МАХН-ын дарга Н.Энхбаярын оролцсон “Монгол тулгатны 100 эрхэм” нэвтрүүлэг өчигдөр орой буюу энэ сарын 18-нд ихэнх телевизүүдээр цацагдлаа. Олон нийтийн дунд хүлээлт үүсгээд байсан энэхүү нэвтрүүлгээр Н.Энхбаяр төдийгүй түүний эхнэр О.Цолмон нарын ярьсан зүйл олны анхаарлыг ихэд татав. Нэвтрүүлгийн хамт олон тэдэнд нэг жилийн турш санал тавьсаны эцэст зөвшөөрүүлж, БНСУ-ыг зорьж нэвтрүүлгээ бэлтгэсэн байна.
Нэгэн цагт төрийг тэргүүлж явсан түүнийг 100 эрхмийн нэг гэдгийг хүлээн зөвшөөрөх нэгэн байхад дургүйцэх нэгэн ч байх нь дамжиггүй. Мандан бадарч явсан цаг үе, төмөр тороор хашигдан эмнэлэгт хэвтсэн, ухаан алдан оймстойгоо ачуулсан гээд түүний амьдралын зам мөрийг өгүүлсэн энэхүү нэвтрүүлэг хамгийн их үзэгчтэй байна.
Тус нэвтрүүлгийн үеэр Н.Энхбаярын гэргий О.Цолмон зарим асуудлын талаар шулуухан хэлээд авав. О.Цолмонгийн хувьд учир мэдэх хүмүүс улс төрд нэлээд нөлөө бүхий бүсгүй гэж ярьдаг. Түүний аав нь эмч Онон, Ононгийн аав улс төрч Л.Цэнд гэж хүн байжээ. Л.Цэнд Монголын төрийг 44 жил барьсан Ю.Цэдэнбалын үед улсын жолоо атгалцаж байсан бөгөөд Ю.Цэдэнбалыг өвчнөө эмчлүүлэхээр Орос руу явсан хойгуур төрийн эрхэнд гарч, эргэлт хийх гээд бүтэлгүйтсэн гэж тухайн үеийн нам төрийн зүтгэлтэнүүд ярьдаг байна. Тиймдээ ч түүнд удам дамжсан дайчин зан өвлөгдсөн байхыг үгүйсгэх аргагүй юм.
Экс Ерөнхийлөгч маань “Н.Энхбаяр гэдэг хүнийг О.Цолмонгүйгээр төсөөлөхийн аргагүй” хэмээн улс төрийн өндөрлөгт хүрэхэд эхнэрийнх нь нөлөө ямар байсныг чухалчлав.
О.Цолмон нөхрийгөө шоронд өлсгөлөн зарлаж байсан үеийн талаар “Цаг минут секунд тутамд нөхрөө алдчих юм шиг санагдаад айж байсан. Хүн ийм үед аргагүй барьц алддаг юм билээ. Барьц алдаад Х.Тэмүүжин сайд руу мессэж бичиж байсан. Гэхдээ би нөхрөө ийм зүйлд нугарч, хугарах хүн биш гэдгийг мэдэж байсан” хэмээв.
Мөн “Тэр үед сэтгэл шархираад зүрх орилоод, уйлаад ч байгаа юм шиг маш хэцүү байсан. Өөр бусад бүх юм хамаагүй ганцхан нөхрөө алдахаасаа айж байсан” хэмээн сэтгэлээ уудалжээ.
Түүнээс гадна нэгэн аймшигтай зүйл нь Н.Энхбаярыг алах гээд шийдчихсэн байсан гэнэ. Энэ талаар “Ц.Нямдорж энэ бүхнийг зохион байгуулсан шүү дээ. Тэгж ярих юм бол Х.Тэмүүжингийн үед биш Ц.Нямдоржийн үед Н.Энхбаярыг хэрэгт холбогдуулсан. Н.Энхбаярыг баривчилж авч явахад Хуульзүйн сайд Ц.Нямдорж, ЦЕГ-ын дарга Ц.Сандаг-Очир, УИХ-ын дарга Д.Дэмбэрэл, Ерөнхий сайд Сү.Батболд байсан. Ер нь Н.Энхбаярыг ална гээд шийдчихсэн байсан. НҮБ-ын Ерөнхий нарийн бичгийн дарга Бан Ги Мун Ц.Элбэгдорж руу утасдаж “Би Н.Энхбаярт санаа зовж байна шүү. Би үүнийг анхааруулж байна” гэж маш ууртай хэлээд утсаа шидсэн гэсэн. Пан Ги Мун аймаар ууртай байсан гэсэн. Тэрнээс биш Н.Энхбаярыг ална гээд шийдчихсэн байсан юм билээ” хэмээн шулуухан хэллээ.
Түүнчлэн “Миний нөхрийг туйлдуулж, алингийн алдуулж мөлхөөд уйчлалт гуйхыг харахыг хүсэж байсан. Н.Энхбаяр бол тэгэх хүн биш. Би хэзээ ч тэгэхгүй гэдгийн ч мэдэж байсан” гэв.
Мөн “Ц.Элбэгдорж 2004 онд Америкаас ирчихсэн гудамжинд явж байсан. Нам нь ч тоохгүй. Хар хорины Засаг дарга болчихмоор байна гээд хачин юм яриад явж байхад, манай хүн өрөвдөөд Ерөнхий сайд болгосон. Орой нь манайд ирээд тас тэврэлдээд л намайг ч гэсэн тэвэрч аваад л байсан шүү дээ” хэмээн одоогийн Ерөнхийлөгчийг ихээхэн харж үзсэн тухай ярьлаа.
Энэ мэтчилэн манай Монголын улс төрд нэлээд булхай, луйвар байдаг талаар олон баримтыг тэд сөхөж ярьсан юм.
Ц.ЗАЯА chuhalmn
