Чийглэг, бас цэвэрхэн, уян зөөлөн, бага зэрэг ягаан туяатай, идээт үрэвсэлгүй, тосны хэмжээ хэвийн байвал та арьсаа эрүүл байна гэж үзэж болно. Хүний биеийн арьсны байнга ил байдаг хэсэг бол нүүрний арьс.
Тиймээс гадны нөлөөллөөс амархан бохирддог. 16-аас дээш насныхан ямар нэг хэмжээгээр арьсандаа байнга анхаарал хандуулж байх хэрэгтэй. Хэрвээ 25-аас дээш насанд хүрсэн бол та өөрийн арьсны өөрчлөлт, онцлогийг мэддэг өөрийн гэсэн гоо сайханчтай болох нь зүйтэй.
Мөн боломжтой бол долоо хоногт нэг удаа мэргэжлийн гоо сайханчаар иллэг хийлгэж байвал арьс тань эрүүл, залуу байдлаа хадгална. Хамгийн их анхаарал халамж шаарддаг арьс бол мэдрэмтгий арьс юм.
Ямар нэг гоо сайхны бүтээгдэхүүн худалдан авахдаа эхлээд өөрийн арьсны онцлогийг сайтар бодууштай. Арьс хорсох, загатнах зэрэг шинж тэмдэг илэрвэл хэрэглэж байгаа бүтээгдэхүүн тань тохирохгүй байгаагийн шинж.
Тохироогүй бүтээгдэхүүн нь арьсыг маш амархан үрчлээтүүлж, өнгийг нь алдагдуулдаг. Арьс дараах үндсэн шинжүүдтэй байдаг.
Тослог арьс
Их хэмжээний тос ялгарч царай ерөнхийдөө боровтор өнгөтэй. Гадны тоос шороонд амархан бохирддог учир сайн цэвэрлэхгүй бол арьс үрэвсдэг. Иймээс өдөр бүр гүн цэвэрлэгээ хийж байх нь чухал.
Холимог арьс
Энэ нь тослог болон хуурай арьсны шинжийг давхар агуулж байдаг. Ихэвчлэн нүүрний төв буюу дух болон хамрын хэсгээр тослог. Харин нүдний эргэн тойрон болон хацар хавиар хуурай байна. Ийм арьс нь холимог өнгө ялгарч харагддаг.
Ердийн арьс
Хэрвээ таны арьсанд дээрх шинжүүд илэрээгүй бол арьсаа эрүүл байна гэж үзэж болно. Яагаад гэвэл ийм төрлийн арьсанд тослогийн хэмжээ багаар агуулагддаг учир уян хатан шинжтэй байдаг.