Супермодель Хайди Клумын Австралийн “ELLE” сэтгүүлд ярилцлага өгчээ. Энэхүү ярилцлагыг хүргэж байна.
-Таныг сүүлийн үед загварын тайз бус “America’s Got Talent” шоуны шүүгчийн хувиар дэлгэцнээс их харах боллоо?
-Тиймээ. Миний амьдралын хамгийн хөгжилтэй бас сэтгэл догдолсон мөчүүд шүүгчийн ширээний ард өнгөрч байна. Үнэхээр жаргалтай, мартагдашгүй мөчүүдийг мэдэрч байгаадаа жаргалтай байна. Америкчууд их авъяастай гэдгийг өмнө нь мэддэг л байсан. Гэхдээ ийм гайхалтай төгс гэдгийг шүүгч болоод л мэдлээ. “Хөөх” гэсэн үзүүлбэрийг байнга харж байна. Үнэхээр энгийн бус ард түмэн юм аа.
-Тайзан дээр алхах, шүүгч хийх хоёрын аль нь хүнд байна?
-Тайзан дээр гарвал чи хамгийн үзэсгэлэнтэй, төгс байх учиртай. Гэхдээ энэ бүхнийг үзэгчдэд мэдрүүлэхийг хүссэн ч загвар өмсөгч хэдхэн секунт л тайзан дээр алхдаг. Өөрийнхөө чадвартай эсэхээ хэдхэн секунтын дотор л үзэгчдэд мэдрүүлэхгүй бол тэр чигтээ мартагдах эрсдэлтэй. Алхах үедээ өөрийнхөө давуу талыг үзэгчдэд ойлгуулах, гайхуулах амаргүй. Олон жил загварын тайзан дээр алхаж буй мөртлөө алдаршаагүй олон охид, бүсгүйчүүд бий. Харин шүүгчийн суудалд суугаад хэн нэгний хувьд тавиланг шийдэх үнэхээр хэцүү. Оролцогчид тайзан дээр алхаж буй загвар өмсөгчид шиг хурдан хугацаанд өөрийн авъяасаа шүүгчдэд болон үзэгчдэд харуулах ёстой. 1-2 минутын дотор чадвараа харуулахгүй бол чи ялагдагч болохгүй. Загварын тайзан дээр загвар өмсөгч хамгийн удаандаа 20-30 секунт алхдаг. Энэ хугацаанд л чадвараа харуулахгүй бол чи зүгээр л нэг загвар өмсөгч болно. Тиймээс энэ хоёрын нэгийг нь хүнд, амархан гэж ангилахыг хүсэхгүй байна. Хоёулаа хүнд. Гэхдээ олон жил тайзан дээр алхсан учир илүү амар, тайван болсон. Цаг хугацаа алт гэдгийг хоёулаа мэдрүүлж байгаа.
-Сүүлийн үед таныг загварын тайзаа орхиж бизнесмэн хатагтай болсон хэмээн хэвлэлүүд мэдээлж байгаа. Энэ тухай?
-Би олон жил загварын ертөнцийн нэг хэсэг болон амьдарч байна. Би энэ ертөнцийн талаар хангалттай мэднэ. Тийм ч амархан энэ ертөнцөөс явж чадахгүй. Өдөр бүр залуухан охид загварын ертөнцөд хүч түрэн орж ирэхийг хараад өөрийгөө их зэмлэдэг. “Чи ийм хөгшин болчихоод, яагаад тайзаа орхиж чадахгүй. Юунд хорогдоод байгаа юм бэ?” гэх мэтээр өөрийгөө их зэмлэдэг. Гэхдээ би тайзан дээр алхахаас өөр зүйл хийж чадахгүй. Би 16 настайдаа загвар өмсөгч болсон. Би хэрхэн зураг авахуулах, хэрхэн алхах, хэрхэн гоо үзэсгэлэнтэй харагдахаа мэддэг. Харин хоол хийх, хувцас угаах, юм оёхыг мэдэхгүй. Мэргэжил бүхэн өөр. 20 жил эмч хийсэн хүн нэг л өдөр эмчийнхээ ажлыг орхиж чадахгүй. Хэдий би загварын тайзнаа гарахад нас минь ахдах ч гэсэн энэнээс өөр ажил хийж чадахгүй учир насаа үл тоон алхаж байна. Хувийн бизнестэй болох санааг загварын ертөнц л зөвлөсөн. Охид, бүсгүйчүүдэд зориулсан дотуур хувцсыг гаргасан. Их сайн зарагдаж байгаа.
