Э.Азбилэг: Уран нугаралтыг дэлхийн тавцанд гайхуулах нь миний зорилго

Монгол үндэсний өв их соёлыг олон улсын тайзан дээр гайхуулж, алдраа дуудуулсан соёлын тэргүүний ажилтан, уран нугараач Э.Азбилэгийг ярилцлагын зочноор урилаа. БНСУ-ын Сөүл хотод шинэ оны өмнөхөн болсон дэлхийн авьяаслаг мисс шалгаруулах тэмцээнд тэрээр оролцож, дэд байрт шалгарсан юм.

862932554981e86784f213

-Дэлхийн авьяаслаг мисс шалгаруулах тэмцээнд үзүүлсэн таны нум сумтай үзүүлбэр содон байсан. Нум сумтай үзүүлбэрээ хэр хугацаанд бэлтгэсэн бэ?

 

-Энэхүү наадамд оролцох болсноо тэмцээн болохоос сарын өмнө мэдсэн. БНСУруу явахаас 10 хоногийн өмнө нум сумтай үзүүлбэрээ өдөр шөнөгүй бэлтгэсэн. Түүний хажуугаар бусад зүйлээ бэлтгээд яваад ирлээ. Энэ тэмцээнд оролцохын өмнө танай сонинд өгсөн ярилцлагадаа “Дараагийн удаад титэм авдаг тэмцээнд явна” гэж хэлсэн. Тэр үед хэлсэн зүйл маань биеллээ олж дэлхийн авьяаслаг мисс шалгаруулах тэмцээний дэд байрт шалгарч титэм зүүлээ.

 

-Тэмцээнд оролцсон авьяаслаг бүсгүйчүүд дунд урлагийн мэргэжилтэй хүн ч байлаа. Өрсөлдөгчид хүчтэй байв уу?

 

-Тэмцээний үеэр бүсгүйчүүд ихэвчлэн дуулж, бүжиглэсэн. Тэр дунд мэргэжлийн саксофончин хүртэл байлаа. Улс орнуудаас шилэгдсэн миссүүд оролцсон болохоор урлагийн гайхалтай тоглолт үзүүлсэн оролцогчид байв. Гэхдээ би Монголын брэнд болсон уран нугаралтын үзүүлбэр бэлтгэж оролцсон нь бусдаас онцгой байсан гэж бодсон. Уран нугаралтын үзүүлбэртээ эмэгтэй хүний гоо сайхан, монгол эмэгтэй хүн ямар авьяастайг харуулахыг зорьсон. Ер нь миний үзүүлбэр тэр чигээрээ Монголын үндэсний урлагийг харуулсан. Авьяас номинацийн эхний шалгаруулалтыг эхлээд миссүүд дунд зохион байгуулсан юм. Нум сум урлаач миний үзүүлбэрт зориулан өлзий хээ, арга билэгтэй маш сайхан бүтээл урласан. Мэдээж уран нугаралтад зориулан хийсэн болохоор харьцангуй зөөлөн, жижиг хэмжээтэй байсан. Үзүүлбэрийг үзэж байгаа хүнд бэлэг дурсгалын зүйл шиг харагдсан боловч жинхнээсээ ялгарахгүй. Би үзүүлбэрийнхээ хөгжмөөр төгөлдөр хуурч Б.Чинбатын “Ану хатан” киноны аялгууг сонгосон. Харин бүжиг дэглэлтийг Төгсөө багшаар тавиулсан. Ерөнхийдөө өөрийнхөө хүссэнд хүртэл үзүүлбэрээ толилуулсан гэж бодож байна.

 

-Нум сумтай уран нугаралтын үзүүлбэрийг өмнө нь хийдэг байв уу, эсвэл тэмцээнд зориулан бэлтгэсэн үү?

 

-Би “Монгол төрх” уран нугаралтын хамтлагийн охидтой Испани улсад жил зургаан сар ажиллаж, амьдарч байхдаа энэхүү үзүүлбэрийг үзүүлдэг байсан. Тэр үед ганц би гэлтгүй бүгд л хөлөөрөө нум сум харвадаг байв. Гэхдээ Монголд ирснийхээ дараа нум сумтай үзүүлбэрээ үзэгчдэд тоглоогүй. Харин өнгөрсөн тэмцээнд бэлтгэж байгаад оролцсон нь өндөр үнэлгээ авлаа.

 

-Тэмцээний тэргүүн байрт шалгарсан Энэтхэгийн мисс ямар тоглолт үзүүлсэн бэ?

 

-Энэтхэг бүжиг бүжиглэсэн. Гэхдээ миний бодлоор энэтхэг бүсгүй бүжгээ мэргэжлийн төвшинд хүртэл бүжиглээгүй гэж бодож байна. Хөдөлгөөнөө дутуу хийгээд байгаа юм шиг санагдсан. Яагаад гэхээр би урлагийн хүн, дээрээс нь энэ чиглэлээр суралцаж байгаа болохоор мэргэжлийн талын зүйлийг нь илүү мэднэ. Гэхдээ тэмцээнийг шүүж байгаа шүүгчид оролцогчдын олон зүйлийг харж шалгаруулсан байх. Бусад тэмцээнүүдтэй адилхан мөртлөө оролцогчдоос гарах бүхий л авьяас, ур чадварыг шаарддагаараа онцлогтой. Тэмцээ ний шалгаруулалтын дунд шилдэг дуучин, бүжигчин шалгаруулсан юм. Түүний авьяасын номинацид би тэргүүлсэн.

