“Гурван охин” хамтлаг өнөөдөр, маргааш тоглолтоо хийх гэж байгаатай холбогдуулан хамтлагийнхантай уулзаж ярилцлаа.
ТОГЛОЛТЫН ТАЛААР: ДОРГИО ДИСКО ТЭСЛЭНЭ ДЭЭ
-Гурван охин хамтлагийн энэ удаагийн тоглолт бусад тоглолтуудаас юугаараа онцлог болох вэ?
Соло: -Юуны өмнө GoGo.mn сайтын уншигчдад энэ өдрийн мэндийг хүргэе. Манай хамтлаг 2012 онд анхны “Жинхэнэ хайр” тоглолтоо хийж байлаа.
Байгуулагдсанаасаа хойш найман жилийн хугацаанд бий болгосон уран бүтээлээ цаг хагасын амьд тоглолтонд багтаана гэдэг үнэхээр хэцүү байсан. Гэхдээ On’n Off-ийн С.Ононбат ах гайхамшигтай ажиллаж чадсан учраас үзэгч фэнүүдэд маань үнэхээр таалагдсан юм. Энэ удаагийн тоглолтыг ч С.Ононбат ах маань найруулна.
Энэ 2012 оны тоглолтоос хойш манай хамтлаг “Жинхэнэ хайр” DVD болон “Хот диско”, “Хурдлах тусам” цомгуудыг гаргалаа. Өнөөдөр /2014.08.29/ тоглогдох “Хурдлам тусам” цомгийн баярт маань дээрх хоёр цомгийн болон манай хуучны хит дуунууд дуулагдах болно.
-Хэчнээн дуу, хэдэн цагийн тоглолт байх вэ?
Соло: -Цаг хагасын тоглолт болно. Найруулгыг С.Ононбат ах маань “Marque-27” клубын орон зай, гэрэлтүүлэг, дотоод интерьерт тааруулан хийж байгаа. Доргио диско тэсэлнэ дээ /инээв. сурв/
-Тоглолтонд нь өөр бусад уран бүтээлч оролцох уу?
Анхмаа: -Тоглолтын продюсерээр Д.Болд ах маань ажиллаж байгаа. Д.Болд ахын Солотой хамтран дуулсан “Хагацаж чадах уу”, Б.Амархүүтэй хамтарсан “Зүрх чам руу” хит дуунууд дуулагдана.
ХАМТЛАГИЙН ТҮҮХ & “ГУРВАН ОХИН” ХАМТЛАГ
-Гурван охин хамтлагийн түүхийг нэг сонирхуулаач. Байгуулагдаад хэчнээн жил болж байна вэ?
Ану: -Хамтлагаа байгуулаад 10 жил боллоо. Анхны “Жинхэнэ хайр” тоглолтоо найман жилийн ойн дээрээ хийж байсан. Б.Лхагвасүрэн гуай олон жил шүлэг бичиж байгаад анхны номоо гаргаж байсан гэдэг шиг бид олон жил уран бүтээл хийж байгаад тоглолтоо тавьж байсан. Анхмаа маань орж ирснээр манай хамтлаг шинэ өнгө төрхтэй болж, хөлөө олсон юм шүү дээ /инээв.сурв/
-Анх байгуулагдсан түүх сонин байна?
Ану: -Соло бид хоёр Хөгжим бүжигт сурдаг байхдаа хамтлагаа байгуулж, дараа нь Анхмаа орж ирсэн. Анхмаа хамтлагийн гишүүн болсноор анхны хит дуу болох “Цаснаар түрүүлж үнсээч” дуугаа гаргаж байлаа. Бид үнэхээр нэг гэр бүл шиг байж чадсан. Энэ нь бидний олон жилийн нөхөрлөл, энэ хамтлагийн маань урт удаан оршин тогтнож байгаагийн илрэл юм.
-Эмэгтэйчүүдийг хамт удаан байж чаддаггүй хүмүүс гэдэг. Гэтэл Гурван охин хамтлаг яаж ийм удаан хугацаанд эв найрамдалтай, хамтран уран бүтээл хийсээр байна вэ?
