Бетховен
Бүх дэлхий, бүх үеийн хамгийн суут хөгжмийн зохиолчдын нэг Людвиг Ван Бетховен хувийн амьдралдаа азгүйчүүдийн нэг байжээ. Тэрээр бүх л амьдралынхаа турш “зөвхөн минийх” гэж хэлэх нэг бүсгүйг эрж хайсан боловч олоогүй гэдэг. Түүний анхны хайртай бүсгүйг Жульетта Гвичарди гэдэг байжээ. Бетховен түүнийг захиандаа “мөнхийн дурлал минь”, “сахиусан тэнгэр минь”, “амьдралын утга учир минь”, “надад заяасан бүхний дээд минь” гэхчлэн шүтдэг байсан боловч бүсгүй хөгжмийн суутантай хамт хэцүү бэрхийг туулахыг хүссэнгүй амар амгалан, тайван амьдралыг сонгожээ. Yүний дараа тэрээр нэгэн үе яруу найрагч Гётегийн ухаангүй дурлаж явсан Беттина фон-Арнимд дурлажээ.
Зөгнөлт зохиолч Арнимын бэлэвсэн эхнэр Беттина тун хачирхалтай нэгэн байжээ. Түүхч эрдэмтэн Льюисийн үзэж байгаагаар Беттина бүсгүй хүн гэхээсээ “чөтгөр шулам” гэж л ийм байдаг болов уу гэмээр нэгэн байсан аж. Цэл залуу, дүрэлзсэн, овилгогүй, хачин ааштай бүсгүйд дурласан Бетховен түүнээс хариу хайрыг хүртэж чадсангүй. Хожим Доротея Эртман хэмээх нэгэнд дурлаж байсан гэх боловч уг бүсгүйн тухай тодорхой мэдээлэл байдаггүй байна. Тиймээс Бетховен бүх л амьдралынхаа турш суут хөгжмийн зохиолчийг өөрийг нь биш, бүтээлийг нь шүтэн бишрэгч бүсгүйчүүдийн түүнд хэлэх сайхан магтаалыг нь сонсч гэрт нь зочлон аяга кофегоор дайлуулах юм уу түүнд зориулсан бэлгийг нь авах төдийгөөр сэтгэлдээ дурлан хайрлаж өөрийгөө тайтгаруулсаар насыг барсан гэдэг.
Россини
Суут хөгжмийн зохиолчдоос бүсгүйчүүдийн сэтгэлийг хамгийн ихээр татаж байсан хүн бол Россини байжээ. Царайлаг, сайхан төрсөн, өв тэгш биетэй, тэгээд ч хөгжмийн хосгүй авъяаслаг хөгжмийн зохиолч Россини үүнээсээ болж шаггүй олон сүйт залуу, хартай нөхрийн гарт амиа алдах дөхсөн гэдэг. Түүнийг ид алдаршиж явах үед нэгэн удаа залуухан, царайлаг хиа дөхөн ирж бушуухан нэг зурвас атгуулаад алга болов. Россинид дурласан нэгэн үл таних бүсгүй хайрын зурвас ирүүлж уулзахыг хүссэн байлаа. Тэрээр хотын захад тохирсон газар, цагтаа очиж, тохирсон ёсоор өөрийн зохиосон дуурийн нэгэн арийг дуулахад байшингийн хаалга онгойж гайхалтай үзэсгэлэн төгөлдөр залуу бүсгүй гарч ирэв. Тэд эелдэг зөөлнөөр ярилцан, хайрын балыг амталж хоноод салахдаа бүсгүй маргааш хиа дараагийн уулзах газар, цагийг заасан зурвас аваачиж өгнө гэж хэлэв. Гэвч сэргэлэн Россини энэ үзэсгэлэнт бүсгүй, залуу хиа хоёр нэг хүн гэдгийг тааварласан тул маргааш нь хиаг ирээд явангуут араас нь дагасаар тэрхүү сайхан бүсгүй нь Сицилийн тэргүүн баячуудын нэгний эхнэр болохыг олж мэджээ. Харин гурав дахь удаагаа болзоондоо ирэхэд нь буун дуу тасхийж сум чихний нь хажуугаар шунгинан өнгөрөв. Сандарсан Россинийг байдлыг ухаарч амжихаас өмнө нүүрээ халхалсан хоёр хүдэр эр илд далайн дайран ирж, Россини ч ичгүүртэйгээр зугтан оджээ. Иймэрхүү явдал түүнд чамгүй олон тохиолдсон гэх. Түүнд олон нууц амраг байж, олон бүсгүй дурлаж байв. Россини өөрөө ч өөрийнхөө тухай нэлээн өндөр сэтгэгдэлтэй, бардам нэгэн байжээ. Нэг удаа түүнийг Веллингтон гүнтэй ярилцан зогсох зуур санамсаргүй дундуур нь орж ирсэн гоо бүсгүйд хандаж “Хатагтай, та Европын хамгийн агуу хоёр хүний дунд зогсож байгаадаа өөрийгөө тун азтай гэж бодож яваарай…” гэж хүртэл хэлж байсан гэдэг. Гуч гараад бага зэрэг томоожсон Россини дуучин Колброутай гэрлэв. Тэр эхнэрийгээ сайн дуучин гэж боддог байсан бөгөөд гурван жилийн дараа Англи оронд ирээд дуучин эхнэрийг нь таалан хүлээж авсангүй гэж английн үзэгчдэд уурласан гэдэг.
Верди
Хөгжмийн ертөнцийн өөр нэгэн суут төлөөлөгч Жузеппе Верди Бетховеноос хавьгүй азтай байжээ. Вердийн эцэг эх нь Буссето хотоос холгүй амьдардаг энгийн тариачид байлаа. Бяцхан Жузеппе нутгийнхаа жижигхэн сүмд байнга очиж, тэндхийн хуучин орган хөгжмийг дуртайяа шимтэн сонсдог байжээ. өсч явсан залуу хүү нэг удаа сурсан замаасаа арай өөр замаар явж Буссетогийн хамгийн том, сайхан байшингийн дэргэдүүр өнгөрч явахдаа тэндээс төгөлдөр хуурын гайхамшигт аялгуу эгшиглэхийг сонсч чагнаархан зогсов. Энэ өдрөөс хойш түүнийг энэ байшингийн нэгэн үл үзэгдэгч хүч байнга татан урхидах болжээ. Нэг өдөр байшингийн нь гадаа байнга ирдэг болсон залуу хүүг харсан гэрийн эзэн баян худалдаачин Антонио Берецци гарч ирээд хүүг гэрийн нь гадаа юу хийж байгааг сонирхон асуув. Жузеппе “Би төгөлдөр хуур бага зэрэг тоглож чадна. Тэгээд танайхаас эгшиглэх хөгжмийн аялгууг сонсох надад их таатай байна” гэж хариулав. Берецци түүнийг гэртээ орж охиныхоо тоглохыг тухлан сонирхохыг урьжээ. Ийнхүү Жузеппегийн алдaрын ч, хайр дурлалын ч, гэр бүлийн ч амжилт эхэлсэн байна. Худалдаачин Берецци ухаалаг, энэрэнгүй хүн байлаа. Тэрээр залуу хөгжмийн зохиолчийг ивээлдээ авч тал бүрээр дэмжин туслах болов. Ингээд удалгүй Верди нэрд гарч, алдартай хөгжмийн зохиолч болоход Берецци түүнд охиноо эхнэр болгон өгчээ.
www.miss.mn