Шинэчлэлийн Засгийн газрын хийсэн цөөхөн шинэ ажлуудын нэг нь Худалдан авах ажиллагааны газар нэртэй байгууллага. Асар их хөрөнгө мөнгөтэй холбоотой энэ байгууллагын даргыг Д.Тэрбишдагва, Ч.Улаан нар өөрийнхөө намаас томилуулж дөнгөсөн. Гэвч сүүлийн үед Худалдан авах ажиллагааны дарга Д.Энхжаргал гэгч энэ хатагтайтай холбоотой таагүй мэдээлүүд хэвлэл мэдээллийн хэрэгслээр тарж байна. Уг нь Монгол Улсын Ерөнхий сайд Н.Алтанхуяг “Шинэчлэлийн Засгийн газар Худалдан авах ажиллагааны байгууллагыг тусад нь байгуулсан учир нь тендерийн ажиллагааг ил тод болгох, байгууллагуудыг шударга өрсөлдөх, дааж авсан ажлаа чанартай хийлгэх зорилготой байгуулсан. Цаашдаа бие биенээ хардах биш, тендерийн сонгон шалгаруулалтын ил тод байдалд анхаарахаас гадна хэмнэлт гаргахыг зорьж байна” гээд тендерийн будилааныг арилгах учиртай” гэж хэлж байсан. Гэвч өнөөх тендерийн будлианыг арилгах ёстой газар нь тендер будлиантуулагч болж орхижээ.
Баримт 1
Анх энэ албан тушаалд очиход нь улс төрийн хүрээнийхэн дотор түүнийг “No name” гэж хочилдог байсан гэнэ. Харин сүүлийн үед тэр их танил талтай болж байгаа сурагтай. Худалдан авах ажиллагааны дарга Д.Энхжаргал Төв аймгийн 90 жилийн ойд очжээ. МАХН-ын бүлгийн дэд дарга М.Энхболд, Ардын уран зохиолч Бавуугийн Лхагвасүрэн, Дөнгөтийн Цоодол, Пунцагийн Бадарч, Шаравын Сүрэнжав зэрэг мундаг зохиолчидтой, Мөөеө аварга, А.Сүхбат аварга, сумогийн аварга Хакухо, АЖ А.Долгор, МУГЖ Б.Сарантуяа гээд алдартан олонтой газар Тендерийн хорооны дарга Д.Энхжаргал гэдэг эмэгтэйг хэн ч танихгүй нь мэдээж. Гэтэл Д.Энхжаргал учиргүй уурсч Төв аймгийн Тендерийн хорооны 2-3 ажилтнаа “Намайг угтаж авсангүй” гэж загнан өмнө хойноо бөндөгнүүлж, янтгар хатан шиг загнажээ.
Баримт 2
Тендерийн хороо албандаа том, жижиг хоёр машинтай. Том машин нь болох Ланд круйзер 200 жийпийг нь Тендерийн хорооны дарга Энхжаргалын нөхөр хувийнхаа машиныг унаж байгаа юм шиг зайдалдаг, эхнэр нь жижиг машинаа албандаа унадаг гэнэ. Тэр байтугай Тендерийн хорооны дарга Энхжаргалын нөхөр нь, Худалдан авах ажиллагааны газрын Захиргаа удирдлагын хэлтсийн дарга Ч.Жаргаланг дагуулаад Хэнтийн тайгад очиж ан хийжээ. Тэгэхдээ мөн л Хэнтий аймгийн Худалдан авах ажиллагааны салбар нэгжийн ажилтнуудыг дарамталж, дагуулан явж үйлчлэгч шигээ л харьцсан юм байх. Худалдан авах ажиллагааны газрын даргын нөхрийн унаж давхиад байдаг Ланд круйзер 200 машинтай холбоотой асуудал ч бас байдаг гэнэ. Учир нь тэрээр албаны хэрэгцээнд жийп машин авна гэж хоёр удаа зарлаад, шууд гэрээгээр хуучин машин танилаасаа авсан гэж учир мэдэх хүмүүс ярьж байна.
Баримт 3
Өдөр тутмын сонинд дурьдснаар Д.Энхжаргал өөрийн багт багтсан хүмүүсээрээ үнэлгээний хороог бүрдүүлсэн. Тиймээс аливаа тендерийг өгөх компанидаа анхнаасаа шаардлагыг нь тохируулан боловсруулж зарладаг гэв. Өөрийнх нь таалалд нийцээгүй компани шалгарсан тохиолдолд ажлуудын зөвлөмж дээр нь гарын үсэг зурахгүй, “Дахин үнэлж ир” хэмээн дарамтладаг аж.Мөн багцлах шаардлагагүй ажлуудыг багцалж, нэг компанид олон ажил өгдөг байна. Энэ нь 2013 онд аймгийн төвүүдийн битүү зах барих ажлыг өөр өөр аймагт баригдах ажлыг нэгтгэж зарлаад, нэг компанид өгснөөс тод харагддаг аж.
