Өмнөх үг
Би Танд энэхүү бяцхан номыг чин сэтгэлээсээ санал болгож байна. Учир нь би эдгээр хичээлийг өөрийн биеэр туршиж үзээд амьдралыг минь өөрчилсөн үр дүнг нь гайхан биширсэн юм. Амьдралд хайраас илүү чухал зүйл үгүй гэдэг туйлын үнэнийг мэдэрч, мэдэхээс илүү чухал, үнэтэй зүйл гэж үгүй. Шүүмжлэл, гоморхол, гэм нүгэл, таагүй бодол зэрэг ариун нандин хайрлаж энэрэхүйд саад бологч бүхнийг үлдэн хөөхөд “Амьдралын богино дамжаа” ном Танд тусална.
Бид энд ямар нэгэн зүйлийг өөрчлөхөөр ирсэн, айдсаа л ялж чадвал зорьсон бүхэндээ хүрч чадна гэдэгт би итгэдэг. Бас хэн нэгэнд ч юм уу, ямар нэгэн зүйлд санаа тавихдаа, бусдад туслахдаа чин сэтгэлээсээ хандвал юуг ч өөрчилж чадна гэдэгт итгэдэг. Амар амгалан, хайр энэрэл, баяр баясал, зохицол нийцлийг хорвоо дэлхийд түгээхэд бид бүгд үүрэгтэй. Сэтгэлийн амгаланг олж, түүнийгээ уулзаж учирсан, санаж бодсон хүн бүртээ энэрч нигүүлсэхүйн хамт түгээснээр бид энэхүү үүргээ гүйцэтгэнэ. Энэ ном чухамдаа зүрх сэтгэлийг тань дээрх үйл хэрэгт оруулж, насан турш сэтгэлийн амгаланг мэдрэхэд тань туслах юм.
Би хөгжмөөрөө энэрэл хайр түгээх азтай хувь заяанд төрсөн. Ийм зол завшаан хүн бүрт бий гэдэгт би огтхон ч эргэлздэггүй. Дэндүү их харанхуйлалд автсан өнөөгийн дэлхийд хайр түгээгч, гэрэл цацруулагч болох боломж бид бүгдэд бий. Одоо салж одох бус, нэгдэн нийлэх цаг. Одоо хайрлаж энхрийлж, гудамж талбайд бүжиглэх цаг. Хайр гэрэлтсэн харцаар уур бухимдал, үзэн ядалтыг үгүй хийх цаг. Энэхүү “Амьдралын богино дамжаа” ном надад тус болсон шигээ Танд ч гэсэн тусална гэдэгт итгэж байна.
Карлос Сантана
Танилцуулга
Та юу хүсэж байна вэ? Амьдралын сайн сайхан бүхнийг шинээр, эрч хүчтэйгээр мэдэрмээр байна уу? Сэтгэлийн амгаланг олж, айдас, үзэн ядалтгүй амьдрахад суралцмаар байна уу? Сэтгэл хөдлөлөөс үүддэг шаналал, бухимдал, уй гуниг, цөхрөлийн хүлээснээс тайлагдаж хүн бүрт, тэр дундаа өөрөө өөртөө энэрэнгүй ханддаг болмоор байна уу? Дутуудах, орхигдох зүйлгүйгээр шархалж, сэвтсэн харилцаа бүрээ “эдгээмээр” байна уу?
Гэм бурууг мартаж, ичгэвтэр, сөрөг бодлуудаа хаяж, амьдралаа төдийгүй хорвоо ертөнцийг бүхлээр нь өөдрөгөөр харахыг хүсэж байна уу? Таагүй дурсамжаа орхиж, одоо үедээ илүү сэтгэл хангалуун амьдарья гэж бодож байна уу? Насан туршдаа бусдад болон өөртөө хатуурхалгүй амьдрахыг хүсэхгүй байна гэж үү?
Илүү энэрэнгүй байхад суралцаж, уур бухимдлаа гээмээр байна уу? Хэмжээлшгүй хайр, амжилтыг мэдрэхэд саад болдог, өөрийн бий болгосон хориг саадыг үгүй хийхийг хүсэж байна уу?
