ЯРУУ НАЙРАГЧ С.УУГАНБАЯР
Уран үгсийн манлайд цалгиж, яруу найргийн тэнгэрт одод чуулуулсан нэгэн ном хэвлэгдээд удаагүй байна. Энэ ном бол яруу найрагч Санзайгалсангийн Ууганбаярын “Тавилангийн цэцэрлэг” билээ.
НАДААС УРТ ОН ЖИЛҮҮД…
Өр зүрхнээс минь урт он жилүүд гэж байхгүй
Өвлийн хорвоо жиндүүхэн байна
Шамаргат холын зам цайвалдан алсарч
Шанзны утас харин царгиж үлдсэн байна
Шаналан шаналангаа тэвэрч учирсан бидэн
Шуурга явган зам дээр үрийн дуу сонсох
Цас тээсэн тэнгэр ширтэх нь надаас ч богинохон настай
Хүслээс минь урт он жилүүд гэж байхгүй
Хаврын хорвоо дуутайхан байна
Хаалга эзэлсэн зочид шувууд даган цувж
Хуурын анир гэрийн хоймор дүүрэн байна
Хайр хайраа өлмийдөж учирсан бидэн
Хоёр замын уулзвар дээр
Хөөрөлдөн учрах дорнын өглөө
Нар ширтэн байх нь надаас ч богинохон настай
Зүүднээс минь урт он жилүүд гэж байхгүй
Зун цагийн хорвоо өнгөтэйхэн байна
Зулын гэрэл зовлон дундаа бүдэрч
Зүр гурын дуу харин гадаа ирсэн байна
Зөн дөнгөө дагаж учирсан нутгийн бидэн
Зөндөө улаан замын тоосоо гүвж
Зүрх зүрхэндээ багталцсан
Дорнын үүдээр Үүлс нүүн байх нь надаас богинохон настай
Надаас урт он жилүүд гэж байхгүй
Намрын хорвоо уйтайхан байна
Нүүдэл холын зам будан дундаа алсарч
Намайг орхиод буурал минь харин одсон байна
Сэтгэлээ дэлгэж учирсан амьдрал бидэн
Салаа замын гол дээр
Хүсэл зөрөлдөн зогсох Дорнын удэш
Сар ширтэн байх нь надаас богинохон настай
Наснаас минь урт он жилүүд гэж байдаг ч
Нартын хорвоо уйтайхан байна
Найргаас минь урт он жилүүд гэж байхгүй
Нарны хорвоо уйтайхан байхаас ч яах вэ
****************************************
Худагт унасан сарыг
Хутгаж уулаа
Цээжинд зангирсан гунигийг
Угааж өглөө
Шивээн толгой шуугисан
Шөнийн талыг
Өдөр мэт харахад
Өнгийн цэцэгс найгаж байлаа
Усанд унасан нарыг
Ууж хүртлээ
Урьд урьдын гунигийг
Ноцоож өглөө
Өнгийн цэцэг ганхсан
Өдрийн талыг
Шөнө мэт харлаа
Шивээн толгой гунихарч байлаа
Өнгө мөнгөний орчлонд
Өгсч уруудаад явахдаа
Өдрөөс гэгээн шөнө байдгийг
Өнөөг хүртэл мэдсэнгүй
Өнөөг хүртэл мэдсэнгүй
Шөнөөс харанхуй өдөр байдгийг
Өвгөн болтлоо мэдсэнгүй
*********************************
ӨНӨӨДӨР БИ ГАНЦААРАА…
Өнчин дэрсний энэлэнт чимээ
Өрөн цаана бөхөлзсөн төрхтэй
Өглөөхөн би зүүдээ санах гэж
Өнчин дэрээ ноолж хэвтсэн
Хүний л жаахан амрагаа
Хүслийнхээ дэргэд авчрах гэж
Бухимдаж байсан
Өчигдөр би олуулаа
Өөрийн юм шиг амраг дэргэд минь
Амьдрал холын замд
Амраглан алхсан гэгээн тэмүүлэлтэй
Өнөөдөр би ганцаараа
Өлөн сувдаг зүүдээ зүхмээр
Өглөө нарыг алгадаж буцаамаар
Өширч хорвоог сөнөөмөөр
Өнөөдөр би ганцаараа
