Амтат жигнэмэг хүний амьдралыг өөрчлөх боломжтой юу? Тэгвэл Энэтхэгийн Пуджа Дингра бүсгүйн амжилтын түүх Францын алдарт макарон жигнэмэгээс (өндөгний цагаан, нунтаг элсэн чихэр, бүйлсний гурилаар хийсэн жигнэмэг) эхэлсэн юм.
Нарийн боовны тогооч болох хүсэлдээ хөтлөгдсөн Дингра бүсгүй энэ чиглэлээр мэргэшихээр 2008 онд Парис иржээ. Нэгэн өдөр Динграгийн ангийн найзууд нь түүнийг Францын алдартай амттан макароныг идэж үзээгүйг мэдээд хамгийн амттай макарон хийдэг хэмээн тооцогддог Парис хотын нэгэн кафед дагуулж очив.
Макарон жигнэмэгний ганц зүсэм Дингра Энэтхэгт нутагтаа буцаад очихдоо тус жигнэмэгний кафе нээхээр шийдэхэд хангалттай байв.
Энэ талаар тэрбээр “Гэнэтийн сонсогдож болох ч, анх макарон жигнэмэг идсэний дараа би амьдралд цаашид юу хиймээр байгаагаа ойлгосон. Энэтхэгт ирээд бүйлсний жигнэмэгний дэлгүүр нээх бол миний хувь тавилан байсан” гэж хэлжээ.
Өдгөө 28 настай Дингра Мумбай хотод макарон жигнэмэгний Le 15 Patisserie хэмээх гурван дэлгүүрийг амжилттай ажиллуулж байна. Мөн энэ жил Мумбайд дахин гурван дэлгүүр нээх төлөвлөгөөтэй байгаа аж. Түүнчлэн Энэтхэгийн бусад хотуудад салбар дэлгүүрээ нээн, бизнесээ өргөжүүлэх түүний туйлын мөрөөдөл.
Гэсэн хэдий ч Энэтхэгийн залуу бизнесмений хэлж буйгаар түүний амжилтын зам үргэлж дардан байгаагүй гэнэ.
Анхны бэрхшээлүүд
Дингра анх хуульч болох сонирхолтой байв. Тэрбээр Мумбай хотын их сургуульд суралцаж байхдаа өөрийгөө илүү бүтээлч мэргэжилд зориулахыг хүсч буйгаа ойлгожээ.
Хүүхэд байхдаа гал тогоонд ихэнх цагаа өнгөрөөдөг байсан Дингра ээждээ туслан гал тогоонд өнгөрүүлсэн цаг хугацаа өөрт нь хэрэг өмгөөлөх, шүүх ажиллагаанд оролцохоос илүүтэй баяр баясгаланг авчирдагийг ойлгожээ. Ингээд Дингра Швейцарьт аялал жуулчлал, менежментийн чиглэлээр суралцахыг зөвшөөрөхийг эцэг эхээсээ гуйв.
Тэрбээр Швейцарийн коллежид гурван жил, дараа нь Парисын алдарт Le Cordon Bleu коллежид нэг жил суралцсан. Эх орондоо эргэн ирээд макарон жигнэмэгний өөрийн гэсэн жорыг боловсруулахын тулд гэрийнхээ гал тогооноос бизнесээ эхэлсэн юм.
Динград тохиолдсон анхны хүндрэл Энэтхэгийн цаг агаарын байдал байв. Учир нь Мумбай хотын агаарын дундаж температур болон чийгшил Парис хотынхоос хамаагүй өндөр байсны улмаас макарон жигнэмэг амархан хайлж, хэлбэрээ алдаж эхэлжээ.
“Анх макарон жигнэмэгээ хийж эхлэхдээ нэг хэсэг болж өгөхгүй байсан. Эцэст нь зургаан сар, 60 жорын дараа л гэхэд Энэтхэгийн уур амьсгалыг тэсвэрлэх чадвартай жигнэмэгийнхээ жорыг гарган авсан”.
Макарон жигнэмэгний жорын асуудал шийдэгдсэний дараа Динграгийн аав түүний бизнест хөрөнгө оруулалт хийхээр болов.
Гэвч асуудал энүүгээр дуусаагүй. “Хамгийн том асуудал эргэн тойрны хүмүүстээ өөрийнхөө бизнесийг хүлээн зөвшөөрүүлэх явдал байсан. Тухайлбал дэлгүүрээ түрээслэх, эсвэл тоног төхөөрөмж худалдан авахын тулд ааваараа асуулгадаг байсан. Учир нь Энэтхэгт эмэгтэй хүн нийгэмд өөрийгөө хүлээн зөвшөөрүүлэх хамгийн хэцүү. Энэтхэг дэх хүнд сурталыг даван туулах амаргүй байлаа” гэж Дингра хэллээ.
Дингра бэрхшээлийг үл хайхран 2010 онд хувийн дэлгүүрээ нээн, одоо 40 гаруй хүнийг удирдан ажиллаж байна.Тэрбээр дэлгүүрээ Le 15 Patisserie хэмээн нэрлэв. Энэ нь Парист сурч байхдаа түүний амьдарч байсан гудамжны нэр юм.
“Макарон жигнэмэгийн хатан хаан”
Мумбайд Францын алдарт амттан макароны тухай маш цөөхөн хүн мэддэг байжээ. Иймээс Дингра өөрийн бизнесээ сурталчлахын тулд хамгийн эхлээд энэтхэгчүүдийг энэхүү амттантай танилцуулахаар шийдэв. Үүний тулд дэлгүүртээ үнэгүй амталгаа явуулсан юм.
Төд удалгүй макарон жигнэмэг Мумбайчуудын дуртай амттаны нэг болов. Дингра макарон болон бусад амттанг хэрхэн хийх мастер класс явуулж эхэлсэн байна.
Үүний дараа нарийн боов хийх тухай номоо гаргасан нь Энэтхэгийн шилдэг борлуулалттай номуудын нэг болсон юм.
Орон нутгийн хэвлэлүүд түүнийг “Макарон жигнэмэгний хатан хаан” хэмээн нэрлэх болжээ.
Дингра бүсгүйн бизнес амжилтанд хүрсэний дараа Мумбайд макарон жигнэмэгний дэлгүүр, кафе олширч байгаа аж.
Энэ талаар Динграа санаа зовохгүй байгаа бөгөөд харин ч өрсөлдөөн түүнийг илүү их хурцалж өгнө. Бид тэднээс нэг алхам түрүүлж явна гэв.
Тэрбээр дэлхий даяар охид, бүсгүйчүүдэд хандан эрсдэлээс айхгүй байхыг өөрийн бизнесээ нээхийг уриалж байна.
“Шаргуу ажиллаж, зовлон бэрхшээлийг даван туулах хэрэгтэй болно. Гэхдээ үүнийг даван туулах урам таньд хангалттай байгаа бол амжилт тань дээр өөрөө ирнэ” хэмээн Дингра хэллээ.
Эх сурвалж: ВВС
Х.Көгершин | GoGo.mn