-Өнгөрсөн тавдугаар сард таны сайн найз, Бразилийн загвар өмсөгч Жизель Бундхен загварын тайзаа орхисон. Гэнэтийн мэдээ танд ямар санагдсан вэ?
-Жизель бол шилдэг загвар өмсөгч. Бид нөхөрлөөд 10 гаруй жил болж байна. Загварын ертөнц дэх хүчтэй өрсөлдөгч минь. Би энэ бүсгүйгээс урам авдаг. Жизель ч сүүлчийн удаа алхаж буйгаа мэдэгдсэн. Их сонин санагдсан. Гэнэт уйлмаар, тийм л гунигтай байсан. Гэхдээ энэ бүсгүйн сонголтыг эсэргүүцэх эрх надад байхгүй.
-Жизель Бундхен таны өрсөлдөгч байсан гэлээ. Ямар байдлаараа?
-Энэ бүсгүй надад зурган дээр хэрхэн дур булаам гарахыг зааж өгсөн. Багш минь. /инээв/ Гэхдээ тайзан дээр өрсөлдөөн байдаг учраас бид хөгждөг.
-Та экс нөхөртэйгээ холбоотой байгаа юу?
-Тиймээ. Бид салсан ч Сиел дөрвөн хүүхдийн минь эцэг. Хамгийн гол нь бид одоог хүртэл нэг нэгнээ хайрладаг, хүндэлдэг.
-Салалтын тухай асуухыг хүсэхгүй байна. Та хоёр ярилцсаны эцэст энэхүү шийдвэрийг гаргасан байх?
-Зөв. Салалт тийм ч амархан зүйл биш. Сэтгэлийн тэнхээ л сэтгэлийн шархыг эмчилдэг.
-Сүүлийн үед хэвлэлүүд Сиелийн болзоо, шинэ дурлалынх нь талаар мэдээлэх боллоо. Салсан ч гэсэн нэг хэсэг хайрлаж байсан залуу тань өөр бүсгүйтэй болох ямар санагдав?
-Бид салсан учир нэг нэгнийхээ хувийн амьдралд оролцохгүйг хичээж байгаа. Сиел гайхалтай эр хүн, эмэгтэй хүнийг хэрхэн жаргалтай байлгахаа мэддэг төгс эр хүн. Энэ залуу их удаан ганцаараа явлаа. Шинэ дурлалтайгаа учирсанд нь би тун баяртай байна. Сиел хайрлах, хайрлуулах эрхтэй. Сиелийг тархи минь л мартаж чадахгүй байгаа болохоос зүрх минь аль хэдийнэ мартсан.
-Та харамсахгүй байна гэж үү. Түүний сонголт Австралийн тэрбумтан Жеймс Паркерийн эхнэр Эрика шүү дээ. Их сайхан бүсгүй?
-Харамсахгүй байна. Учир нь миний алдаанаас болж бид салсан. Бид салаад удаагүй байхад би эхэлж найз залуутай болж шинэ харилцааг эхлүүлсэн. Харин Сиел эр хүн, аав хүний хувиар гэр бүлдээ үнэнч байж, хэсэг хугацаанд ганцаараа байсан.
-Эрикагийн тухайд. Та хоёрыг найзууд байсан гэсэн?
-Хэсэг хугацаанд л. Эрика сайн бүсгүй.
-Вито Шнабель танд гэрлэх санал тавьсан уу?
-Үгүй ээ.
-Та хоёрыг гэрлэх гэж байгаа гэсэн?
-Ийм мэдээлэл цацагдаад байгаа. Гэхдээ энэ бол худлаа.
-Гэрлэх үү?
-Сайн мэдэхгүй байна. Нөхрөөс илүү найз залуу надад таалагдаж байгаа.
Б.Дэлгэрцэцэг
shuud.mn