Хүүхдийн төлөө газар, Тайваний “Хүүхэд гэр бүлийг дэмжих сан”-ийн 2011 оны хамтын ажиллагааны хүрээнд Олон нийтэд түшиглэсэн “Хүүхэд, хөгжил, хамгааллын нэгдүгээр төв”-ийн дэргэд “Хүүхдийн сэтгэл зүйн нөхөн сэргээх эмчилгээний кабинет” ажиллуулахаар болжээ. Уг сэтгэл зүйн кабинет нь Монгол Улсад анх удаа Олон улсын стандартад нийцсэн хүүхдэд сэтгэл заслын үйлчилгээ үзүүлэх танхим болж, арга зүйг боловсруулан ажиллах болсноороо онцлог юм байна. Сэтгэл зүйн кабинет нь Хүүхдийн утас “Найз 1979”-д ирсэн дуудлагын дагуу бие махбодь, сэтгэл санааны дарамт болон бэлгийн хүчирхийлэлд өртсөн хүүхдэд сэтгэл зүйн зөвлөгөө өгөх, сэтгэл санааны гүн хямралд орсон хүүхдэд сэтгэл зүйн нөхөн сэргээх үйлчилгээ үзүүлэх зорилготой ажээ. Энэхүү кабинетаар дамжуулан хүүхэд, эцэг эх, олон нийтэд урьдчилан сэргийлэх сэтгэл зүйн ажил, сэтгэл зүйн оншлогоо, нөхөн сэргээх үйлчилгээ болон зөвлөгөө, зөвлөмж, сургалт сурталчилгаа зэрэг үйл ажиллагаа гэсэн үндсэн чиглэлийг баримталж ажиллах юм байна.