 

-Тэмцээний шалгаруулалтын үеэр оролцогчид нэг нэгнийхээ хувцсыг урах, хорлох тохиолдол гардаг гэсэн. Өнгөрсөн тэмцээний үеэр тийм зүйл болов уу?

 

-Афганистаны бүсгүй дотуур тамиртай юм шиг санагдсан. Ер нь тэмцээний оролцогчдоос Монгол, Таиландын оролцогч л авьяасаа үзүүлсэн юм. Тэгэхэд тэр бүсгүй “Хоёрхон орны оролцогч асвьяасаа үзүүлж байгаа юм уу. Тэгвэл тэмцээний ялагч нь бараг тодорчихсон юм байна” гэсэн. Тэгэхээр нь би Афганистаны мисстэй уулзаад “Уучлаарай, миний талаар битгий яриач” гэж хэлсэн. Дараа нь тэр охин Сибирээс ирсэн оролцогчтой муудалцаж, шатнаас түлхүүлсэн гэсэн яриа гарсан байна лээ.

 

-Таныг “Уран нугараач мисс” гэдэг боллоо. Цаашид загварын чиглэлээрээ дагнах уу, эсвэл уран нугаралтаар үргэлжлүүлэн хичээллэх үү?

 

-Алийг нь ч орхихгүй. Би ойрын хугацаанд бие даасан тоглолт хийх төлөвлөгөөтэй байгаа. Тоглолтдоо өөрийнхөө сурсан мэдсэн бүхий л зүйлээрээ хүмүүст толилуулахыг бас тэдний сэтгэгдлийг нь сонсохыг хүсч байна. Үнэнийг хэлэхэд Монголд уран нугаралтаар хоолоо олж идэх боломжгүй. Тийм болохоор бие даасан тоглолтоороо дамжуулан өөрийгөө таниулах, сурсан мэдсэнээ үзүүлэхийг хүссэн юм. Эмэгтэй хүн болсон хойно хэсэг цаг хугацаа өнгөрсний дараа хүний хань, хөөрхөн хүүхдийн ээж болно. Түүнээс өмнө л өөрийнхөө хүссэн бүхнийг хиймээр байна. Ер нь би хүүхэд төрүүлснийхээ дараа дахиж нугарахгүй гэж боддог. Хүүхдэдээ, өөрийнхөө эрүүл мэндэд ч анхаарал хандуулна гэж бодож байна.

 

-Та одоо ямар ажил эрхэлж байна вэ?

 

-Миний харьяалагддаг “Андра модель” агентлаг бүжгийн хамтлагтай. Би тэр хамтлагийн гишүүн. Хааяа манай хамтлагийг урьж бүжиглүүлдэг. Тийм л ажил хийж байна. Мөн загварын шоунд оролцдог.

 

-Загвар өмсөгч, моделиуд дэлхийн сайхан бүсгүй шалгаруулах тэмцээнд оролцохыг хүсдэг. Танд ч гэсэн тийм хүсэл байгаа болов уу?

 

-Уран нугаралтаа дэлхийн миссийн тавцанд гайхуулах нь миний нэг зорилго. Энэ жилийн дэлхийн сайхан бүсгүй шалгаруулах тэмцээнд топ модель Х.Бадамгэрэл багш маань надаас “Оролцох уу” гэж асуусан. Тэр үед би өөрийнхөө ур чадварыг мэдэж байсан болохоор дэлхийн сайхан бүсгүй шалгаруулах тэмцээнд оролцохоос татгалзсан. Харин одоо бол би тэр тэмцээнд оролцох хүсэл тэмүүлэлтэй болсон. Дээр нь тодорхой хэмжээнд туршлага хуримтлууллаа. Тиймээс би ирэх онд болох дэлхийн сайхан бүсгүй шалгаруулах тэмцээнд хүч үзэх бодолтой байна. Тэгж оролцохын тулд хамгийн чухал нь хүмүүнлэгийн ажил хийх гэдгийг ойлгож байгаа.

 

-Та СУИС-ийн бүжгийн ангид суралцдаг. Ямар төрлийн бүжгийг сонирхдог бол?

 

-Анх бүжиг сурахад амархан гэж боддог байлаа. Гэтэл мэргэжлийн сургуульд орсон чинь амаргүй гэдгийг мэдсэн. Ялангуяа уран нугараачид аливаа үзүүлбэр үзүүлэхдээ хамаг ачааллаа гар дээрээ төвлөрүүлдэг. Түүнээс болоод цээжин хэсэг нь хатуу, уян хатан биш болдог юм. Бүжиглэхэд хүн уян хатан байх ёстой. Энэмэтчилэн хийх, сурах зүйл их байлаа.

 

-Кино, сурталчилгаанд тоглох санал ирж байна уу?

 

-Ирээгүй. Гэхдээ уран бүтээлд нь тоглохоор ярилцсан зүйл бий. Бас дэлгэцийн бүтээлд тоглох бодолтой байгаа. Хамгийн сүүлд “Алтан сарнай”-д оролцож Нийгмийн Ардчилал Монголын оюутны холбооноос олгодог шилдэг оюутнаар тодорсон.

 

Б.Сэлэнгэ

- See more at: http://www.unen.mn/content/44707.shtml?alias=entertainment#sthash.S6Kk1Mmg.dpuf

чехлы для macbook pro 15dubai uk escorts


Э.Азбилэг: Уран нугаралтыг дэлхийн тавцанд гайхуулах нь миний зорилго
Жиргэх
Манай хуудсанд LIKE дарж нэгдэнэ үү

Сэтгэгдэл бичих

АНХААРУУЛГА: Уншигчдын бичсэн сэтгэгдэлд MISS.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 7711-0505 утсаар хүлээн авна.