Солонгосын UG энтертайнментын дуучин PSY-ын “Ганнам стиль” дуу түүнийг дэлхийн хэмжээний од болгосон билээ. Энэ дуу youtube сайтад бүх цаг үед хамгийн богино хугацаанд хамгийн олон хүн үзсэн видео болсон бол дэлхий нийтийг өргөнөөр хамарсан анхны Солонгос дуу болсон. Долдугаар сарын 15-нд “Ганнам стиль” дуу цацагдсанаас хойш 161 сая хүн үзжээ.
PSY-ийн дуу ингэж алдарших болсонд дуучны чадвараас гадна морины бүжиг хамгийн их нөлөөлсөн. Түүний морины бүжгийг алдарт дуучин Лэди Гагагийн бүжгийн хэмнэл, элемент, хэв маягийг илүү хошин хэлбэрээр дүрсэлсэн хэмээн гадны хэвлэлүүд бичиж байсан. Харин PSY үүнийг үгүйсгэж “Дэлхий дулаарч, эдийн засаг хямарч буй өнөө үед хүмүүсийг ганц удаа инээлгэе хэмээн энэ дуугаа хийсэн. Тэднийг инээлгэхийн тулд хөгжилтэй бүжиг бодож олох хэрэгтэй болсон” гэж CNN телевизэд өгсөн ярилцлагадаа дурссан байна.
Гэтэл урлагт хайртай хэсэг монгол залуус солонгос дуучны брэнд бүжгийг монгол үндэсний бүжгээс хулгайлсан хэмээн үзжээ. Эх сурвалжийн мэдээлснээр тэд PSY-ийг морины бүжгээ УГЗ Э.Чойдогийн хөгжим, АЖ Б.Сэвжидийн дэглэлт “Жалам хар” бүжгээс хулгайлсан гэж үзээд, Оюуны өмчийн газраар эргэлдэж байгаа сурагтай. Тэд эх сурвалжид “Солонгост морины бүжиг дэлгэрэх ахуй байхгүй. Харин манай Монголд бүжигчид нь өөрсдөө бүжиглэсэндээ бахархаж явдаг Жалам хар, түүнээс гадна олон ч морины бүжиг бий. Хэн ч монголын үндэсний бүжиг гэж хэлэхэд Жалам хар эсвэл морины хөдөлгөөнийг төсөөлдөг. Бид үндэсний өв соёлоо хулгайд алдмааргүй байна” хэмээн ярьсан байна.
Үндэсний бүжгээ бусдаас харамласан тэд монгол морины бүжиг, тэр тусмаа Жалам хар Оюуны өмчийн газарт бүртгэлтэй эсэх, үгүй бол бүртгүүлэх боломжтой эсэх зэргийг судалж байгаа юм. Хэрвээ энэ ажил нь амжилттай болвол тэд хэвлэлийн бага хурал зарлах юм байна. Мөн PSY-ийг монголын үндэсний бүжгээс хулгайлсан гэх нотолгоог дэлгэх юм байна.
www.24tsag.mn