Энэ бүхэнд өгөх хариулт тань “Тийм” бол энэ ном Танд зориулагджээ. Ердөө л 18 хоногийн дотор, өдөр бүр өөртөө багахан цаг зарцуулснаар өөрийгөө төдийгүй өрөөл бусад, хорвоо дэлхийг үнэлэх үнэлэмж тань хэрхэн гайхалтайгаар өөрчлөгдөхийг мэдрээд Та алмайрах болно.
“Амьдралын богино дамжаа” ном улиг болсон бэрхшээлүүдээ шийдэж даван туулахад тань шинэ сонголт болж, таагүй, хувирч орхигдсон бүх харилцаагаа эерүүлэхэд туслахаас гадна амьдралын Танд зэхсэн юуг ч даван туулахад туслах уламжлалт бус аргыг санал болгоно. Энэ ном Таныг улам сайн хүн болгож, итгэлийг тань илүү гүн, амьдралын тань хором мөч бүрийг илүү амар амгалан болгоно. Эдгээрээс илүүтэйгээр бусадтай харилцах, бусдыг хайрлахад илүү гүн гүнзгий мэдрэмж төрүүлдэг болгох юм. Ингэж байж л амьдралаа өөрчлөх бүх боломж бүрдэнэ.
Эдгээр ойлголт хийгээд дараах хичээлүүд нь хоорондоо огт адилгүй таван тивийн айл өрх, нийгэм, бизнес, эдийн засаг, улс төр, үзэл баримтлал, соёлын онцлогоос үл хамааран 50 гаруй улсад сүүлийн 30 гаруй жилийн хугацаанд амжилттай хэрэгжсэн юм. Эдгээр нь хэт хувийн харилцаа хоорондын, болзолт нөхцөлөөс дэлхий нийтийн гээд бүх түвшний асуудалд үр дүнтэйгээс гадна дэлхий ертөнцийг өөрөөр харахад тань тусална.
Дараагийн бүлэг рүү шилжихийн өмнө энэхүү сургалт бүхэлдээ хайрыг мэдэрч түгээхэд саад болдог бүхнийг үгүй хийхэд чиглэсэн гэдгийг дахин нэг сануулъя. Уг дамжааны зорилго нь сонголт, өөрчлөлт болон асуудалтай бүхий л харилцааг “илааршуулахад” оршино. Энэ нь зөрчлөөс амгаланг, айдсаас хайрыг илүүд үзэхийн, гэм бурууг бус харин сайхан сэтгэлийг олж харахын, хамгийн сайхнаараа амьдрахад хайр л чухал гэдгийг ойлгож ухаарахын нэр юм.
Богино дамжаанд суралцах нь
Энэхүү сургалтын ашиг тусыг дээд зэргээр хүртье гэвэл доорх зааврыг дагахыг зөвлөж байна.
Үүнд:
- “Нэгдүгээр хэсэг”-ийн гол зөвлөмжүүдийг 18 хоногийн турш өглөө бүр уншаарай. Орноосоо босонгуутаа уншвал илүү үр дүнтэй.
- Дараа нь “Амар амгаланг мэдрэх үү, зөр- чилдсөөр байх уу” гэж эхлэх эхний хичээлийн картыг уншаарай.
- Хичээл тус бүрийн картыг өдөрт нэг нэгээр нь уншаарай. Алжаалаа тайлах зуураа дор хаяж таван минут картын нүүрэн дэх зөвлөмж болон ард нь байгаа тайлбарыг уншаарай.
- Тухайн өдрийн карт бүрийг номын араас цэвэрхэн тасалж аваад биедээ авч яваарай. Картан дээрх зөвлөмжийг өдрийн турш уншаад дагаж мөрдөхдөө юм бүхэнд, хүн бүрт ижил хандаарай.
- Унтахын өмнө картын хоёр талыг дахин анхааралтай уншаад, тухайн өдрийн хичээлийг хэрхэн дагаж мөрдсөнөө тунгаан бодоорой.
Жич: “Амьдралын богино дамжаа”-д 18 хоно- гийн хугацаанд хоёр хүн зэрэг суралцаж болно. Ингэхдээ өдөр бүр уулзах юм уу, утсаар ярьж 15 минутын турш тухайн өдрийнхөө хичээлийн тухай ярилц. Харин төгсгөлд нь дараа өдрийн зөвлөмжийг чангаар уншаарай.
ЦАГ ТӨР
