юм билээ. Хэрэв чи энэ цэцгээр өрөөгөө чимэхийг хүсч байгаа ч, одоохондоо хэрхэн тариалахаа мэдэхгүй байвал Гоолингоо чамд тусалж, цаасаар хийгдэх боловч амьд мэт үзэсгэлэнтэй харагддаг “мөнхийн наст” цээнийг хэрхэн урлахыг зааж өгье.
1. Хэрэглэгдэх материал: Цэцгийн баглаа бооход ашиглагддаг сальфетка мэт зөөлөн, зузаавтар цаас буюу cream paper (ийм цаасыг цэцгийн дэлгүүрүүдээр 1500 орчим төгрөгөөр худалддаг), ногоон өнгийн зузаавтар цаас, цавуу, цэцэгний иш хийх төмөр савх.
2. Төмөр савханыхаа үзүүрийг зурган дээрх шиг цаасаараа ороож цэцэгний их биеийг бэлэн болгоно. Дараа нь зөөлөн цааснаасаа цэцэгний дэлбээний хэлбэртэй хэд хэдэн цаас хайчилж, бэлэн болгосон их биеэ тойруулан нааж суурийг бэлтгэнэ.
3. Цэцгээ том цоморлигтой болгохын тулд зөөлөн цаасаа хэд хэдээр нь давхарлаж, үдэж байгаад дэлбээний хэлбэр зурж байгаад хайчилна. Ингэсний дараа чи нилээд олон ширхэг дэлбээтэй болно. Дэлбээнүүдээ 3, 3-аар нь багцлаад, үзүүрүүдийг нь нааж тавина. Багц дэлбээнүүдээ өмнө нь бэлдэж тавьсан их биен дээрээ мөн адил тойруулж наана.
4. Ногоон өнгийн зузаавтар цаасаараа эхлээд төмөр ишээ бүрнэ. Дараа нь зургийн дагуу навч хайчлаад цэцэгнийхээ доор наагаарай.
5. Ингээд л амьд мэт цэцэг маань бэлэн боллоо. Хэд хэдэн ширхэгийг хийгээд хүнд бэлэглэх юм уу, гэрийнхээ ваарыг гоёорой. Тоорын ягаан, цагаан, улаан зэрэг ямар ч өнгийн цаасаар хийж болно.
Goolingoo.mn