Худалдан авах ажиллагааны газар өндөр үнийн дүнтэй ажлуудыг илэрхий хуудуутай үнэлдэг байна. Тухайлбал, аймгуудын нэгдсэн оношлогооны төв болон Эх хүүхдийн эрүүл мэндийн үндэсний төвд шаардлагатай тоног төхөөрөмж нийлүүлэх тендер шалгаруулалт одоо хүртэл маргаан дагуулсаар байдаг нь бас л Д.Энхжаргалтай шууд холбоотой юм байна.
Иргэд хэлэхдээ, тус газар цахимаар зарлаж байгаа нэрийн дор үнийн саналыг мэдэж болохоор өөрсдөө давуу боломж үүсгэсэн. Дэлхийн банкны төсөл хэрэгжүүлж байгаа нэрээр өөрөө болон өөрийн хүмүүсээ олон удаа гадаадад явуулах, олон зөвлөх авч үр ашиггүй зардал гаргадаг гэлээ. Үнэндээ ХААГ-ын зарим хэлтэс үндсэн ажилчдаасаа олон зөвлөхтэй юм байна.
Д.Энхжаргал ийнхүү тендер шалгаруулалтыг хууль бусаар явуулдагаа намдаа санхүүжилт өгөх зорилготой гэж тайлбарладаг гэж бичиж байх юм.
Баримт 4
Тус газраас өнгөрсөн дөрөвдүгээр сарын 1-нд Дорноговь аймгийн МСҮТ-ийн дотуур байрны барилгын ажлын гүйцэтгэгчийг сонгон шалгаруулах тендер зарлажээ. Уг тендерт найман компани материалаа явуулснаас “Тобэм” ХХК, БЦХ ХХК тус тус шаардлага хангаж, шалгаруулалтад тэнцсэн байна. Энэхүү ажлын төсвийн төлөвлөгөө 1425000000 төгрөг. Шалгарсан хоёр компанийн нэг буюу “Тобэм” ХХК нь үнийн дүнгээр тендерт ялжээ. Гэвч Худалдан авах ажиллагааны газраас “БХЦ” ХХК-ийг ялуулахаар улайрч эхэлсэн байна.
Улмаар мэдэгдэл ч гаргаж. Тендерт оролцсон компаниудын тендер шаардлага хангаагүй гэх үндэслэлээр холбогдох хууль тогтоомжид заасны дагуу тендерийг хүчингүй болгож дахин зарлахаар болжээ.
“Тобэм” ХХК-ийнхан тендерт оролцохдоо шаардлагатай бүх материалыг бүрдүүлсэн хэмээн үзэж, энэ талаараа Сангийн яаманд гомдол гаргаж. Гомдлыг Сангийн яам хянаж үзээд, ХААГ-ын дарга Д.Энхжаргалд хаяглан “Тобэм” ХХК-ийн ирүүлсэн тендерийн шаардлага хангаагүй гэсэн үндэслэлүүдийг няцаасан байна. Гэтэл тендер шалгаруулалтыг дахин зарлаагүй аж.
Тендер шалгаруулалтад дахин оролцохын тулд тус компанийнхан ХААГ-ын Дотоод аудитын хэлтсийхэнд хандаж байж тендерийн материалыг олж авчээ. Дахин зарласан тендерийг өнгөрсөн долдугаар сарын 4-нд нээсэн бөгөөд “Тобэм” ХХК болон “Нарантээл” ХХК-иуд материалаа ирүүлсэн байна. ХААГ-ын дарга Д.Энхжаргал дээрх хоёр компанийн алийг нь ч шалгаруулалгүй, тендерийг дахин хүчингүй болгожээ.
Хоёр дахь удаагаа хүчингүй болсон тендер шалгаруулалтыг хуулийн дагуу шууд гэрээгээр олгодог утгаараа уг ажлын гэрээг Хөдөлмөрийн яамны мэдэлд шилжүүлсэн байна.
Иргэдийн хэлснээр энэхүү тендер шалгаруулалтад Я.Санжмятав сайдын компани орсон. ХААГ-ын дэд дарга Н.Булгантамир Я.Санжмятавтай хамаатан аж. Харин ХААГ-ын дарга Д.Энхжаргал Д.Тэрбишдагва гишүүний хүн, “ТБД Андууд” ХХК-д олон жил ажилласан нэгэн гэх мэдээлэл байна. Тиймээс ХААГ-ын дарга Д.Энхжаргал тэргүүтнүүд тендерийг зориуд будлиантуулж, өөрийн компаниа зүтгүүлж байна гэж зарим хүмүүс ярьж байна.
Эх сурвалж: http://www.shudarga.mn/news/17128.html