Анхмаа: -Нэг нэгнийгээ сонсож, ойлгож харьцдаг. Эмэгтэй хамтлаг удаан тогтдоггүй гэсэн яриа байдаг. Нуугаад яахав, эхэндээ үл ойлголцох асуудал бидэнд тулгардаг байсан уу гэвэл байсан. Гэхдээ асуудлыг хурцатгалгүй, учир ухааныг нь олдог. Удаан яваад нэг хүн шиг болоод ирэхээр ямар нэгэн зөрчил үгүй болсон. Одоо бол ямар нэгэн асуудал барагтай бол гарахгүй дээ. Шинээр хамтлаг байгуулж байгаа дүү нартаа хэлэхэд нэгийгээ сайн сонсож сураарай. Сайн сонсогч байна гэдэг хамтлаг удаан тогтнохын үндэс юм шүү гэж хэлмээр байна.
-Цаашдаа гурван охин хамтлаг уран бүтээлээ хэдий хүртэл туурвих төлөвлөгөөтэй байна вэ?
Анхмаа: -Уран бүтээлчийн нас дуугаараа мөнх насалдаг. Авьяас ширгэж алга болно гэж барагтай бол байдаггүй гэдэг. Хэзээ хүртэл авьяас, хоолой нь байна, тэр хүртэл явна гэсэн зорилготой байгаа.
-Гурван охин хамтлаг эмээ болсон ч нэрээ солихгүй хэвээрээ л байх уу?
Соло: -Жилийн өмнө бид фэйсбүүкээрээ хамтлагийн нэрээ солих уу, яах уу гэдэг хэлэлцүүлэг явуулж байсан. Үр дүн нь юу гэж гарсан бэ гэхээр нэрээ солиод хэрэггүй гэж олонхи нь зөвлөсөн. Ойрын хэдэн жилдээ нэр солих талаар яригдахгүй. “Spice girls” хамтлаг саяхан болтол байж л байсан шүү дээ. “Гурван охин” гэдэг бол зүгээр л нэр. Нэрийн утгыг улайран ухаж ойлгох хэрэггүй гэж хэлмээр байна.
-Гурван охин хамтлагийг гол холбогч нь хэн бэ?
Анхмаа:-Хамтлагийн ахлагч Соло. Соло маш ухаантай. Аливаа зүйлийн учрыг маш сайн олдог.
Ану: -Анхмаа маань гадаад харилцааны тал дээр толгой өвтгөдөггүй.
Соло: -Ану маань маш уян зөөлөн сэтгэлтэй. Аливаа хүнд зүйлийг зөөллөж чаддаг эрдэмтэй /инээв.сур/
Тоглолтын бэлтгэлийн үеэр
-Өвөрмонгол, Буриад, Улаан-Үүд гээд хилийн чанад дахь хөршүүд маань “3 охин” хамтлагийг хэр сонсдог бол?
Ану: –Манай хамтлаг төдийгүй ер нь Монголын хамтлаг дуучид Өвөрмонголд бол “од” шдээ. Уран бүтээлч болсны ид бах, баяр хөөр гэдгийг тэнд л үзнэ. Улаан-Үдэд биднийг маш сайхан хүлээж авдаг. Буриадууд бидний дуунд дуртай, мэддэг нь бидэнд маш сайхан санагддаг.
-Гурван охин хамтлагийн фэнүүд, сонсогч үзэгчид хэдий насныхан байдаг вэ?
Соло: -40-өөс доош насныхан ихэвчлэн сонсдог болов уу гэж ажигладаг. Дөрвөн настай хүүхэд ч гудамжинд “Хот диско хот диско хо хо” гэчихсэн явж байгаа нь бидэнд маш хөөрхөн харагддаг. Тэд ч гэсэн бидний сонсогч байна шүү дээ.
-Киви хамтлаг Гурван охин хамтлагийн өрсөлдөгч мөн үү?
Соло: -Монголчууд цөөхөн, монгол хүн бусад улс үндэстнийг бодоход богино насалдаг учир бие биенээ хайрлаж, хүндэлж, ойлгож баймаар санагддаг. Киви хамтлагийнхантай бид найзууд. Найзуудыг хооронд нь өрсөлдүүлж хэрэггүй. Харин бид үүний оронд хамтран уран бүтээл хийж, олон улсын уралдаан тэмцээнд оролцмоор байгаа юм. Ер нь салбар салбарын шилдгүүд нэг зорилгын төлөө явж байгаа юм чинь хүчээ нэгтгээсэй. Жишээ нь, загвар зохион бүтээгчдээс гялалзаж байгаа Ариунаа Сүри, Катя Зол нарыг хамтраад Азийн зах зээлд ч болтугай гараасай гэж хүсдэг. Нэгдвэл хийж болохгүй зүйл гэж байхгүй шүү дээ.
