“Бид чадна” хөгжлийн бэрхшээлтэй иргэдийн үндэсний портал сайтын санаачлагаар НАМЗХ-ын дэргэдэх “Бриллиант” эмэгтэйчүүдийн клубээс Хөгжлийн бэрхшээлтэй иргэдийн эрхийг хамгаалах өдөр буюу 12-дугаар сарын 3-ны өдөр монголд анх удаа “Тэргэнцэртэй сайхан бүсгүй” шалгаруулах хувцас загварын шоуг зохион байгууллаа.
Мөн тус үйл ажиллагаанд “Их засаг” Олон Улсын Их Сургуулийн Дүрслэх урлаг, Дизайн Технологийн Сургууль хамтран ажилласан билээ.
Түүнчлэн тус сургуулийн ур чадвартай авьяаслаг оюутан багш нарын урласан гоёлын даашинз, үндэсний хувцас, өдөр тутмын хувцасыг оролцогч бүсгүйчүүд маань олны өмнө танилцуулан өрсөлдлөө.
Уг арга хэмжээ нь хөгжлийн бэрхшээлтэй олон залуу охид эмэгтэйчүүдийг урлаг, гоо сайхнаар дамжуулан нийгэмд таниулах, тэдний идэвх чармайлт, санаачилгыг нэмэгдүүлэх, шинэлэг бүтээлч хандлага зэргийг төлөвшүүлэх зорилготой юм.
Түүнчлэн тэмцээнд оролцогч тэргэнцэртэй бүсгүйчүүд, хамтрагч моделиуд, мэргэжлийн үйлчилгээ үзүүлдэг холбоод, хөгжлийн бэрхшээлтэй иргэдийн эрхийг хамгаалдаг төрийн болон ТББ-ууд, ОУ-ын байгууллагуудын зочид төлөөлөгч, ССАЖ-ын сайдын үүрэг гүйцэтгэгч Д. Оюунгэрэл зэрэг нийт 300 орчим хүнийг хамруулсан хамгийн анхны томоохон арга хэмжээ болон ажилттай зохион байгуулагдан өндөрлөсөн юм.
Тэмцээнд оролцогч 14 бүсгүйчүүдээс авьяас, ур чадвараараа тэргүүлэн мөнгөн титмийн эзнээр Д. Цолмон гэх үзэсгэлэнт сайхан бүсгүй тодорсон ба гэр бүлийн хамт дэлхийд ганц байдаг Итали улсад байрлах дэлхийн хөгжлийн бэрхшээлтэй иргэдийн зусланд 18 хоног амрах аялах эрхийн бичгээр шагнууллаа.
Мөн авьяаслаг тэргэнцэртэй миссээр Ч. Тунгалагтуяа, оюунлаг тэргэнцэртэй миссээр Б. Батчимэг, төгс инээмсэглэлтэй тэргэнцэртэй миссээр Б. Нарантунгалаг нар шалгаран ивээн тэтгэгч зохион байгуулагчдын шагналуудыг хүртсэн билээ.
Бүсгүйчүүд тэмцээний үеэр бид хэнээс ч дутахааргүй, бусдын чаддагийг бид ч мөн чадна гэдгээ нийгэмд хандан үг, үйлдэлээрээ илэрхийлж байсан нь үнэхээр тэднээр бахархах омогших сэтгэгдлийг төрүүлж байлаа.
Мөн тэмцээний ялагч Д. Цолмон “Хөгжлийн бэрхшээлтэй сайхан бүсгүй гэж өмнө нь хэзээ ч байгаагүй. Харин бид энэ ойлголтыг үгүй хийсэндээ баяртай байна. Энэ бол ганцхан миний шагнал биш. Оролцогч бүх бүсгүйчүүдийн минь тэвчээр, урам, зориг шингэсэн шагнал юм” гэдгийг онцлон хэлж байсан билээ.