БНХАУ-ын Манжуурын 11 дэх удаагийн Хятад, Орос, Монгол олон улсын гоо бүсгүйг тодруулах тэмцээний эцсийн шалгаруулалт энэ сарын 24-ны өдөр тус хотод амжилттай болж өндөрлөлөө. БНХАУ-ын Өвөрмонголын өөртөө засах орны Хөлөнбуйр аймгийн Манжуур хотноо зохион байгуулагдсан энэхүү олон улсын тэмцээнд ОХУ, БНХАУ болон Монгол улсын нийт 58 гоо бүсгүй оролцож, арав гаруй хоногийн турш гоо үзэсгэлэн, авъяас чадвар, оюун ухаанаараа өрсөлдсөн юм. Эцсийн шатны шалгаруулалтад манай улсын гоо бүсгүй Н.Ану тэргүүн байр эзэллээ. Ингээд тэргүүн байрын эзэн Н.АНУТАЙ цөөн хором ярилцлаа.
-Хятад, Орос, Монгол олон улсын гоо бүсгүйн тэмцээнд тэргүүн байр эзэллээ. Сэтгэгдлээсээ хуваалцахгүй юу?
-Юуны өмнө Манжуур хотоос нийт монголчууддаа энэ өдрийн мэндийг хүргэе. 11 дэх жилдээ зохиогдож гурван улсын гоо бүсгүй шалгаруулах тэмцээнд амжилттай оролцож тэргүүн байрт шалгарсандаа сэтгэл маш өндөр байна. Мөн нийт шагнал авсан гоо бүсгүйчүүддээ баяр хүргэе.
-Өөрийгөө тэргүүн байрт шалгарна гэдэгт хэр итгэлтэй байв?
-Тэмцээнд анхнаасаа л түрүүлнэ гэсэн зорилт тавьж ирсэн. Шат ахих тусам би түрүүлнэ гэсэн итгэл төрж байлаа. Энэхүү тэмцээнд манай улсаас жил бүр оролцдог. Үүнээс тав дахь удаагаа тэргүүн байрыг аваад байгаа юм. Өө тийм, би нэг зүйлийг хэлэхийг хүсч байна. Хятад, Орос, Монгол олон улсын гоо бүсгүй шалгаруулах тэмцээний тэргүүн байрыг мэдээж тодорхой хэмжээний мөнгөн шагнал дагаж ирдэг. Гэхдээ хэд гэдэг тоо нь энд чухал биш байх. Би нэг зүйлд маш их сэтгэл зовинож явдаг юм. Тэр нь эмнэлгийн асуудал. Сүүлийн үед утаанаас болж ханиад томуу, уушигны элдэв өвчин маш их дэгдэж байна. Энэ талаар өмнө нь” судалж байсан. Тэгэхэд манайд бага насны хүүхдүүд уушигны өвчнөөр маш их өвдөж, зарим нь нас барсан байдаг юм билээ. Тиймээс л би өөрт байгаа бүх л боломжоо ашиглаж хүүхдийн эрүүл мэндэд бага ч болов анхаарал тавьж, сэтгэлээсээ туслахаар шийдсэн. Тиймээс энэ удаагийн шагналаа эмнэлгийн байгууллагад хандивлах болно. Цаашдаа ч боломж гарах бүрт би эх орныхоо эмнэлгийн байгууллагуудад чин сэтгэлээсээ туслах болно.
-Манай улсыг төлөөлж тус тэмцээнд 15 гоо бүсгүй оролцсон байгаа. Эдгээрээс шалгаруулалтын явцад хасагдсаар эцсийн шатанд 10 охин үлдсэнээс гол шагналуудыг манай гоо бүсгүйчүүд авлаа шүү дээ. Энэ бүхэнд хүрэхийн тулд чамгүй бэлтгэл, хичээл зүтгэл шаардагдсан байх?
-Эзэн хичээвэл заяа хичээнэ гэж ардын маань сайхан үг бий. Энэ утгаараа бид маш их хичээсэн. Бид Манжуур хотод ирээд 18 хонож байна. Маш их бэлтгэл хийж, хөлс, хөдөлмөр багагүй гаргасан. Бүгдээрээ ялахын төлөө өдөр шөнөгүй бэлдэж бүх л нөөц бололцоогоо дайчилсан. Манай охид ямар вэ гэдгээ харууллаа. Энэ бүх явцад ядарлаа гэж нэг ч хэлж байгаагүй. Үүнийгээ ч мэдэх сөхөөгүй байжээ. Одоо л хэлмээр санагдлаа. Ядарсан байна шүү.
-Гуравдугаар байрт манай улсын гоо бүсгүй н. Алтанзул, А.Сайхантамир нар шалгарлаа. Өөр хэдэн гоо бүсгүйчүүд ямар шагналт байрт оров. Энэ талаар дэлгэрэнгүй мэдээллийг уншигчдад өгөхгүй юу?
-Хятад, Орос, Монгол олон улсын гоо бүсгүй шалгаруулах тэмцээний шилдэг аравт манай улсаас Уярал, Ундрал нар шалгарлаа. Гуравдугаар байрт Алтанзул, А.Сайхантамир нар шалгарсан. Түүнчлэн Алтанзул маань л хамгийн гоё биетэй миссээр мөн А.Сайхантамир шилдэг үндэсний хувцастай миссээр өргөмжлөгдлөө. Хоёрдугаар байрт ОХУ болон Хятад улсын гоо бүсгүйчүүд шалгарсан.
-Үндэсний хувцасны үзүүлбэрт А.Сайхантамир тэргүүлсэн. Бусдаасаа содон үнэхээр сайхан харагдаж чадсан. А.Сайхантамир шилдэг үндэсний хувцастай миссээр өргөмжлөл хүртэхэд үзэгчид сэтгэл хангалуун, алга ташиж хүлээж авсан шүү дээ.
-Бусад улс орны үндэсний хувцсыг бодвол манай үндэсний хувцас үнэхээр сүрлэг сайхан шүү дээ. Бид үндэсний хувцасны үзүүлбэрт шалгарна гэдэгтээ итгэлтэй байсан. Учир нь манай үндэсний хувцас дэлхийд цор ганц. Яаж ч өөрчилж хийсэн хэв шинжээ хадгалсаар л байдаг. Мөр тэгш, өөртөө итгэлтэй, хатан төрхийг бүрдүүлж өгдөг.
Ж.ОТГОНЧУЛУУН /ҮНДЭСНИЙ ШУУДАН/
