Эмэгтэй хүн гэдгийг мэдрүүлдэг хамгийн чухал хувцас бол өсгийтэй гутал юм. Гоё сайхан харагдахын тулд эмэгтэйчүүдийн давж гардаг олон “бэрхшээл” байдгаас хамгийн түгээмэл болоод өдөр тутамд давтагддаг нь өндөр өсгийн дээр тогтож явах асуудал. Хөлийнхөө бүтэц байрлалыг өөрчлөн байж өдрийн туршид бүхэл бүтэн бие цогцсыг ачаалж явна гэдэг тоглоом биш шүү.
Гуталнуудын зарим нь дунд зэрэг өсгийтэй, эсвэл бүр намхан байхад нэлээн өндөр өсгийтийг өдөр тутмынхаа хэрэглээ болгодог бүсгүйчүүд ч байна. Зохион бүтээгчдийн урласан тэр айхтар “төхөөрөмж” дээр төвөггүй алхаж суртлаа хэсэг хугацаа шаардлагатай. Эхэн үед өлмий чинэрч өвдөг нугараад хурдхан тайлж хаямаар санагдаж жигтэйхэн өвддөг хэдий ч хэд хоногийн дараа дасаад хэвийн болчихно. Тэр хэсэг хугацааг л давчих юм бол бүсгүй та эхээс заяаснаасаа дөрвөөс найман “санж” өндөр болох боломжтой.
Өсгийтэй гутал өмсөхөд хүний алхаа гишгээ засарч цэгцтэй болдог гэж үнэн шүү. Мэргэжлийн загвар өмсөгч шиг биш ч өөрийн гэсэн намба донжтой алхаж явах нь хүүхэн хүн болж төрсний онцлог давуу тал.
Эрчүүдийн хувьд санаанд нь яагаад ч багтахааргүй иймэрхүү хэцүү зүйлсийг бид хийж “дөнгөдгөөрөө” баатарлаг. Өдрийн туршид олон цагаар өсгийт дээр гүйж ажлаа амжуулчихаад орой хөлөө амраах шиг сайхан зүйл байхгүй. Гэхдээ л эмэгтэйчүүд гоё сайхныхаа төлөө өөрийгөө дайчилж бас тэмцэж чаддаг гайхамшигтай хүмүүс. Өчигдөр оройны өвдөлтийг ор мартаж өнгөрсөнд нь үлдээгээд өглөө нь ахиад өсгийтэй гутлаа углаад гэрээсээ инээмсэглэсээр гардаг бид аз жаргалтай хүмүүс.
Хэрэв эр хүн та үүнийг уншиж байгаа бол эхнэрээ эсвэл найз бүсгүйгээ орой ирэхэд нь хөлд нь хэдхэн минут иллэг хийгээд өгчихвөл сарнай авснаас ч илүү баярлана гэдэгт итгээрэй. Эцэст нь хэлэхэд биед амар хөнгөн шингэн хувцас, намхан зөөлөн гутал бол хэний ч сонгочих хялбар “хоол”.
Харин сайхан юм бүхэн бага зэрэг золиос шаарддагийг хүүхнүүд үеийн үед ойлгож даван туулсаар ирсэн, бас тэр хэрээрээ залуу насаа өндөр өсгийтөөр чимсээр ирсэн. “Үзэсгэлэнтэй харагдах нууцын тал хувь нь өсгийтэй гутал юм” гэж Холливуудын алдарт жүжигчин асан Грета Гарбо хэлсэн байдаг. Тиймээ, өндрөөс ертөнцийг харахад сайхан шүү дээ.
Х.УянГоо /emegteichuud.mn/