Шведэд сав шилжүүлэн суулгах мэс ажилбар хийлгэсэн эмэгтэй эсэн мэнд амаржжээ. Энэ нь дэлхийд анхны тохиолдол болж байгаа бөгөөд үргүйдлийн улмаас шаналж буй эмэгтэйчүүдэд итгэл найдвар өгсөн үйл явдал болсон байна. Сэтгүүлд бичигдсэнээр сав шилжүүлэн суулгах мэс ажилбар хийлгэсэн 36 настай Швед эмэгтэй жирэмсний 31 долоо хоногтойдоо кесерова хагалгаа хийлгэн хүүгээ төрүүлжээ. Хүү нь 1.8 кг жинтэй төрсөн бөгөөд эх хүүхдийн биеийн байдал сайн байгаа аж. Энэ эмэгтэй генетик шалтгааны улмаас төрөлхийн савгүй төрсөн бөгөөд хүүхэд төрүүлэх ямар ч боломжгүй байжээ. Гэвч тэрбээр долоон жилийн өмнө цэвэршсэн 61 настай танил эмэгтэйтэй тохиролцсоны үндсэн дээр өнгөрсөн жил сав шилжүүлэн суулгах мэс ажилбар хийлгэсэн байна.
Эмэгтэй өндгөн эс хэвийн ажиллагаатай байсан тул эмч нарын баг үр тогтоход ашиглагдах өндгөн эсийг түүний өндгөвчнөөс авч, хөргөгчинд хадгалж байгаад сав шилжүүлэх мэс заслаас хойш барагцаагаар жилийн дараа үр хөврөлийг шилжүүлэн суулгасан байна. Үүнээс гурван долоо хоногийн дараа эмэгтэй жирэмсэлжээ. Тус мэс ажилбарыг гардан хийсэн Готенбург их сургуулийн профессор Мац Браеннстроем хэлэхдээ “10 гаруй жилийн турш амьтан дээр хийсэн туршилт, судалгааны үр дүнг харуулсан үйл явдал боллоо. Дэлхий даяар үргүйдлийн улмаас зовж шаналж буй олон эмэгтэйчүүд байна. Тэднийг эмчлэх боломж бүрэн нээгдлээ. Манай эмч нарын баг аль хэдийнэ цэвэршсэн донороос хүртэл сав шилжүүлэн суулгах боломжтой гэдгийг нотлон харуулж чадлаа” гэжээ.
Монголын мэдээ
