Нэг хүүхдийн бодлого барьдаг Хятад улсад жирэмсэн эхэд “хийсвэр” хагалгаа хийх нь бичигдээгүй хууль болсон мэт байдгийг судалгааны томоохон байгууллагууд гэрчилдэг.
Улмаар Европын орнуудад хийсвэр хийлгэх тохиолдлыг судлахад 20 хувьтай байгаа аж. Тэгвэл манай улсын хувьд сүүлийн жилүүдэд хийсвэр хийлгэх явдал эрс нэмэгдэж байгааг мэргэжилтэн, судлаачид хэлж байна.
Энэ нь эмч нар хийгээд эмнэлгүүдэд нэг талаасаа ашигтай, эрсдэл багатай мэт зүйлч тухайн эхэд хожмын хор уршгийг авчрах аюултай зүйл юм. Ер нь эртнээс манай улсын эмнэлгийн эх баригчид хийсвэр хийлгэх тал дээр санал нэгддэггүй, дэмждэггүй талтай байсан ч өдгөө өөрсдийнхөө ажлыг хөнгөвчлөх гэж, ашиг орлогоо бодож аль болох л хийсвэр хагалгаа хийлгэх сонирхолтой болчихожээ.
Үүн дээр иргэд ч санал нэгдэж байгаа юм. Мөн жирэмсэн эхчүүд өөрсдөө өвдөлтөөс айж, амар хялбараар төрөх аргыг илүүд үзэх болж. Өөрөөр хэлбэл, өвдөлтөөс айсан залуу эхчүүд хийсвэр хийлгэж хүүхдээ төрүүлдэг явдал эрс нэмэгдэж байгаа юм.
Тэгвэл энэ бүхэн эхэд эргээд ямар хор уршигтай, цаашлаад монголын хүн амаа өсгөх бодлогод хэрхэн сөргөөр нөлөөлдгийг тэд төдийлөн мэдэхгүй байгаа бололтой.
Эхний ээлжинд хүүхдээ хийсвэрээр төрүүлсэн эх дахин өөрөөрөө төрөх боломжийг алддагийг эмч мэргэжилтнүүд хэлж байна. Өөрөөр хэлбэл, анхны хүүхдээ хийсвэрээр төрүүлсэн эх дараагийн хүүхдээ өөрөөрөө төрүүлэх боломж бараг л байхгүй болдог байна.
Цаашлаад хоёр дахь хүүхдээ дахин хийсвэрээр төрүүлсэн эх дараа дараагийн хүүхдийн талаар бодоход ч хэцүү нөхцөл байдал үүсэх юм. Баримтаар хэлэхэд, давтан хийсвэр хийлгэсэн эмэгтэйчүүдийн 40 хувь нь л дахин жирэмслэх магадлалтай байдаг аж. Ингэснээр хийсвэрээр хагалгаанд орсон эх аз байвал гурван хүүхэдтэй, азгүйтвэл 2 эсвэл нэг хүүхэд л төрүүлж чадах юм.
Адаглаад хийсвэр хагалгаагаар төрсний дараа эмнэлэгт байх хугацаа болон эхийн тэнхрэх, эмчлүүлэх хугацаа нь урт байдаг.
Гэхдээ үнэхээр тухайн эх хүндрэлтэй төрөх, хүүхдэд аюулгүй нөхцөл байдал үүсвэл эмч нар шаардлагатай бүх арга хэмжээг авч хийсвэрээр төрүүлэхээс өөр аргагүй. Гэвч энэ байдлаас илүү манай эхчүүд өөрсдөө сайн дураар хийсвэрээр төрөөд байдаг гэдэг л асуудал болоод байгаа юм.
Ганцхан жишээ дурдахад, Клиникийн нэгдүгээр амаржих газарт энэ оны нэгдүгээр улиралд 3723 эх амаржиж 3744 хүүхэд төрсний 28.9 хувийг нь мэс заслын аргаар төрүүлжээ.
Энэ мэтээр эхчүүд хийсвэрээр төрөхийг илүүд үзээд байвал нэг хүүхдийн бодлого баримталдаг урд хөршөөс ялгарах юмгүй болох нь ээ. Тиймээс эхчүүд минь аль чадахаараа өөрөөрөө төрөх нь зүйтэй шүү.
Дашрамд хэлэхэд, хийсвэр хагалгааг улсын эмнэлэгт 800 мянган төгрөгөөр хийж байгаа бол хувийн эмнэлгүүдэд доод тал нь 1.5-2 сая төгрөгөөр хийх болсон байна.
24tsag.mn
