“Бид чадна” www.bidchadna.mn хөгжлийн бэрхшээлтэй иргэдийн үндэсний портал цахим хуудаснаас санаачлан хөгжлийн бэрхшээлтэй иргэдийн эрхийг хамгаалах өдөр 12 сарын 03-ны өдөр “Тэргэнцэртэй сайхан бүсгүй” шалгаруулах тэмцээн болон хувцас загварын шоу” урлаг, гоо зүйн арга хэмжээг зохион байгуулах гэж байна.
Энэхүү арга хэмжээг “Бриллиант” эмэгтэйчүүдийн клуб, “Их Засаг” Олон Улсын Их Сургуулийн Дүрслэх урлаг, Дизайн Технологийн Сургууль хамтран зохион байгуулж байгаа бөгөөд 12-р сарын 03-ны өдрийн 17 цагт МҮХАҮ танхимд болно.
Бид энэхүү арга хэмжээг зохион байгуулснаар хөгжлийн бэрхшээлтэй залуу охид эмэгтэйчүүдийг урлаг, гоо сайхнаар дамжуулан нийгэмд таниулах, хөгжлийн бэрхшээлтэй иргэдийн нийгмийн идэвх санаачилгыг нэмэгдүүлэх, шинэлэг бүтээлч хандлагыг төлөвшүүлэх зорилготой хамтран ажиллаж байна. Хөгжлийн бэрхшээлтэй иргэдийн эрхийг хамгаалах өдөр буюу 2014 оны 12 сарын 03-ны өдөр дээрх арга хэмжээг зохион байгуулснаар хөгжлийн бэрхшээлтэй иргэдийн авьяас чадварыг дэмжиж урамшуулах, олон нийтэд таниулах, тэдэнд урам зориг өгөх зорилго доор энэхүү гоо сайхны наадам нийт 4 цагийн үйл ажиллагаа болох ба тэргэнцэртэй охид бүсгүйчүүд, хамтрагч моделиуд, мэргэжлийн үйлчилгээ үзүүлдэг холбоод, хөгжлийн бэрхшээлтэй иргэдийн эрхийг хамгаалах чиглэлээр ажилладаг төрийн болон төрийн бус байгууллага, ОУ-ын байгууллагын зочид төлөөлөгчид нийт 300 орчим хүнийг хамруулсан томоохон арга хэмжээ болно.
Энэхүү арга хэмжээний ивээн тэтгэгч байгууллагуудаар: Олон улсын залуучуудын “Дүүлэн нис” байгууллага, Аmerican Grill ресторан болон Ruby салон хамтран ажиллаж байгаа бөгөөд D-Light ХХК нь дэмжин ажиллаж байна. Мэдээллийн ивээн тэтгэгч байгууллагаар Royal HD телевиз албан ёсоор хамтран ажиллаж байгаа болно.
Тэмцээн нь “Тэргэнцэртэй хувцас загварын шоу” болон “Тэргэнцэртэй сайхан бүсгүй” шалгаруулах тэмцээн гэсэн 2 хэсэгтэй болох ба Монголын анхны “Тэргэнцэртэй Сайхан Бүсгүй”-г шалгаруулан Сайхан бүсгүйн Титэм, Итали улсад 18 хоног амрах эрхийн бичгээр шагнана. Мөн Авьяаслаг, Оюунлаг, Төгс инээмсэглэл гэсэн 3 байранд шалгаруулалт явагдах болно.
