DIY: Хайртыгаа өөрийн гараар хийсэн бэлгээр баярлуулъя

1. Илгэн iPad-ны сав- Ажил хэрэгч хайртдаа яг ийм илгэн iPad-ны сав хийж өгөөрэй. Илгэн материалыг дээрх эсгүүрийн дагуу хайчлаад, улаан шугамтай хэсгээр нийлүүлж оёно. Хийхэд ердөө 30 минут л шаардагдана. Тэр чамайг ажил хэргийн уулзалт бүр дээрээ санан дурсаж инээмсэглэх болно. Булан хэсэгт нь өөрийнхөө нэрний эхний үсгийг хатгачихаж болно.

2. Чихэвчний хөгжимний халаас-Хэрэв чиний хайр хөгжим сонсох дуртай бол дэрэнд нь ийм жижигхэн mp3-ын халаас хийгээд өгчих. Эсвэл өөрөө шинэ дэр худалдаж аваад дээр нь халаас нэмээд оёчихсон ч болно. Mp3 юм уу iPod-ных нь хэмжээгээр даавуу хайчилж дэрэнд нь оё. Хүсвэл товч, юм уу наалддаг материалаар дэртэйгээ холбогддог болгож болно.

3. Бүрмэл ханцуйны заптник-Хуучин заптникийг нь нэрнийх нь эхний үсгээр чимж өгөөрэй. Тэр цагаа харах болгондоо таныг санах нь гарцаагүй. Заптникаас нь хааш хаашаа 2 дахин том даавуу 2 ширхэгийг хайчлаад, тус бүр дээр нь үсгээр хатгамал хийнэ. Даавууныхаа ирмэгийг эмжих маягаар оёод хоёр төгсгөлийг нь зангидалгүй орхино. Голд нь заптниктай нь ижил хэмжээний порлон тавина. Дээр нь заптникаа тавьж зангидалгүй орхисон төгсгөлүүдээсээ татахад бүрэгдэж тогтоно.

4. Анхилуун “чулуу”-Хэрэв хайрт чинь сайхан үнэрэнд дуртай бол анхилуун үнэртэй “чулуу” хийж бэлэглээрэй. Машиндаа, эсвэл ажлын өрөөндөө тавьчихсан байхад түүний дуртай үнэр тэр аяараа сэнгэнэх болно. Эхлээд түүнийг ямархуу үнэрэнд дуртайг асууж лавла. Дараа нь тийм үнэртэй эфирийн тос худалдаж авна. (Эфирийн тосыг бэлэг дурсгалын болон гоо сайхны дэлгүүрүүдээр худалдаалдаг) Чулуу хийх явц: ½ аяга цагаан гурил, ½ аяга давсыг нэг саванд хийж холиод, дээр нь ¼ цайны халбага эфирийн тос, 2/3 аяга буцламгай халуун ус нэмж нухаад зуурмаг болгоно. Хүсвэл зуурч байхдаа хүнсний будаг хийж гурилан “чулуу”-ндаа өнгө оруулаарай. Зуурмагнаас гар дээрээ авч хүссэн хэлбэртээ оруулаад сонингийн цаасан дээр тавьж 2 хоног хатаана. Хатаж дуусаагүй байхад нь үл ялиг кокоаны нунтаг цацаарай. Хатуурсан чулууг шилэнд хийж бэлэглэнэ.