Нийслэл Улаанбаатар хотын түүхт 375 жилийн ойг тэмдэглэн өнгөрүүлэх “Найрсаг Улаанбаатар” хөтөлбөрийн хүрээнд “Улаанбаатар” чуулгын уран бүтээлч хамт олон “Жи Энтертэйнмент”, UBS телевизийн “Universe Best Songs” төслийн шилдэг уран бүтээлчидтэй хамтран “UB I love you” буюу “Үйлсийн сайхан Улаанбаатар” орчин үеийн мюзиклыг үзэгч танд бэлэг барих гэж байна.
Тус мюзиклын гол дүрд “Universe Best Songs” төслийн Гран при шагналт Ч.Цэлмүүн, шилдэг оролцогч Т.Амина, Г.Тэнүүн, С.Зоригбаатар нарын залуу уран бүтээлчид урилгаар оролцож байгаа юм. Эрч хүч авьяас чадвараараа хүлээн зөвшөөрөгдөж, уран бүтээлийн олзтой яваа Улсын филармонийн гоцлол дуучин Т.Аминаатай уран бүтээлийн талаар цөөн хором хуучиллаа.
-Дуучин Т.Аминатай хоёр дахь мюзикл жүжгээр эргэн уулзаж байна. Энэ удаагийн уран бүтээл Нийслэлийн 375 жилийн ойн хүрээнд тэмдэглэн өнгөрүүлж байгаагаар онцлогтой юу?
-Маш сайхан байна. Нийслэл Улаанбаатар хотын түүхт 375 жилийн ойг тэмдэглэн өнгөрүүлэх “Найрсаг Улаанбаатар” хөтөлбөрийн хүрээнд “Улаанбаатар” чуулгын уран бүтээлчидтэй хамтран “Үйлсийн сайхан Улаанбаатар” орчин үеийн мюзиклыг тайзнаа толилуулахаар бэлтгэл ажилдаа орчихсон явж байна. Бид энэ бүтээлээрээ өнөөгийн нийгэмд өдөр бүр, хором мөч бүхэнд биднээс шаарддаг зүйл болох хариуцлага гэдгийг ойлгуулах, тэр тусмаа манай жүжиг залуучуудыг хариуцлагатай нийгэмд уриалан дуудаж байгаагаар онцлогтой. Нэг үеэ бодоход нийслэл хот маань хөгжин цэцэглэж байна. Үүнийг дагаад иргэд ч соёлжиж, үүргээ ухамсарладаг болж.
-Мюзикл гэдэг утгаараа монголын орчин үеийн хөгжмийн ертөнцөд цахиур хагалж ирсэн үе үеийн шилдэг дуунууд орсон байх. Өөрийн тань уран бүтээл эгшиглэх болов уу?
-Мюзиклын тухайд дуулалт, хөгжим бүгд амьд хөгжимтэй явагдана. Жүжигчдын хувьд ч гэсэн тайзан дээр бүжиглэж, жүжиглэхээс эхлээд үзэгчдийн зүрх сэтгэлд илүү ойр байх үүднээс ажиллаж байна. Миний уран бүтээл гэвэл найруулагч маань ямар ч бүтээл задалж болохгүй гэсэн учраас тэрийг сайн тодорхой хэлж мэдэхгүй байна. Ерөнхийдөө Улаанбаатар хотоо магтан дуулсан хуучны дуунуудаас гадна хүмүүсийн зүрх сэтгэлд хүрсэн хэд хэдэн монгол дуунууд орсон байгаа.
-Ямар ч дүр бүтээж чадна гэсэн омогшил төрдөг байлгүй. Мюзиклын хувьд ямар дүр бүтээж байгаа вэ?
-Гол дүрийн Энхриймаа гэх бүсгүйн дүрийг бүтээж байгаа. Дууяа буюу дуучин Ч.Цэлмүүний найзын дүрээр үйл явдал цаашаа өрнөнө дөө.
-Хамгийн сүүлд “Намайг уучил” гэсэн шинэ дуу гаргасан. Сүүлийн үеийн уран бүтээлийн сониноосоо хуваалцахгүй юу?
-Одоохондоо хоёр дахь цомгийнхоо ажилд орчихсон байгаа. Илүү хэмнэлтэй, шинэлэг, эрч хүчээр дүүрэн баялаг зүйлсийг үзэгч, сонсогчиддоо хүргэхээр зорьж байна. Саяхан “Намайг уучил” дууны маань клип гарсан. Бас хэд хэдэн дуугаа шил дараалан гаргаж, шинэ жилээс өмнө уран бүтээлээ хүргэх төлөвлөгөөтэй ажиллаж байна.
-Филармонийн гоцлол дуучин болоод багагүй хугацааг өнгөрөөлөө. Намар цагийн тоглолтууд эхэлчихсэн үү?
-Энэ жилийн хувьд цагдаагийн “Сүлд” чуулгын уран бүтээлчид манайхтай нэгдсэн байгаа. Манай уран бүтээлчид өвөл цагийн нээлтээ хийх гээд маш завгүй ажиллаж байна. Мөн хөгжмийн зохиолч Л.Балхжавын тоглолт болон энэ сараас манай үндсэн тоглолтууд ерөнхийдөө эхэлнэ. Гэхдээ гол анхаарлаа мюзиклдээ хандуулчихсан яваа. Өөрийгөө илүү сайн дайчилж, нөгөө хариуцлага гэгч зүйлийг үзэгчдээ энэ сарын 23, 24, 25-ны өдрүүдэд Улаанбаатар чуулгын тайзнаа хүргэнэ дээ.
-Дуучин хүн клипэндээ өөрөө тоглож, жүжиглэх авьяас шаардагддаг. Жүжиглэхэд хэцүү, шантрах үе гарах уу?
-Мэргэжлийн жүжигчин биш учраас хүндрэл бэрхшээл гаралгүй яахав. Гэхдээ уран бүтээлч хүний хувьд би чадах ёстой гэж өөртөө урам өгдөг.
-Дуучин Т.Аминагийн тоглолтыг хүлээж байгаа мянга мянган үзэгчид бий. Багадаа хөдөө орон нутгаар аялан тоглолт хүртэл хийчихсэн хэрсүү охин байж билээ?
-Баярлалаа. Тэр сайхан дурсамжууд миний сэтгэлд их тод байдаг. Тоглолтын тухайд маш олон хүмүүсээс санал ирдэг. Тэр дундаа урлаг соёлын шүүмжлэгчдээс заавар, зөвлөгөө, шүүмж ирнэ л дээ. Харин миний хувьд өөрийнхөө хэмжээнд үзэгчдэд хүргэх ёстой уран бүтээлүүдээ хүргэсний дараагаар тэсрэлт хийх бодол байгаа шүү.
mongolcom.mn