“Гурван охин” хамтлагийн “Хурдлах тусам” цомгийн баярт яаран яарсаар, бас чиг хурдлуулсаар л хүрлээ.
“Marque-27” шөнийн клуб буюу товлосон газраа тогтсон цагтаа очиход тэд тайзан дээрээ хараахан гарч ирээгүй байв. Тоглолт эхлэх хугацаа нэлээд оройтож үзэгч, сонсогчдыг “хүлээс алдруулав”. Энэ нь бас тэдний өгч буй нэг мессеж юм.
Хорин цагт эхлэх байсан цомгийн баяр 21:00 цаг өнгөрч эхэллээ. Гэхдээ эхлэлтэд хэн ч бэлэн байгаагүй. Гэнэт л өөр хөгжим дуугарч, гитар балбасан залуус үсрэн гарч ирж, гурван бүсгүй бараг л тайзны араас дуулсаар бүгдийн өмнө ил болоход тэнд байсан залуусын “цөс хөөрөхгүй” байж чадсангүй.
Тэр үдэш эрч хүч, дээд зэргийн сэтгэл хөдлөл нэг хэсэг л залуусыг “бүчлээ”.
Энэ бүгдийн дараа хамтлагийнхан зарим нэг уянгын дуугаа эгшиглүүлсээр тайзнаа эргэн гарав. Энэ хэсэгт “Эр хүн зүрхэндээ уйлдаг”, “Удахгүй чи надаас” зэрэг дуутай нь фэнүүд нь ч бас “уянгалсан” юм.
22:00 цаг гэхэд хамтлагийн “галзуу” хитүүдийн ихэнх нь дуулагдлаа. Мөн шинэ цомогт багтсан дуунаасаа ч тэд дуулсан. Залуусын зүрх сэтгэлийг хэдийнээ байлдан дагуулсан “Зүрх чам руу”, “Хот диско”, “Жинхэнэ хайр” зэрэг хитүүд “Marque-27”-д цугларсан бүгдийг доргиож байлаа. “Жинхэнэ хайр” тоглолтод дуулагдаж байсан эдгээр бүтээл “Гурван охин” хамтлагийн фэнүүдийг үнэхээр байлдан дагуулж чадлаа.
“Хурдлах тусам” тоглолт баярын уур амьсгалтай болж байгаа нь ирсэн залуус, эрхэм зочдын сэтгэл хөдлөл, дүр төрхөөс харагдсан.
Зочдын дунд “Гурван охин”-ы эцэг, эхчүүдийн төлөөлөл багтсан байв. Харин залуучууд тэднээс их л “жийрхэж”, урд хойгуур нь нэлээд эвтэйхэн алхацгаах юм. Аргагүй шүү дээ. Настай хүмүүс ийм доргио үдэшлэгт ирсэнд гайхсан бас хүндэтгэсэн байж таарна. Тэдний дундаас “Гурван охин” хамтлагийн гишүүн Анугийн аав Хишигтогтохтой уулзах завшаан бидэнд тохиолоо.
Тэрээр “Би охиныхоо хоёр дахь удаагийн тоглолтод ирж байна. Энэ удаад тайз дэлгэцэн дээр биш, жинхэнэ залуучуудынхаа дунд болж байгаагаараа өвөрмөц юм уу даа. Ер нь би бага байхад нь л дуулах газарт нь хүргэж өгөөд, дагуулж явдаг байсан даа. Харин өнөөдөр охин маань нэгэнт олны мэдэх сайн уран бүтээлч болсныг харахад сайхан байна” гэж сэтгэгдлээ бидэнтэй хуваалцсан юм.
Тоглолтын бүхэл бүтэн нэг үе гэж хэлж болох сонирхолтой хэсэг нь Буриад улсын ардын жүжигчин, МУСТА, дуучин Борхүүгийн Амархүү, болон реппер Цэцэнбилэг нарын үзүүлбэр байлаа. Б.Амархүү “Дурласан би чинийхээ энхрийхэн харцанд…” гээд эхэлмэгц л бүгд шуугиж, найгаж байна.
Цэцээ “Гурван охин”-той хамтарч “Party MV” хэмээх электро, хип хоп, данси гэмээр нэгэн холимог уран бүтээлийг нүргэлүүлэхэд гараа өргөөгүй хүн бараг байсангүй. Дуучин Б.Амархүүтэй тоглолтын завсар жаахан хуучлахад тэрээр “Би хоёр жилийн өмнө “Зүрх чам руу” хэмээх уянгын поп дууг “Гурван охин”-той хамтран дуулсан тэр үеэс л энэ гурвыгаа ямар уран бүтээлч болохыг сайн мэдэх болсон. Өнөөдөр баяраа хийж буй “Хурдлах тусам” цомгийг мэргэжил нэгт хүнийхээ өнцгөөс дүгнэхэд тэднийг яг өөрөөр нь харуулж чаджээ. Өөрөөр хэлбэл, өмнөх уран бүтээлүүдээсээ илүү “эвдэж” хийснээрээ сонсголонтой болсон шүү” хэмээн ярилаа.
Харин Цэцээ хэлэхдээ ““Party” дууны үгийг би бичсэн юм. Гурван охинтой хамтран дуулсан анхны уран бүтээл маань. Бидний хамтын уран бүтээлийг олон нийтэд хүргэж өгсөн “В прадакшн” болон Болд ахдаа баярлалаа” гэж сэтгэлийн үгээ дайлаа.
“Гурван охин” хамтлаг “В продакшн”-нд харьяалагддаг. Цомгийн ерөнхий продюсерээр Төрийн соёрхолт Д.Болд ажилласан юм билээ. “Чамаас би”, “Охин тэнгэр”, “Удахгүй чи надаас”, “Түүнийг мэдрэхээр” зэрэг шинэ уран бүтээлүүдийг нэг дор “амьдаар” нь сонсох ховорхон боломжийг “ашигласан” залуус шөнийн 23:30 цагт тоглолт өндөрлөсний дараа зүг зүг тийш урам зоригтой алхацгаалаа.