-Дэлхий дахинд хүчээ аваад байгаа интернэтийн ертөнцөд яагаад албан ёсны сайт, википедиад бүртгэл, фэйсбүүк пэйжгүй байна вэ?
Анхмаа: -“Гурван охин” фэйсбүүк пэйж маань 30 мянга орчим лайктай. Бид гурвуулаа админаар нь ажилладаг учир өдөр тутмын үйл явдал, уран бүтээлийнхээ талаар бичиж байдаг. Сайт нээж ажиллуулж байсан. Хөтлөн явуулж байсан хүүхэд маань гадагшаа сургуульд явсан учир түр зогсоод байгаа. Удахгүй хөгжүүлнээ.
-Гурван охин хамтлагийнхан гадныхан шиг галзуу фэнүүдийн, “галзуу” захианууд авч үзсэн үү. Эсвэл бүр сүрдүүлж, заналхийлсэн ч юм уу?
Ану: -Танилцья гэсэн мессеж, утасны дуудлага багагүй ирдэг. Тэр бүрт хариу өгөөд байж байх цаг зав бидэнд гардаггүй. Ямар сайндаа л “Надтай хамт өглөөг угтаач” гэсэн мессеж явуулсан чинь “Гурван охин” хамтлагийн гишүүн “Дачих уу” гэж явуулсан гэсэн явган яриа хүртэл гарсан байсан.
-Хэн нь хамгийн загварын мэдрэмж өндөртэй вэ?
Анхмаа: -Бүгд л дээ /инээв. сур/ Жилдээ олон удаа гадагшаа явдаг. Тэр бүртээ л моодонд орж байгаа хувцас хэрэглэлийн улирлын шилдгүүдээс хоцрохгүй байхыг эрмэлздэг. Үзэгч, сонсогч, фенүүддээ сайхан харагдах нь уран бүтээлчдийн төрмөл үүрэг гэж бодож байна.
-Хамтлагийн имиж бүрдүүлэлтийг хэн анхаарч ажилладаг вэ?
Соло: -Өөрсдөө болон найз нөхөдтэйгээ зөвлөнө. Сүүлийн хоёр жил Д.Болд ах маань биднийг продюсерлэж, заавар зөвлөгөө өгч байгаа. GoGo.mn сайтад ярилцлага өгч байгаа энэ боломжоо ашиглаад Д.Болд ахдаа маш их баярлаж явдаг шүү гэж хэлмээр байна. Бидний “Жинхэнэ хайр” тоглолтыг Д.Болд ах маань үзээд үнэхээр баярлаад уйлсан байсан. “Тасархай гоё тоглолт болсон, би бүр нулимс унагалаа” гэж тоглолтын дараах үдэшлэгийн үеэр хэлж байсан. Тэр өдөр баярласан сэтгэлээ илэрхийлж, бидэнд “Удахгүй чи надаас” гэдэг маш гоё дууг бэлэглэсэн. Бид тэр дуунд нь хоёр клип хийсэн. Залуусын дуулах дуртай, сонсох дуртай дууны нэг болсонд баяртай байгаа. Д.Болд ахтайгаа олон жил хамтран ажиллаж, шинэ шинэ уран бүтээл, стиль имижийг гаргана гэж бодож байна.
-Гоо сайхандаа хэр цаг хугацаа, хөрөнгө мөнгө зарцуулдаг вэ?
Ану: -Эмэгтэй хүн л болсон хойно гоо сайхандаа цаг, мөнгийг хайрладаггүй. Дээр хэлсэнчлэн сайхан харагдах нь бидний үүрэг юм. Муухай бол хэн харахыг хүсэх билээ /инээв.сур/
-Ярилцлагын төгсгөлд?
Соло: -Өнөөдөр, маргааш Marque-27 клубт тоглогдох “Хурдлах тусам” цомгийн баярт та бүхнийг хүрэлцэн ирэхийг урьж байна. Тасалбарын үнэ 30.000 төгрөг байгаа. Тасалбарт манай цомог дагалдана. С.Ононбат, Д.Болд ах нар маань ямар найруулга, шийдэл гаргасныг ирээд үзээрэй гэж хэлмээр байна.
gogo.mn
