Хамгийн олон like-аар шилдгээ тодруулах болзолтой тус уралдаанд хоёр настай Бэлгүтэйн Ану-Үжин 4200 like-аар тэргүүлсэн бол Ховд аймгаас оролцогч Батбилэгийн Цэлмүүн 3340 хүний дэмжлэгтэйгээр удаалжээ. Хөвгүүдээс Ганбаярын Батбаатар, Золтөгсийн Энхтүшиг нар хамгийн амжилттай оролцсон бол “Хонгорзул” сэтгүүлийн редакцаас Билгүүний Есүй, Батболдын Гантөмөр нарыг сэтгүүлийн нэрэмжит тусгай байранд шалгаруулсан юм.
“Энэ хорвоогийн хүүхэд бүр хөөрхөн, тийм болохоор хүүхдүүдийн дунд тэмцээн, уралдаан зарлаж шилдгийг тодруулна гэдэг хамгийн хэцүү шалгаруулалт байлаа. Гэхдээ интернэт орчин дэлгэрсэн энэ цаг үед олон нийтийн өмнө явагдах хамгийн ил тод бөгөөд шударга шүүлт бол яах аргагүй фэйсбүүк хэрэглэгчдийн алга ташилт болсон “Like”-ны тоо гэж үзсэн юм. Ямартаа ч амьдралд өнгө гэрэл нэмж, гэгээн сайхан бүхнээр дамжуулан бусдад бодрол ухаарал төрүүлэх зорилготой Гэгээн хайрын “Хонгорзул” сэтгүүл 2011 онд сэтгүүл болсноосоо хойш уншигч, захиалагчдынхаа дунд хийсэн идэвхижүүлэлтийн ажлуудын нэг энэ байлаа” гэж тус сэтгүүлийн ерөнхий эрхлэгч О.Намчин ярьсан юм.
1990 ээд онд хамгийн их уншигч, захиалагчтай байсан Гэгээн хайрын “Хонгорзул” сонин “Хулангийн зэл”, “Сэтгэлийн анир”, “Хайрын хоймор”, “Супер дэлгэц”, “Хайрын шуудан”, “Харц”, “Сэтгэлийн хайлан” зэрэг та бидний хэзээний танил болсон булангуудаараа дамжуулан нийгмийн сэтгэлзүй болоод хүмүүсийн харилцаанд эерэг үр тарьсаар ирсэн Монголын тогтмол хэвлэлийн түүхэнд гавьяатай сонин билээ. Одоо тус сонин өнгө төрхөө өөрчлөн сэтгүүл байдлаар хэвлэгдэх болсон ч өнөө л таны хүсэн хүлээдэг амьдралын үнэн мөнийг хайрын хүчээр илэрхийлэн бичсээр байх болно.
