Орифлеймийн сүлжээг Монголд дэлгэрүүлж, баячуудын амьдралд хөл тавьсан Г.Оюунгэрэл одоо усанд хаясан чулуу шиг нам гүмхэн амьдарч байгаа. Тэрбээр Орифлеймийн сүлжээнээс бүр мөсөн гарч байж, охиндоо бүх зүйлээ өвлүүлсэн гэдэг.
Түүнийг өмнө нь “Буян”-гийн Б.Жаргалсайханы намд удирдах алба хашиж байхдаа муудалцаж гараад Орифлеймд орж гялалзсан амжилтад хүрсэн гэх яриа олны дунд байдаг. Улс төрд хөл тавихаар шийдэж, МАХН-д хүртэл элсэн, сонгуульд өрсөлдөж байсан цаг саяхан.
Түүнийг 2011 онд Орифлеймийн ерөнхийлөгч цол хүртэхэд нь 100.000 ам.доллараар шагнаж, цөөн тооны захиалгаар үйлдвэрлэдэг дээд зэрэглэлийн тансаг “Equus” автомашиныг Орифлэйм-Монгол компаниас бэлэглэсэн гэх мэдээ чих дэлссэн. “Equus” автомашиныг БНСУ-ын ерөнхийлөгч унадаг, БНСУ-ын “Хьюндай моторс” компанийн ерөнхийлөгчөөс Монгол Улсын Ерөнхийлөгчид гардуулж байсан гэдэг. Монголд хоёрхон байдаг автомашины эзэн болсон тэрбээр шагналаа гардаж авахынхаа өмнө Монгол дээл хамгийн өндөр үнээр захиалж хийлгэсэн аж. 
Түүний захиалж хийлгэсэн дээл есөн эрдэнийн чимэгтэй. Дээлэнд орох сувдыг нь Японоос авчирч, толгойн гоёлыг цул мөнгөөр урлан, малгайн оройг нь алтаар бүрсэн гэх. Улсын эх дагиных шиг загвараар урлуулсан гоёл нь нэг ландны үнэтэй гэсэн. Г.Оюунгэрэл золтой л зөн билэгтэн болчихоогүй. Зөгнөх, зөгнөхдөө дэлхийг 2012 оны 12 сарын 21-нд сөнөнө хэмээн ярьж, олныг айх гайхах байдалд оруулаад авсан удаатай.
Бүр Улаанбаатар палас, СТӨ-нд энэ тухай лекц уншиж багагүй мөнгө халаасласан. Түүний зөгнөж хэлснээр эх дэлхий сөнөсөнгүй, харин ч Монголчууд шинэ жилээ баяр хөөртэй тэмдэглэж, шинэ оныг сэтгэл өөдрөг угтсан. Хүмүүс одоо түүнд “Маяа Оюунгэрэл” хэмээх хоч хайрласан гэнэ. Сүүлийн үед” манай Маяа сураггүй байх чинь. Хааччихсан юм бол” гэж битүүхэндээ сураг ажиг тавьж үгүйлдэг гэнэ лээ.
Тэрбээр Орифлеймийн бизнес эрхэлж байхдаа дэлхийн олон оронд очиж нүд тайлсан нэгэн. Тиймдээ ч өөрийгөө “Би дэлхийд цуурайтсан алдар хүндийг олж, өөрийнхөө санхүүгийн амьдралыг бүрэн цэгцэлчихсэн. Дэлхийн зургаан тивийн тавд нь очиж үзсэн.
Дэлхийн талыг тойрчихсон, эрдэм мэдлэгтэй болохын тулд асар их зүйл судалж, урагш алхсан” хэмээн тэрээр өөрийгөө тодорхойлсон удаатай. Явсан газар болгоноосоо тухайн улсын түүх соёлыг илтгэх сонин этгээд, чамин загвартай бэлэг дурсгалын зүйл гэртээ авчирдаг байна. 
Г.Золзаяа hiub.mn
